Job

 2 “Kananpis jaqayashqalami yapay rimashaq.

Tayta Dios castigamaptinmi lakishqa kaykä.

 3 ¡Imanöparaq musyayküman Tayta Dios maycho kaykashqantapis!

Musyarqa imanöpapis tsayman chayaykümanmi.

 4 Chayaykurqa lapan yarpashqäkunatachari wiläman.

Tsaynöpis imapita nakatsimashqantachari tapüman.

 5 Pay tantiyatsimaptinqa tantiyämanchari.

 6 Mantsakätsimänanpa trukanqa shumaqchari tantiyatsimanman.

 7 Jutsaynaq runataqa manami castiganmantsu.

Tsaymi noqatapis jutsaynaq kashqäta nimanman.

8 “Itsanqa inti jeqamunan kaq lädupa ashirpis Tayta Diosta manami tarïtsu.

Inti jeqanan kaq lädupa aywarpis manami rikätsu.

 9 Norti kaq lädupa ni sur kaq lädupa ashirpis manami tarïtsu.

10 Paymi itsanqa musyaykan maycho kaykashqäta y imata ruraykashqätapis.

Qoripa qanranta ninawan tsulutsiypa jorquptin *püru kashqannömi noqapis nakaykunawan nakatsimaptin jutsaynaqna kashaq.

11 Noqaqa pay munashqannömi kawaykä.

Lapan yätsimashqantami cäsukuykä.

12 Leyninkunataqa imaypis cumplishqämi.

Nishqankunataqa waran waranmi shonqücho yarparaykä.

13 “Tayta Diosqa yarpashqantami imatapis ruran.

Pay mandaptinqa manami pipis tsapata churapantsu.

14 Yarpashqannöchari imano kanäpaqpis kamakätsinqa.

Munashqannöchari lapanpis kanqa.

15 Paypa nawpancho karmi pasaypa mantsakü.

Tsaykunata yarparmi fiyupa siksikyä.

16 Tayta Dios castigamaptinmi valornïpis mana kannatsu.

Lapanpaq munayniyuq Tayta Diosmi fiyupa mantsakätsiman.

17 Alimi kanman yanawyaykaq tsakay tsapakarkamaptin.

Alimi kanman mankapa sikinno tsakay nitikarpamaptin.