2 Crónicas
Israel mayinkunawan mana pelyapäkunanpaq Semaías wilakushqan
11 Jerusalénman Roboam kutiykurmi Judá trïbu runakunapita y Benjamín trïbu runakunapita pachak pusaq chunka waranqa (180,000) alinnin soldädukunata shuntarqan rakikaykaq Israel runakunata munayninman shuntananpaq. 2 Tsaymi profëta Semaíasta TAYTA DIOS parlaparqan kayno nir: 3 “Salomónpa tsurin Judá nacionpa mandaqnin rey Roboamta, Judá trïbu runakunata y Benjamín trïbu runakunata wilanki kayno nir: 4 ‘TAYTA DIOSMI kayno nin: Noqami Israel nacionta rakishqä ishkay nación kananpaq. Tsayno kaptinqa ama aywapäkuytsu Israel mayikikunawan pelyanaykipaq. Tsaypa trukanqa cada ünuyki wayikipa kutikäriy’ ”.
TAYTA DIOSPA wilakuqnin tsayno niptinmi Jeroboamta atacaq aywapäkunanpa trukanqa wayinpana lapan kutikärirqan.
Markakunata Roboam shumaq murallatsishqan
5 Jerusaléncho Roboam tashpanmi Judácho wakin markakunata rumiwan murallatsirqan soldädukuna atacaptin amparakur defiendikärinanpaq. 6 Tsay markakuna karqan Belén, Etam, Tecoa, 7 Bet-sur, Soco, Adulam, 8 Gat, Maresa, Zif, 9 Adoraim, Laquis, Azeca, 10 Zora, Ajalón y Hebrón. Tsay murallatsishqan markakunaqa karqan Judá trïbu y Benjamín trïbu runakuna tashqanchömi.
11 Tsay markakunata shumaq sigurarkatsirmi capitankunata tsayman churarqan täpananpaq. Tsaynöpis tsay markakunaman pirwatsirqan mikuyta, aceitita y vïnuta. 12 Tsaynölami escüdukunatapis lanzakunatapis tsay markakunaman churatsirqan soldädukuna tsaycho defiendikärinanpaq. Tsaynöpami Judá trïbu y Benjamín trïbu runakuna tashqan markakuna rey Roboampa munaynincho quëdarqan.
13 Israel nacionchönami tsurinkunawan rey Jeroboamqa cürakunata cüra kayninpita qarqurqan.* Tsaymi cürakuna y *levitakunapis uywa mitsikunankunata y chakrankunata kachariykur maytsaypitapis Roboam mandashqan nacionman aywakärirqan Jerusaléncho y Judá nacioncho kaq markakunachöna tänanpaq.14 - 15 Jeroboam tsayno qarqurqan juk aylu runakunatana cüra kananpaq churashpanmi. Tsay cürakunata churarqan markakunacho kaykaq *altarkunacho sacrificiukunata rupatsinanpaqmi. Tsaynöpis sacrificiukunata rupatsipäkurqan *supaykunapaq y ruratsishqan turitukunapaqmi.* 16 Israel nacionpita Jerusalénman cürakuna y *levitakuna aywashqannölami TAYTA DIOSMAN lapan shonqunwan yärakuq runakunapis Israel nacionpita Jerusalénman aywakärirqan unay aylunkuna yärakushqan TAYTA DIOSTA adorar sacrificiukunata rupatsinanpaq. 17 Tsaynöpami Judá nación munayniyuq rikakurqan. Tsay runakunami Davidno y Salomónno Tayta Diosta cäsukur kimsa wata Salomónpa tsurin rey Roboampa favornin karqan.*
18 Roboam tarqan Jerimotpa tsurin Mahalatwanmi. Mahalatpa taytan Jerimot karqan Davidpa tsurinmi. Mahalatpa mamannami karqan Eliabpa tsurin Abihail. Mahalatpa awkilunnami karqan Isaí. 19 Warmin Mahalatchömi Roboampa tsurinkuna karqan Jehús, Semarías y Zaham. 20 Roboamqa warmin jananman juk warmita ashirqan Absalónpa tsurin Maacata. Tsay warminchömi Roboampa tsurinkuna karqan Abías, Atai, Ziza y Selomit.
21 Roboampa warminkuna karqan chunka pusaqmi. Tsaynöpis *concubïnankuna karqan soqta chunkami (60). Maacatami lapan warminkunapita mas kuyarqan. Roboampa olqu tsurinkunami karqan ishkay chunka pusaq (28). Warmi tsurinkunanami karqan soqta chunka (60).
22 Maacapa wawan Abías rey kananta munarmi Roboamqa wawqinkunapa mandaqnin kananpaq payta churarqan. 23 Shumaq yarpachakurirmi wakin kaq tsurinkunata churarqan corralashqa markakunacho autoridä kananpaq. Tsay markakunaqa Judá trïbu runakuna y Benjamín trïbu runakuna tashqanchömi karqan. Tsay markakunamanmi mikuytapis atskata kamariparqan. Lapan tsurinkunatami warmita atskata ashiparqan.