Job
Zofar nishqan
11 Tsaypitanami Naamat partipita shamuq Zofar kayno nirqan:
2 “¿Manatsuraq pilapis upälatsishunkiman?
¿Aläpa parlarku rasun kaqta parlashqaykita yarpanki?
3 ¿Tsayno rimashpaykiku noqakunata upälatsimayta munaykanki?
Tayta Diosta manakaqman churaykaptikipis ¿upälakärinätaku yarpaykanki?
4 “Kikilaykipaqqa yarpashqaykikuna alichari kaykan.
Tsaynöpis alichari kaykan jutsaynaq tukushqayki.
5 ¡Alimi kanman imano kashqaykitapis Tayta Dios nishuptiki!
6 Sasa kaptinpis ¡ima aliraq kanman tantiyakuq kanaykipaq yachatsishuptiki!
Tantiyatsishuptikimi musyankiman jutsata ruraptikipis yanqala castigaykäshushqaykita.
7 “Tayta Dios yarpashqankunata qam ¿musyankimantsuraq?
Lapanpaq munayniyuq Tayta Dios imano kashqanta ¿tantiyankimantsuraq?
8 Pay tantiyashqankunataqa manami imanöpapis tantiyayta atipankitsu.
Jana patsa mayyaq kashqanta mana musyaptintsipis Tayta Diosqa musyanmi.
Wanuqkuna mayman aywashqanta mana musyaptintsipis payqa musyanmi.
9 Kay patsapa kuchun maycho kashqanta mana musyaptintsipis payqa musyanmi.
Lamar mayyaq chayashqanta mana musyaptintsipis payqa musyanmi.
10 “Juzgashunaykipaq Tayta Dios prësu apatsishuptiki manami pipis favorniki sharkuyta puëdinmantsu.
11 Tayta Dios musyanmi pï lulakushqanta y pï jutsata rurashqantapis.
¿Jutsa ruraqta mana castigananpaq kashqantaku yarpanki?
12 Castigaptinpis mana tantiyakuq runaqa manami imaypis tantiyakunqatsu.
Mana tantiyakuq runa tantiyakuptinqa ¡mayparaq intipis jeqanman!
13 “Tayta Dios munashqanno kawanaykipaq yarpachakur,
lapan shonquykiwan payta manakur,
14 jutsa ruraypita witikur
y wayikicho pipis jutsata rurananta mana kachaparqa
15 mana penqakuypa y pitapis mana mantsakuypami kawankiman.
16 Tsaynöpis manami nakankipaqnatsu.
Nakashqaykikunata yarparpis manami lakikunkipaqnatsu.
17 Tsaymi lapan shonquykiwan pasaypa kushikunkipaq.
Lakikuyniki pasariptin patsa waraqnömi shonquykipis atsikyanqa.
18 Tayta Dios ali rikashuptikimi imaypis payman yärakunkipaq.
Tsaynöpis mana mantsakuypami jawka punukunkipaq.
19 Punuptikipis manami imapis mantsakätsishunkipaqtsu.
Atskaqmi amïguyki kayta munar kuyashunkipaq.
20 “Jutsa ruraq runakunataqa manami pipis yanapayta munanqatsu.
Nakaptin pipis manami kuyapanqatsu.
Paykunataqa wanuylami shuyaraykan”.