Job

41 (40.25) “Mantsakuypaq Leviatán waräkuyta* ¿anzuëluwan tsarinkimantsuraq?

¿Qallunta waskawan watankimantsuraq?

 2 (40.26) ¿Waskawan senqanpita shequnkimantsuraq?

¿Anzuëluwan tsakalwanta uchkunkimantsuraq?

3 (40.27) “Ruwakushushpayki Leviatán ¿qamman qonqurpakamunmantsuraq?

¿Ali shimilanpatsuraq kuyapänaykita munar manakushunkiman?

 4 (40.28) Ashmayno imayyaqpis sirvishunaykipaq ¿qamwan *pactuta ruranmantsuraq?

 5 (40.29) ¿Pushapa pishquwan puklashqaykinötsuraq Leviatanwan puklankiman?

¿Wamraykikuna puklananpaq watapaykunkimantsuraq?

6 (40.30) “Leviatanta ¿pilaqa mercäducho rantikunmantsuraq?

Tsaynöpis rantikunaykipaq ¿aytsanta cuartutsankimantsuraq?

 7 (40.31) ¿Flëcharpis qaranta pasatsinkimantsuraq?

Lanzarpis ¿umanta tuksinkimantsuraq?

8 (40.32) “Musyaykunaykipaq maski yataylapis yataykuy.

Yataykushqalaykitachari musyankimanqa.

Tsawraqa manami imaypis rimapankipaqnatsu.

9 (1) “Leviatanta tsariyta munarpis manami kamäpakunkipaqtsu.

Payta rikaqtaqa pïmaytapis atäqui tsarinmanmi.

10 (2) Manami pipis paytaqa punuykaqta rikchatsintsu.

“Leviatanlatapis ichipayta mana kamäpakuykarqa ¿piraq noqata ichipämanman?

11 (3) Mandamänanpaq ¿piraq munayniyuq kanman?

Lapanpis noqalapa kaykaptinqa manami pipis imatapis kamaripämanmantsu.

12 (4) “Leviatanpa chakinkuna imano kashqanta y kalpasapa kashqantaqa imaypis parlaykäshaqmi.

13 (5) Pishtar ¿piraq qaranta jorqunman?

Aläpa chukru kaptin manami pipis kutsuyta kamäpakunmantsu.

14 (6) Kirunpis tsayjinanpa mantsariypaq kaykaptinqa ¿piraq senqantapis amirkunman?

15 (7) Waqtanpis pasaypa chukru ruminömi kaykan.

16 (8) Atska escüdu laqanakushqano kaptinmi wayrapis mana pasantsu.

17 (9) Tsayno kaptinmi imapis kichayta puëdintsu.

18 (10) “Jächisyaptinqa* elquynöraqmi senqanpita yarqamun.

Nawinkunapis inti jeqamuqnöraqmi atsikyan.

19 (11) Shiminpitami ninapis y chispapis yarqamun.

20 (12) Manka timpuptin wapuy yarqushqannömi senqanpitapis qoshtay yarqun.

21 (13) Jämayninqa ninatapis ratatsinmi.

Shiminpitapis bunyaypa bunyarmi nina yarqun.

22 (14) “Kunkan kalpasapa kaptinmi lapanpis fiyupa mantsakärin.

23 (15) Cuerpuncho mas llampu kaq aytsanpis fiërruno chukru kaptinmi imapis mana yaykuntsu.

24 (16) Shonqunpis mulinu ruminömi chukru kaykan.

25 (17) “Leviatán kuyupakuptinqa munayniyuq runakunapis pasaypa mantsakärishpanmi qeshpir aywakärin.

26 (18) Espädawan tuksirpis manami mayakätsintsu

Lanzapis y flëchapis tsay waräkuytaqa manami imananpistsu.

27 (19) Fiërruwan takaptinpis tsay waräkuypaqqa oqshanölami kaykan.

Bronciwan wiruptinpis ismushqa qerunölami jananman chayan.

28 (20) Flëchaptinpis manami qeshpintsu.

Runakuna warakashqanpis panqanölami chayan.

29 (21) Jatun mäsuwan takaptinpis manami nanätsikuntsu.

Lanzawan tuksiptinpis manami cäsupantsu.

31 (23) “Lamarpa aywarpis yakuta pulchaqyätsirmi mankacho yaku timpur poqashashqantanöraq poqashätsin.

32 (24) Aywaptin qepanpaqa yakupis pasaypa yoraqmi rikakun.

Lamarpis yoraq bayëta majaraqnöraqmi rikakan.

33 (25) “Leviatanmanqa manami ima uywapis kay patsacho tinkuntsu.

Leviatanqa manami imatapis mantsakuntsu.

34 (26) Mas munayniyuq uywa mayinkunatapis manakaqmanmi churan.

Lapan fiyu uywakunapitapis mas kalpayuqmi kaykan”.