2 Reyes
Elíasta jana patsapa apakushqan
2 Löcu wayrawan Elíasta TAYTA DIOS apakunanpaq tiempu chayamuptinnami Gilgal markapita Eliseuwan yarqurqan. 2 Yarquykashqanchömi Eliseuta kayno nirqan: “Bet-elman aywanäpaqmi TAYTA DIOS kachaykäman. Qamqa kaylacho quëdakuy”.
Tsayno niptinmi Eliseo kayno nirqan: “Mana kachaypami maypa aywaptikipis qatiräshayki, tayta”.
Tsayno niptinmi ishkan aywarqan Bet-elman. 3 Bet-elman chayaptinmi tsaycho taq profëtakuna Eliseuwan tinkuykur kayno nipäkurqan: “¿Musyankiku yachatsishuqniki Elíasta TAYTA DIOS kanan junaq pushakunanpaq kashqanta?”
Niptinmi Eliseo kayno nirqan: “Aw, musyänami. Tsaytaqa pitapis ama wilapaytsu”.
4 Tsaypitanami Elías yapay kayno nirqan Eliseuta: “Jericóman aywanäpaqmi TAYTA DIOS kachaykäman. Qamqa kaylacho quëdakuy”.
Tsayno niptinmi Eliseo kayno nirqan: “Mana kachaypami maypa aywaptikipis qatiräshayki, tayta”.
Tsayno niptinmi Jericóman ishkan aywarqan. 5 Tsaychöpis profëtakuna paykunata chaskikuq yarqamur Eliseuta kayno nipäkurqan: “¿Musyankiku yachatsishuqniki Elíasta TAYTA DIOS kanan junaq pushakunanpaq kashqanta?”
Niptinmi Eliseo kayno nirqan: “Aw, musyänami. Tsaytaqa pitapis ama wilapaytsu”.
6 Tsaypitanami Elías yapay kayno nirqan: “Jordán mayuman aywanäpaqmi TAYTA DIOS kachaykäman. Qamqa kaylacho quëdakuy”.
Tsayno niptinmi Eliseo kayno nirqan: “Mana kachaypami maypa aywaptikipis qatiräshayki, tayta”.
Tsayno niptinmi ishkan aywarqan Jordán mayu kaqman. 7 Aywaptinmi Jericócho taq profëtakunapita pitsqa chunka (50) profëtakuna paykunawan aywapäkurqan. Jordán mayu kuchunman Elíaswan Eliseo chayaykur ichiykäriptinmi tsay profëtakuna karulapita rikarpaykarqan. 8 Tsaycho kaykarnami Elíasqa cäpanta doblarkur mayuta astaykurqan. Tsayno ruraptinmi mayuqa janaman uraman rakikarqan. Tsaynami tsakipana ishkan pasapäkurqan.
9 Mayuta pasarkurnami Eliseuta Elías kayno nirqan: “Manaraq aywakushqäyaq imatapis munashqaykita jukla manakamay”.
Tsayno niptinmi Eliseo kayno nirqan: “Qam munayniyuq kashqaykipita mas munayniyuq kaytami munaykä”.
10 Tsayno niptin Elías kayno nirqan: “Tsayqa sasami kaykan. Imano kaptinpis apakamashqanta rikamashpaykiqa noqapita mas munayniyuqmi kankipaq. Mana rikamashpaykimi itsanqa kashqaykinöla kankipaq”.
11 Tsayno parlar aywarkaykaptinmi elaqpita nina rataraykaq carrëta y nina rataraykaq cawallukuna paykunapa chawpinpa pasar rakirirqan. Elíastanami löcu wayra jana patsapa apakurqan. 12 Tsayta rikaykurmi Eliseo mantsakashpan kayno nirqan: “¡Ay taytalay tayta! ¡Israel runakunapa guërra carrëtankunata y cawallunkunatami rikaykä!”
Tsaypita patsa Elíasta mananami rikarqannatsu. Elías aywakuptinmi Eliseo pasaypa lakikushpan röpanta rachiriykurqan.
Milagrukunata Eliseo rurashqan
13 Elíaspa cäpan shikwashqanta shuntarkurmi Jordán mayu kuchunman Eliseo kutirqan. 14 Nirkurmi Elíaspa cäpanwan mayuta astashpan kayno nirqan: “Elías yärakushqan TAYTA DIOS, noqalätapis yanapaykalämay”.
Tsayno astaptinmi yakuqa janaman uraman rakikarqan. Tsaymi tsakilapana Eliseo pasarqan.
15 Tsayta rikaykurmi Jericópita shamuq profëtakuna kayno nipäkurqan: “¡Elíastano kananqa Eliseutanami TAYTA DIOS yanapaykan!”
Tsaymi taripaykur paykuna qonqurpakuykurqan urkunpis pampaman töpashqanyaq. 16 Nirkurmi Eliseuta kayno nipäkurqan: “Tayta, munaptikiqa noqakunacho kaykaq pitsqa chunka (50) mas kalpasapa runakuna aywapäkutsun Elíasta ashimunanpaq. Capazmi TAYTA DIOSPA espïritunqa may jirkamanpis o may raqramanpis kacharpamushqa kanqa”.
Tsayno niptinmi Eliseo kayno nirqan: “Ama manakaqpaq afanakur pitapis kachapäkuytsu”.
17 Tsayno niptinpis yaparir yaparir ashiq aywapäkunanpaq niptinmi Eliseo mana munaykar awnirqan. Tsaymi pitsqa chunka (50) runakuna kimsa junaq ashirpis Elíasta mana tarirqantsu. 18 Mana tariykurmi Jericóman kutiykuptin Eliseo kayno nirqan: “Noqa wilarqämi ashiq aywarpis mana taripäkunaykipaq kashqanta”.
19 Tsaypita juk junaqmi Jericó runakuna Eliseuta kayno nipäkurqan: “Rikashqaykinöpis kay markaqa ali sitiuchömi kaykan, tayta. Itsanqa yaku pochquq kaptinmi chakrakunapis mana wayuntsu”.
20 Tsayno niptinmi Eliseuqa manakurqan mushuq tazonta y kachita apapänanpaq. Apapaptinmi 21 pukyuman aywaykur tsay kachita winashpan kayno nirqan: “TAYTA DIOSMI kayno nin: ‘Noqami kay yakuta mishkiq yakuman tikratsishqä. Kananpitaqa manami pipis kay yakuta upur wanunqatsu y chakrakunapis alinami wayunqa’ ”.
22 Eliseo nishqannölami tsaypita patsa yaku mana pochqurqannatsu.
23 Tsaypitaqa Bet-elpanami Eliseo aywakurqan. Markaman witsaykaptinmi mözukuna yarqamur asipar kayno nipäkurqan: “¡Qara putu witsaykämun! ¡Qara putu witsaykämun!”
24 Tsayno asipaptinmi Eliseuqa tikraykur TAYTA DIOSPA jutincho maldicionarqan. Tsaymi jinan höra muntipita ishkay ösukuna yarqaramur chusku chunka ishkay (42) mözukunata mashtaypa mashtar wanutsirqan. 25 Nirkurnami Eliseuqa Carmelo jirkapa aywarqan. Tsaypitanami Samaria markaman kutikurqan.