Salmos

148 ¡Aleluya!

Jana patsacho kaqkuna, TAYTA DIOSTA alabapäkuy.

 2 *Angilkuna, lapayki alabapäkuy.

Guërracho pelyaq angilkuna, lapayki alabapäkuy.

 3 Intipis y killapis, alabapäkuy.

Atsikyaq qoylarkuna, lapayki alabapäkuy.

 4 Mas altucho kaq ciëlupis, payta alabay.

Ciëlu janancho kaykaq yakupis, payta alabay.

 5 TAYTA DIOS alabashqa kaykulätsun.

Pay niptilanmi lapanpis rurakarqan.

 6 Tayta Dios kamashqankunaqa manami ushakanqatsu.

Pay nishqankunataqa manami pipis trukatsinqatsu.

 7 Kay patsacho kaqkuna, TAYTA DIOSTA alabapäkuy.

Lamarcho mantsariypaq pescädukuna y tsaycho lapan kaqkunapis, alabapäkuy.

 8 Räyupis, runtu tamyapis, rashtapis y pukutaypis, alabapäkuy.

Tayta Dios munashqanta ruraq löcu wayrapis, alabay.

 9 Puntakunapis, jirkakunapis, wayuq yörakunapis y cedrukunapis, alabapäkuy.

10 Manshu uywakunapis, chucaru uywakunapis, lätaypa puriqkunapis y pishqukunapis, alabapäkuy.

11 Kay patsacho reykunapis, lapan nacioncho taq runakunapis, munayniyuq runakunapis y autoridäkunapis, alabapäkuy.

12 Mözukunapis, jipashkunapis, awkinkunapis, wamrakunapis, 13 TAYTA DIOSTA alabapäkuy.

Paymanqa manami pipis tinkuntsu.

Kay patsacho kaqkunapitapis y jana patsacho kaqkunapitapis mas munayniyuqmi kaykan.

14 Paymi kuyashqan runakunata imaypis yanapan.

Pay munashqanno kawaq Israel runakuna, lapayki alabaykulay.

¡Aleluya!