Esdras
Israel runakuna nacionninman kutinanpaq rey Ciro nishqan
1 Persia nacioncho Ciro rey kayta qalaykushqan watami Ciruta TAYTA DIOS yarpayta qorqan Israel runakunata nacionninman kutitsinanpaq. Tsayno kutitsiptinmi profëta Jeremías wilakushqanno* cumplikarqan. Tsaymi Ciruqa mandashqan intëru nacionpa shimipapis y cartawanpis wilakatsirqan kayno nir:
2 “Noqa Ciro, Persia nacionpa mandaqnin rey karmi kayno nï: Jana patsacho kaykaq TAYTA DIOSMI lapan nacionkunata makïman churamushqa. Paymi nimashqa Judácho kaykaq Jerusaléncho templuta sharkatsipänäpaq.* 3 Tsaymi Tayta Diosman yärakuq runakunapita mayqanpis aywayta munaqkunata mandä Jerusalénman chayaykur TAYTA DIOSPA templunta sharkatsipäkunanpaq. Payqa Israel runakunata kuyaq Dios kar Jerusalénchömi taykan. Aywapäkuptin mana kachaypa yanapaykulätsun. 4 Tarkaykashqanpita Jerusalénman aywaqkunataqa quëdaq kaq Israel mayinkuna yanapatsun qellaywan, qoriwan, uywakunawan y ofrendakunawan. Tsayno yanapatsun Tayta Diospa templunta Jerusaléncho sharkatsipäkunanpaq”.
5 Rey Ciro nishqanno templuta sharkatsinanpaqmi wakin Israel runakunata Tayta Dios shakyätsirqan. Tsaymi Benjamín trïbupa y Judá trïbupa mandaqninkuna, cürakuna y *levitakunapis Jerusalénman aywapäkurqan. 6 Aywaptinmi lapan vecïnunkuna yanaparqan qellaywan, qoriwan, mikuykunawan, uywakunawan, chanin cuestaqkunawan y ofrendakunawanpis.
7 Tsaynölami TAYTA DIOSPA templunpita Nabucodonosor apakushqan manëjukunata rey Ciro entregarqan Jerusalénman kutitsinanpaq. Tsay manëjukunaqa Nabucodonosor adorashqan diosninkunapa templunchömi churaraykarqan.* 8 Jerusalénman kutitsipäkunanpaqmi rey Ciro entregarqan tesorëru Mitrídatesta. Paynami yupaparqan Sesbasarta. Sesbasarqa Judáman aywaqkunapa mandaqninmi karqan.
9 Yupapashqan manëjukunami kayno karqan:
qoripita kimsa chunka (30) tazonkuna,
qellaypita waranqa (1,000) tazonkuna,
ishkay chunka isqun (29) cuchillukuna,
10 qoripita kimsa chunka (30) väsukuna,
qellaypita chusku pachak chunka (410) väsukuna
y waranqa (1,000) tukuy niraq manëjukuna.
11 Qoripita y qellaypita chaskishqan lapan manëjukuna karqan pitsqa waranqa chusku pachakmi (5,400). Lapan tsaykunatami Israel mayinkunawan Babiloniapita Jerusalénman Sesbasar kutitsirqan.