2 Crónicas
Judá nacioncho Abías rey kashqan
13 Jeroboam chunka pusaq wata Israel nacioncho rey kaykaptinmi Judá nacioncho Abías rey kayta qalaykurqan. 2 Jerusaléncho rey karqan kimsa watami. Mamanmi karqan Gabaapita Urielpa tsurin Micaías.
Jeroboamwanmi Abías guërrata rurapäkurqan. 3 Tsawraqa rey Abías pelyaq aywananpaq chusku pachak waranqa (400,000) ali chölu runakunata shuntarqan. Rey Jeroboamnami rey Abíaswan pelyaman aywananpaq pusaq pachak waranqa (800,000) ali chölu runakunata shuntarqan.
4 Tsawraqa Efraín jalqakunaman paykunawan chayaykur Zemaraim puntaman Abías witsarqan. Tsaypitami qayakurqan kayno nir: “¡Israel runakuna y Jeroboam, mayapäkamay! 5 Qamkuna ¿manaku musyapäkunki David y paypita miraqkuna Israel nacioncho imayyaqpis rey kananpaq TAYTA DIOS *pactuta rurar promitishqanta? Promitishqantaqa lapantami cumplinqa.
6 “Tsayno kaykaptinpis mana cäsukuypami Nabatpa tsurin Jeroboamqa reypa contran sharkurqan. Jeroboamqa Davidpa tsurin Salomónpa ashmaynin kaykarmi tsayno rurarqan. 7 Contran sharkurmi qela runakunawan y fiyu runakunawan Jeroboam juntakarqan. Salomónpa tsurin rey Roboam mözularaq kar yarpaynin shumaq manaraq kaptinmi ichipayta mana kamäpakurqantsu.
8 “Davidpita miraqkunaraqmi TAYTA DIOS *mandaykashqancho rey karkaykan. Tsayno kaptinpis qamkunaqa atska kashqaykiman atiënikur y Jeroboam rurapäshushqayki qori turitu diosnikikunaman yärakurmi paypa contran sharkurkaykanki.
9 “Tsaynöpis qamkunaqa Aarónpita miraq cürakunata markaykipita qarqupäkushqanki. Paykunata qarqupäkushqanki cürakuna kananpaq TAYTA DIOS churaykaptinpis.* Tsaynölami Leví trïbu wakin runakunatapis qarqupäkushqanki. Nirkur wakin nación runakunanölami pipis juk turituta y qanchis carnikunata apamuptin churarkaykanki diosnikikunata sirviq cüra kananpaq. Tsay diosnikikunaqa manami rasunpatsu Dios kaykan.
10 “Noqakunami itsanqa TAYTA DIOSNINTSI nishqanta cumplir mana kacharïtsu. Payta sirviq cürakunapis Aarónpita miraqkunalami karkaykan. Tsaynömi cürakunata yanapananpaqpis *levitakunala karkaykan. 11 TAYTA DIOS nishqannölami paykunaqa tutapapis tardipapis rupatsina sacrificiukunata ruparkaykätsin y inciensuwan qoshtarkaykätsin. Tsaynölami purificashqa mësamanpis *sagrädu tantakunata churarkaykan. Qori candelabrukunamanpis cada tardimi atskita rataykätsin. Tsaynömi noqakunaqa TAYTA DIOSNINTSI nishqanta cumplirkaykä. Qamkunaqa manami pay nishqanta cäsukurkaykankitsu.
12 “Noqakunawanmi Tayta Dios kaykan. Qamkunawan pelyayta qalaykunäpaq cürankunapis listunami karkaykan *cornëtankunata tukapäkunanpaq. Noqakunawan pelyarqa unay ayluntsikuna yärakushqan TAYTA DIOSWANMI pelyapäkunkipaq. Paywanqa ama churakaytsu. Paytaqa manami vincipäkunkipaqtsu”.
13 Tsayno parlaykaptinmi Jeroboamqa pakaylapa wakin kaq soldädunkunata kacharqan Judá soldädukunata qepanpa yaykuykur atacapäkunanpaq. Wakin kaq soldädunkunanami nawpaqpa atacapäkurqan. 14 Judá runakuna tikraykushqanchömi rikapäkurqan qepanpa y nawpanpa atacaykashqanta. Tsawraqa TAYTA DIOSTA manakäriptin cürakunapis cornëtakunata tukapäkurqan jukla pelyapäkunanpaq.
15 Pelyayta qalaykur qaparaptinmi Jeroboamta y Israel runakunata vincipäkunanpaq Abíasta y Judá runakunata Tayta Dios yanaparqan. 16 Vinciptinmi Israel runakuna qeshpir aywakärirqan. Tsayno kaptinpis qeshpiykaqta Judá runakuna wanutsinanpaqmi Tayta Dios yanaparqan. 17 Tsayno pelyarmi Abías y soldädunkuna pitsqa pachak waranqa (500,000) alinnin Israel soldädukunata wanutsipäkurqan. 18 Tsayno vincirqan unay aylunkuna yärakushqan TAYTA DIOSMAN yärakurmi. Israel runakunami itsanqa penqaytukushqa aywakärirqan.
19 Jeroboamta vincirkurmi Abías acapararqan Bet-el markata y jalqankunata, Jesana markata y jalqankunata y Efraín markata y jalqankunatapis. 20 Abías kawashqanyaq manami tsay markakunata Jeroboam shuntayta kamäpakurqantsu. Watakuna pasarkuptinnami Tayta Diospa castïgunwan Jeroboam wanurqan.
21 Abíasmi itsanqa mas munayniyuq rikakurqan. Abíaspa warminkuna karqan chunka chuskumi. Paypa olqu tsurinkuna karqan ishkay chunka ishkay (22) y warmi tsurinkuna karqan chunka soqta. 22 Abías imano kawashqanpis y imata rurashqankunapis qelqaraykan Diospa profëtan Iddo qelqashqanchömi.