Job
17 “Shonqüpis ushakaykannami.
Wanuypis janächönami.
Pampakunäpaq sepultürapis uchkuraykannami.
2 Manakaqman churamaq runakunalami nawpächo karkaykan.
Tsakaypapis junaqpapis rabyanätsimanmi.
3 “Tayta Dios, noqapa favornï sharkuykulay.
Qam mana yanapamaptikiqa ¿piraq yanapamanqa?
4 Chikimaqnïkuna manakaqman churamänanpaq yarpayta qoshqa karpis vincimänanta ama kachapaykulaytsu.
5 Tsay runakunaqa päguta chaskinan raykumi amïgunpa contran sharkun.
Tsurinkuna muchuycho kaykaqtami rikapäkunqa.
6 “Tayta Dios munaptinmi pïmaypis conträ rimapäkun.
Tsaynölami qaqlämanpis toqapäman.
7 Nanaywan waqaptïmi nawïpis tsakarpunna.
Uyutaptïmi custilläkunapis yupariylapaqna kaykan.
8 “Tsayno kaykashqäta rikamarmi ali runakunaqa espantashqa rikakun.
Jutsayuq runakuna conträ sharkuptinmi rabyakärin.
9 Tsayno rabyakurpis ali runakunaqa imaypis alilatami rurapäkun.
Manakaqman churaptinpis mana ajayaypami alita rurapäkun.
10 “Lapayki yachaq tukuqkuna, shapäkamuy tapunakunantsipaq.
Imaykata rimarpis manami juknilaykipis rasunpa yachaq kankitsu.
11 “Manaraqpis aykälatami wanukushaq.
Imata ruranäpaqpis yarpachakuykashqalächömi ushakäshaq.
12 “Qamkunaqa mana ali kaqtapis ali kashqantami nirkaykanki.
Yanawyayparaq tsakaykaptinpis ‘patsa atsikyaykanna’ niqnömi karkaykanki.
13 “Noqataqa wanuylanami shuyaraykäman.
Yanawyaykaq tsakaylanami wayïpis kanqa.
14 Sepultürami papänï kanqa.
Kurukunanami mamä y panï kanqa.
15 Tsawraqa ali kawayta munashqäpis manakaqlapaqmi kanqa.
Tsayno kaptinqa ¿imapaqnataq imata ruranäpaqpis yarpachakushaq?
16 Wanukuptïqa lapan yarpashqäkunapis manakaqlapaqmi kanqa.
Alpalamanmi lapantsipis tikrashunpaq”.