Job
Job nishqan
6 Tsayno niptinmi Job kayno nirqan:
2 “Nakashqäta y desgracia pasamashqanta shuntarkur balanzawan pësaptïqa 3 lamar kuchuncho aquyshapitapis masmi lasanman.
Pasaypa nakar capazchari lutantapis parlaykushqä.
4 Lapanpaq munayniyuq Tayta Dios nakatsimashqanqa venënuyuq flëchawan tuksimashqannömi nanaykäman.*
Pasaypa mantsariypaqmi nakaykä.*
5 “Qewan kaptinqa bürrupis manami jächinyantsu.
Mikunanpaq kaptinqa törupis manami müyantsu.
Tsaynölami noqapis mana nakarqa imatapis parlakümantsu.
6 “Qam nimashqaykiqa kachiynaq mikuyno y runtupa yoraqninno qamyaqmi kaykan.
7 Imaypis nakayta mana munashqäkunawanmi kananqa waran waran nakaykä.
8 “¡Alimi kanman manakushqäno Tayta Dios jukla ushakätsimaptin!
9 ¡Alimi kanman Tayta Dios jukla elqätsimaptin!
10 Fiyupa nakarpis Tayta Dios nishqankunataqa imaypis cäsukushqämi.
Tsaypitami kushikü.
11 Nakayta awantanäpaq valornïpis manami kannatsu.
¿Imatanataq shuyaräshaq?
12 Noqaqa manami qaqanötsu ni broncinötsu mana sientiq kä.
13 Manami valornïpis kantsu.
Yanapamänanpaq manami pïnïpis kantsu.
14 “Lapanpaq munayniyuq Tayta Diosta mana *mantsakuptinpis nakaycho kaykaq amïguntsitaqa kuyapashwanmi.
15 Qamkunaqa amïgü kaykarpis kuyapäkuyta manami yachankitsu.
Raqrapa atska yaku yurirkamur rasla pasariqnömi karkaykanki.
16 Raju tsuluptin yaku bunyaypa bunyar aywaqnömi 17 y usya witsan tsaki raqranömi karkaykanki.
18 Noqaqa chunyaq tsaki jirkacho yakuta ashir oqrakashqanömi kaykä.
19 Temánpita y Sabápita negociantikuna tsaki jirkapa aywar yakuta ashiqnömi kaykä.
20 Raqracho yakuta mana tarirmi fiyupa lakikärin.
21 Tsaynölami noqapis fiyupa lakikü mana shakyätsimaptiki.
Nakaykashqäta rikaykamar shakyätsimänaykipa trukanqa mantsakar manakaqkunatami parlashqanki.
22 “Rabyanänaykipaqqa qamkunata manami imatapis manakushqätsu.
Qellaywan yanapamänaykipaqpis manami ruwakushqätsu.
23 Chikimaqnïkunapita salvamänaykipaqpis manami manakushqätsu.
Fiyu runakunapa makinpita jorqamänaykipaqpis manami ruwakushqätsu.
24 “Ima jutsata rurashqätapis mä tantiyatsimay.
Tantiyatsimaptikiqa upälakushaqmi.
25 Jutsa rurashqäta nimashqayki rasunpa kaptinqa penqakurmi upälaküman.
Manakaqkunata jitapämarmi itsanqa rabyanätsimanki.
26 Capazchari aläpa nakar lutantapis parlashqä.
Lutanta parlashqa kaptïqa perdonaykalämay.
Perdonamänaykipa trukanqa ¿imanirtaq manakaqta jitaparkaykämanki?
27 Tsayno karqa waktsata wanutsinanpaqpis nipäkunkimanmi.
Kuyanakushqayki amïguykitapis kacharinkimanmi.
28 “Shumaq yarpachakurqa tantiyapäkunkimanmi lapan nishqäkuna rasunpa kashqanta.
29 Noqaqa manami ima jutsatapis rurashqätsu.
¿Imanirtaq yarpapäkunki jutsata rurashqäpita nakaykashqäta?
30 ¿Lulapaykashqätaku yarpapäkunki?
¿Ali kashqanta o mana ali kashqanta manana tantiyashqätaku yarpapäkunki?”