Nehemías
Israel runakuna Tayta Diosta manakärishqan
9 Tsay killami ishkay chunka chusku (24) junaqchöna Israel runakuna juntakarqan ayunapäkunanpaq. Ayunarmi lapan runakuna qachqa röpata jatikurkur umanman alpata winakärirqan. 2 (Tsay witsanqa jäpa warmikunawan tashqanpita Israel runakuna rakikashqanami kaykarqan.) Juntakärishqanchömi kikinkunapis y unay aylunkunapis jutsata rurashqanta confesakärirqan.
3 Tsaycho kimsa höra ichirpaykaptinmi TAYTA DIOSPA leyninkunata lapan mayananpaq liyiparqan. Tsayta mayarkurnami TAYTA DIOSTA adorashpan jutsa rurashqanpita kimsa höra perdonta manakärirqan.
4 Tsaypitanami *levitakuna Jesúa, Bani, Cadmiel, Sebanías, Buni, Serebías, Bani y Quenani tabladïlluman witsarkur TAYTA DIOSTA lapan kalpanwan manakärirqan. 5 Nirkurnami levitakuna Jesúa, Cadmiel, Bani, Hasabnías, Serebías, Hodías, Sebanías y Petaías kayno nipäkurqan: “¡Lapantsi ichirkur TAYTA DIOSNINTSITA alabashun!”
Tsayno nirmi Tayta Diosta manakärirqan kayno nir:
“Pïmaypis jutikita joqarir imaypis alabaykuläshunki.
Mayjina alabarpis manami munashqaykinöqa alabapäkütsu.
6 “Qamlami TAYTA DIOS kaykanki.
Qammi kamashqanki jana patsata y tsaycho lapan kaykaqkunatapis.
Tsaynölami kamashqanki kay patsata y kay patsacho kaqkunata, lamarta y lamar rurincho kaqkunata.
Kawayta qoptikimi lapan kawaqkunapis kawapäkun.
Tsaymi jana patsacho lapan kaykaqkunapis adorashunki.
7 “TAYTA DIOS, qammi Abramta akrarqayki.*
Qammi pushamurqayki Caldeacho kaykaq Ur markapita.
Nirkurnami Abraham jutin kananpaq trukatsirqayki.*
8 Musyarqaykimi Abraham qamman yärakamushqanta.
Paywan *pactuta rurarmi promitirqayki cananeo, heteo, amorreo, ferezeo, jebuseo y gergeseo runakuna tashqan nacionkunata paypita miraqkunata qoykunaykipaq.
Imaypis cumpliq karmi promitishqaykita cumplishqanki.
9 “Qam rikarqaykimi Egiptucho unay aylükuna imano nakapäkushqantapis.
Tsaynölami mayarqayki Puka Lamar kuchuncho waqapäkushqanta.
10 Espantaypaqkunata rurarmi Faraónta, sirviqninkunata y tsay nacioncho taq runakunatapis castigarqayki.
Tsayno rurarqayki Israel runakunata nakatsishqanpitami.
Tsaynöpami munayniyuq kashqaykita maytsaychöpis runakuna musyapäkun.
11 Israel runakuna rikaykaptinmi lamarta ishkayman rakirqayki.
Tsaymi paykunaqa tsakipana pasamurqan.
Qatipaqnintami itsanqa rumitano lamar ruriman talpukätsirqayki.
12 Israel runakunataqa ichiraykaq pukutaywanmi junaqpa pushamurqayki.
Tsakaypanami rataykaq ninawan atsikyaparqayki.
Tsaynöpami maypa aywapäkunanpaqpis tantiyatsirqayki.
13 “Jana patsapita Sinaí puntaman urarpamurmi paykunata parlaparqayki.
Ali kawapäkunanpaqmi nishqaykikunata, leynikikunata, estatütuykikunata y mandamientuykikunata tantiyatsirqayki.
14 Jamay junaqkuna jamananpaqmi nirqayki.
Sirvishuqniki Moiséswanmi mandamientuykikunata, estatütuykikunata y leynikikunata yachatsirqayki.
15 “Mikanaptinpis jana patsapitami mikuyta kamaripämurqayki.
Yakunaptinpis qaqapitami yakuta pashtatsimurqayki.
Nirkurmi promitishqayki naciontapis qoykurqayki.
16 “Unay aylükunaqa mana wiyakuq karmi mandamientuykikunata mana cumplirqantsu.
17 Salvanaykipaq milagrukunata rurashqaykitapis paykunaqa qonqaykur mana cäsukushurqaykitsu.
Tsayno mana wiyakuq karmi y yapay ashmay kayta munarmi juk mandaqninta churayta munarqan Egiptuman kutitsinanpaq.*
“Tsayno kaptinpis perdonakuq, ali shonqu, kuyapäkuq, juklaqa mana rabyakuq y kuyakuq Dios karmi paykunata mana kacharirqaykitsu.
18 Paykunami fundiypa turituta rurarkatsir kayno nipäkurqan: ‘Kay diosmi Egiptupita jorqamaqnintsi kaykan’.
Tsayno rabyanätsishuptikipis 19 kuyapäkuq kashpaykimi chunyaq jirkacho mana kacharirqaykitsu.
Tsaymi shapäkamunanpaq ichiraykaq pukutaywan junaqpa pushamurqayki.
Tsakaypanami ichiraykaq ninawan atsikyaparqayki.
20 Espïrituykiwanmi paykunata shumaq tantiyatsirqayki.
Mikunanpaqpis putsuy putsuymi *manáta kamariparqayki.
Yakunaptin yakutapis kamariparqayki.
21 Chunyaqchöpis chusku chunka (40) wata yanapapaptikimi imapis mana pishirqantsu.
Röpankunapis manami ushakarqantsu.
Ni chakinpis manami shuplurqantsu.
22 “Paykuna tänanpaqmi nacionkunata y markakunata qaykurqayki.
Rey Sehón mandashqan Hesbón nacionta y rey Og mandashqan Basán nacionta qechurkurmi trïbunpa trïbunpa posisionninta qoykurqayki.
23 Bendicionnikiwanmi paykunapita miraqkunapis qoylarkunanöraq tsaytsika karqan.
Unay aylunkunata promitishqayki nacionkunaman tänanpaq yaykatsirqayki.
24 “Tsayman yaykurmi posisionninta chaskipäkurqan.
Tsaycho taq cananeo runakunata vincipäkunanpaqmi yanaparqayki.
Munashqanta rurapäkunanpaqmi tsaycho taq reykunata y markankunatapis paykunapa munayninman churarqayki.
25 Tsaynöpami ali murallashqa markakunamanpis yaykapäkurqan.
Nirkurmi mikuy ali wayuq chakrakunata, imaykayuqpis wayikunata, yaku pözukunata, üva chakrakunata, olïvu huertakunata y wakin frütayuq huertakunatapis qechupäkurqan.
Tsaychömi putsuy putsuy mikuy kaptin werayarqan.
Yanapaptikimi pasaypa kushikur ali kawapäkurqan.
26 “Tsayno yanapaykaptikipis mana wiyakuq karmi contrayki rikakur leynikikunatapis mana cäsukurqantsu.
Tsaymi cäsukushunaykipaq wilakäriptin profëtaykikunatapis wanutsir pasaypa rabyanätsishurqayki.
27 Tsayno kaptinmi contrankunapa munayninman kachaykuptiki pasaypa nakatsipäkurqan.
Lakikur manakamushuptikimi jana patsapita kuyapämurqayki.
Tsaymi contrankunapita salvananpaq akrashqayki runakunata kachamurqayki.
28 Contrankunapita librina karqa yapaymi jutsata rurar rabyanätsishurqayki.
Tsaynöpami yapay kachariykuptiki contrankuna pasaypa nakatsipäkurqan.
Tsayno nakar yapay manakamushuptikimi jana patsapita kuyapämur yaparir yaparir salvarqayki.
29 “Leynikikunata cumplinanpaq yaparir yaparir tantiyaykätsiptikipis paykunaqa chukru shonqu karmi mandamientuykikunata mana cäsukärirqantsu.
Ordenashqaykikunata cäsukur ali kawananta munaptikipis manami cäsukärirqantsu.
Mana wiyakuq kashpanmi nishqaykikunata mana chaskikärirqantsu.
30 “Tsayno kaptinpis atska watami awantarqayki.
Tukuynöpa Espïrituyki yanapaptinmi profëtaykikuna imaykanöpapis tantiyatsirqan.
Tsayno tantiyaykätsiptikipis mana cäsukuq kaptinmi juk lädu nación runakuna kacharirqayki vincipäkunanpaq.
31 Kuyapäkuq karmi lapanta mana ushakätsirqaykitsu ni qonqaykurqaykitsu.
Qamqa ali shonqu y kuyapäkuq Tayta Diosmi kanki.
32 “Tayta Diosnilä, qamqa kanki lapanpaq munayniyuq, mantsakuypaq y poderösumi.
Unay aylükunawan pactuta rurar promitishqaykikunataqa mana qonqaypami imaypis cumplinki.
Tsayno kaykarqa promitishqaykino yanapaykalämay.
Asiria nacionta mandashqan reykuna nakatsishqanpita patsa kananyaqmi nakarkaykä.
Tsaynömi mandamaqnï reykuna, autoridänïkuna, cüräkuna, profëtaykikuna y unay aylükunapis nakapäkurqan.
33 “Noqakuna jutsayuq kaptïpis qamqa ali ruraq karmi ima pasapäkamaptinpis mana kachamarqaykitsu.
34 Mandamaqnï reykuna, autoridäkuna, cürakuna y unay aylükunapis leynikikunata manami cäsukärirqantsu.
Tsaynölami mandamientuykikunata yachatsiptikipis mana chaskikärirqantsu.
Jutsata mana rurapäkunanpaq niykaptikipis manami wiyakärirqantsu.
35 Imaykayuq jatun nacionta munayninman churaykaptikipis manami cäsukushurqaykitsu.
Lapanta kamaripaykaptikipis jutsa ruraykunata manami kacharirqantsu.
36 “Tsayno kashqanpitami kanan noqakuna jukpa munaynincho karkaykä.
Imaykayuqpis kar kushishqa kawapäkunanpaq unay aylükunata qoykushqayki nacionchömi kananqa ashmay karkaykä.
37 Tsaymi juk nacioncho kaykaq reykuna chakrächo wayuqkunata apakärin.
Noqakunata y uywäkunatapis munayninchömi tsararpaykäman.
Jutsata rurashqäpitami tsayno nakapäkunäpaq churapäkamashqanki.
Pasaypami nakarkaykä”.
Tayta Diosta cäsukärinanpaq promitipäkushqan
38 (10.1) *Levitakuna tsayno manakäriptinmi runakuna kayno nipäkurqan: “Tayta Diosta cäsukunantsipaq *pactuta rurar kanan promitishun. Promitishqantsita qelqarkur imaypis cumplinantsipaq mandamaqnintsikuna, levitakuna y cürakuna firmapäkutsun”.