Job
Zofar yapay nishqan
20 Tsaypitanami Naamat partipita shamuq Zofar kayno nirqan:
2 “Rimashqaykita mayar manami upälakümantsu.
3 Qam rimashqaykiqa pasaypa rabyanaypaqmi.
Tsaymi shumaq tantiyakurir kanan nishayki.
4 “Qam musyankimi runata Tayta Dios kamashqanpita patsa 5 jutsata ruraqkuna ali kawarpis ushakaqla kashqanta.
Jutsa ruraq runaqa rätulami kushikun.
6 Tsay runaqa Tayta Diosno kashqanta yarparmi runa tukun.
7 Tsayno runa tukurpis kikinpa ishpayninnömi ushakanqa.
Tsaymi amïgunkunapis kayno nipäkunqa: ‘¡Wawalaw, payta imataq pasashqa!’*
8 “Tsay runa sueñuychönöla ushakaptinmi pipis mana tarinqatsu.
Sueñushqanta runa qonqashqannömi paytapis qonqaykärinqa.
9 Payta reqiqkunapis ni aylunkunapis manami imaypis rikanqanatsu.
10 Waktsakunapa jaqan kashqantapis tsurinkunaraqmi pägapakunqa.
Suwakushqantapis paykunaraqmi kutitsipakunqa.
11 Mözularaq kaykashqanchömi kalpasapa karpis ushakanqa.
Wanur alpamanmi tikranqa.
12 “Tsay runaqa ali mikuyta mishkila mikur kushikushqannömi jutsata rurar kushikun.
13 Mishkita shoqur mana kachayta munashqannömi jutsa ruraytapis kachariyta munantsu.
14 Tsayno jutsata rurashqanmi warantinkunaqa culebrapa venënunno kanqa.
15 Riquëzata shuntashqankunatapis Tayta Diosmi ushakätsinqa.
16 “Jutsa ruraq runaqa culebrapa venënunta shoquqno karmi wanunqa.
17 Tsaymi shuntayta mana atipashqanyaq mikuy ali wayuptinpis imatapis mana probichanqatsu.
18 Lapan shuntashqankunapis manakaqlapaqmi kanqa.
19 “Jutsa ruraq runaqa waktsakunata wayinpita qarqurmi imaykankunatapis apakun.
20 Tsayno rurarpis manami contentakuntsu.
Tsaymi imatapis munashqan kaqtaqa imaykanöpapis tarin.
21 Pasaypa codiciösu karmi lapan tarishqanta kikilanpaq shuntan.
Tsayno shuntashqankunapis lapanmi ushakanqapaq.
22 Mayjina rïcu karpis manami kushishqa kawanqatsu.
Paytaqa imayka desgraciapis pasanqami.
23 “Ambiciösu kaptinmi Tayta Dios pasaypa rabyakushpan mana kuyapaypa castiganqa.
24 Fiërru espädapita qeshpiptinpis bronci flëchawanmi wanutsipäkunqa.
25 Tsay flëchakunami waqtanpa yaykur natinninpa pasanqa.
Tsaynömi mantsariypaq castïgu payman chayanqa.
26 Tsay runapaqa imaykankunapis ushakanqami.
Ninata pipis mana rataykätsiptinmi wayintinta rupar ushanqa.
27 “Tsay runataqa jutsa rurashqankunapita jana patsami careanqa.
Tsaynölami kay patsapis lutan rurashqankunata careanqa.
28 Tsaynöpis Tayta Dios fiyupa rabyashpanmi castiganqa.
Loqla imaykatapis apar ushashqannömi tsay runapa wayinkunata y imaykankunatapis ushakätsinqa.
29 Jutsa ruraq runata tsayno castigananpaqmi Tayta Dios destinashqa”.