Job

 2 “Rasunpa tantiyakuq karqa lutankunata manami rimankimantsu.

Shimisapa runalami tsaynöqa parlan.

 3 ¿Yachaq runaqa shimin tarishqanta rimanmantsuraq?

Tsayno parlarqa lutantami parlaykanki.

 4 Tayta Diostapis manami *mantsakunkitsu.

Payta manakaqmanmi churaykanki.

 5 Shonquyki lutanta yarpashqanta rimarmi pitapis lutanta criyiykätsinki.

 6 Manami noqatsu condenaykä, sinöqa kikikipa shimilaykimi condenaykäshunki.

Contralaykipaqmi lapantapis rimaykanki.

7 “¿Adánpitapis mas puntata yurishqaykitaku yarpanki?

¿Jirkakunapis manaraq kaptin kashqaykitaku yarpanki?

 8 ¿Tayta Diostapis tantiyatsishqaykitaku yarpanki?*

¿Kay patsacho japalayki yachaq kashqaykitaku yarpanki?

 9 Manami noqakunapita mas yachaqtsu kanki.

Noqakunaqa lapan musyashqaykitami musyä.

10 Lapanta musyaq awkinkunapis noqakuna yarpashqänömi yarparkaykan.

Taytaykipitapis mas awkin karmi mas tantiyakuq karkaykan.

11 “Tayta Dios shakyaykätsishushqaykitaqa ¿imanirtaq manakaqman churanki?

Noqakuna shumaq parlapaykaptïqa ¿imanirtaq mana chaskikunkitsu?

12 Chaskikunaykipa trukanqa ¿imanirtaq yanayayparaq rabyananki?

¿Imanirtaq rabyashqa törupa nawinno nawikipis saltananraq?

13 ¿Imanirtaq shimiki tarishqanta Tayta Diospa contran rimanki?

14 “Runaqa manami pipis jutsaynaq kantsu.

Runala karmi imaypis jutsayuq kaykantsi.

15 Tayta Diosqa *angilninkunamanpis manami yärakuntsu.

Paypaqqa jana patsapis manami *pürutsu kaykan.

16 Runakunamanqa peorraqmi mana yärakuntsu.

Runaqa jutsasapa karmi yakunaypanöraq jutsa ruraylapaq yarparan.

17 “Kanan wilashqäta shumaq mayamay.

Yachakushqäkunatami kanan wilapäshayki.

18 Tantiyakuq runakuna wilapämaptinmi noqapis yachakushqä.

Tsay tantiyakuq runakunaqa taytanpitami yachakärirqan.

19 Paykunapa taytantami Tayta Dios qoykurqan kay nacionta.

Tsay witsanqa lutan yachatsikuq jäpa runakuna kay nacioncho manami karqantsu.

20 “Jutsa ruraq runakunaqa imaypis nakaylachömi kawapäkun.

Paykunaqa manaraqpis aykälatami ushakanqa.

21 Mantsariypaq kaqkunalatami mayapakärin.

Kushishqa kawarkaykaptinmi suwakuna elaqpita yaykur imaykantapis apakärin.

22 Tsakaypapis mantsa mantsalami puripäkun.

Tsayno kaykaptinpis espädawan wanutsishqami kanqa.

23 Wanuptin wiskulkunami mikunqa.

Wanuypitaqa manami qeshpinqatsu.

24 Tsaymi lakikur pasaypa turwatan.

Rey atacaptin mantsariqnömi mantsa mantsala puripäkun.

25 “Tsaynömi pasan lapanpaq munayniyuq Tayta Diospa contran sharkuqkunata.

26 Paykunaqa escüdunwan tsapakuq ali chölunömi karkaykan.

Kalpanman atiënikushpanmi Tayta Diospa contran sharkapäkun.

27 Werayaylawanmi qaqlanpis lushwayparaq lushwan y pachanpis liwayparaq liwan.

28 “Tsay runakunapataqa markankunatapis ushakätsinqami.

Wayinkunapis chunyaq raqälami rikakunqa.

29 Mayjina ali kawananpaq yarpachakurpis ali kawaytaqa manami tarinqatsu.

Riquëzankunapis ushakanqami.

Chakrankunapis walkalanami kanqa.

30 “Tsay runakunaqa wanuypita manami qeshpinqatsu.

Tsakishqa rämakunata nina ushashqannömi Tayta Dios pükariptilan ushakanqa.

31 Manakaqkunaman yärakur manami imatapis tarinqatsu.

32 Manaraqpis hörancho wanurmi tsaki yöranöla ushakanqa.

33 Üva manaraq poqur marpuykälar ushakashqanno y olïvupa tuktun shushur ushakashqannömi paykunapis ushakanqa.

34 “Diosta mana cäsukuqkunapa tsurinpis manami kanqatsu.

Sobornuta chaskipakuq runakunapataqa wayintapis ninami ushanqa.

35 Tsay runakunaqa jutsa ruraylapaqmi imaypis yarpachakurkaykan.

Pitapis engañanalanpaqmi shonqunchöpis yarpachakurkaykan”.