Salmos

Jerusalén markata ali rikananpaq Tayta Diosta manakushqan

Kay salmuqa Jerusalénman aywaqkuna alabananpaqmi kaykan. David qelqashqan.

122 “TAYTA DIOSPA wayinman aku aywashun” nimaptin pasaypami kushikü.

2 ¡Jerusalén, punkuykipami yaykapäkamushqä!

3 Lapanï juntakänäpaq Jerusalén marka ali sharkatsishqami kaykan.

4 Jerusalénmanmi Israel runakuna trïbunpa trïbunpa witsämun.

TAYTA DIOS ordenashqannölami alabapäkunanpaq witsämun.

5 Jerusalénchömi Davidpita miraq runakuna ali mandapäkun.

6 Tayta Diosta manakushun Jerusaléncho runakuna ali kawapäkunanpaq.

Jerusalén, kuyashuqniki runakuna ali kawaykulätsun.

7 Murällayki rurincho taqkuna kushishqa kawaykulätsun.

Palaciuykicho taqkunapis jawkala kawaykulätsun.

8 Aylükuna rayku y amïgükuna raykumi kayno nï:

“¡Qam kaqcho taqkuna lapanpis ali kawaykulätsun!”

9 TAYTA DIOSNINTSIPA wayin raykumi qamcho ali kawapäkunanpaq imaypis manakushaq.