2 Crónicas
Tayta Diosta Asa cäsukushqan
15 Tayta Diospa Espïritun parlatsiptinmi Obedpa tsurin Azarías 2 rey Asaman aywaykur kayno nirqan: “Rey Asa, Judá trïbu runakuna, Benjamín trïbu runakuna, lapayki mayapäkamay. TAYTA DIOSWAN karkaykaptikiqa paypis qamkunawanmi kaykanqa. Payta *ashirqa taripäkunkipaqmi. Payta kachariptikiqa qamkunatapis kacharishunkipaqmi.
3 “Unayshi Israel nacioncho runakuna Tayta Diosta mana cäsukärirqantsu. Tayta Diospa mandamientunkunata yachatsinanpaqpis cürakuna manashi karqantsu. 4 Itsanqa nakaykuna chayaptinshi jutsa rurayta kacharir kuyaqnin TAYTA DIOSTA ashirqa taripäkuq. 5 Tsay witsanshi maytsaychöpis mantsa mantsala kawapäkuq. Maypa aywarpis y maypita kutimurpis manashi tranquïlu kawapäkuqtsu. Lapan nacionkunachöshi tukuy niraq desgraciakuna runakunata pasaq. 6 Tayta Dios tsayno castigaptinshi juk nacionwan juk nación y juk markawan juk marka pasaypa wanutsinakuq. 7 Qamkunaqa Tayta Diosta mana ajayaypa cäsukäriy. Cäsukäriptikiqa ali kawapäkunaykipaqmi yanapashunki”.
8 Tayta Diospa profëtan nishqanta mayaykurmi rey Asaqa valurashpan Judá runakuna y Benjamín runakuna tashqan markakunacho lapan ïdulukunata ushakätsirqan. Tsay ïdulukunata Tayta Dios pasaypami melanarqan. Tsaynölami Efraín jalqakunacho acaparashqan markakunacho kaq ïdulukunatapis ushakätsirqan. Nirkurnami TAYTA DIOSPA templun punkucho kaykaq *altarta altsatsirqan.
9 Judá nación runakunata Tayta Dios lapancho yanapaykashqanta musyarmi Israel nación atska runakuna markankunata kacharir Asa mandashqan nacionman aywakärirqan. Tsay runakuna karqan Efraín trïbu runakuna, Manasés trïbu runakuna y Simeón trïbu runakunami. Tsay runakunatawanmi Judá trïbu runakunata y Benjamín trïbu runakunata Asa qayatsirqan 10 Jerusaléncho juntakänanpaq. Tsayman juntakarqan chunka pitsqa wata Asa rey kaykaptin kimsa kaq killachömi.
11 Juntakaykuptinmi TAYTA DIOSTA adorar qanchis pachak törukunata (700) y qanchis waranqa (7,000) uyshakunata pishtarkur sacrificiuta rupatsirqan. Tsay uywakunaqa karqan contrankunata vincirkur apamushqanmi. 12 Nirkurmi *pactuta rurar promitipäkurqan lapan shonqunwan y lapan voluntäninwan unay aylunkuna yärakushqan TAYTA DIOSTA imaypis ashipäkunanpaq. 13 Tsaynöpis nipäkurqan Israel runakunata kuyaq TAYTA DIOSTA mana cäsukuq kaqtaqa awkintapis, wamratapis, warmitapis, olqutapis wanutsinanpaq.
14 TAYTA DIOSTA tsayno promitirmi pasaypa kushikärirqan. Kushikurmi *cornëtakunatapis y waqrakunatapis tukapäkurqan. 15 Lapan shonqunwan promitir y lapan voluntäwan Tayta Diosman yärakurmi Judá nacioncho taq runakuna lapan kushikärirqan. TAYTA DIOSMI paykunata imaypis yanaparqan nawpancho kaykaq nacionkunawan jawkala kawapäkunanpaq.* 16 *Asera diösapaq awilan Maaca jawitsishqan qerutapis tseqtarmi Cedrón raqraman apaykur rupatsirqan. Nirkurmi tsay ïduluta ruratsishqanpita Maacatapis reina kashqanpita qarqurqan. 17 Tsayno rurarpis markakunacho kaykaq altarkunataqa Asa manami juchutsirqantsu. Asaqa wanunanyaqmi TAYTA DIOS munashqanno kawarqan. 18 Tsaynölami papäninpis y kikinpis TAYTA DIOSPAQ rakishqankunata templuman aparqan qorita, qellayta y alhäjakunata. 19 Asa kimsa chunka pitsqa (35) wata rey kashqanyaq manami pipis Judá nacionta atacarqantsu.