Salmos

17 (1b) TAYTA DIOS, manakushqäta mayaykalämay.

Qayakamushqäta chaskiykalämay.

Ruwakamushqäta wiyaykalämay.

Lapan shonqüwanmi qamta manakamü.

 2 Qam musyankimi imano kawashqätapis.

Tsaymi manakamü favornï sharkunaykipaq.

 3 Junaqpapis tsakaypapis shonqü imata yarpashqantapis musyaykankimi.

Jutsa rurashqäta ashirpis manami tarishqankitsu.*

Manami imaypis lutankunata parlashqätsu.

 4 Mandamientuykikunata cäsukurmi runakuna lutankunata ruraptinpis lutankunata mana rurashqätsu.

 5 Tantiyatsimashqaykinömi imaypis kawashqä.

Nishqaykikunata imaypis cäsukushqämi.

 6 Manakamushqätaqa imaypis mayaykämankimi, Tayta.

Tsayta musyarmi qamta imaypis manakamü.

Ruwakamushqäta mayar yanapaykalämay.

 7 Lapan shonqunwan yärakushuqniki runataqa contrankunapita salvankimi.

Kuyamashqaykita tantiyanäpaq noqatapis salvaykalämay.

 8 Nawi nïñuykitano imapitapis tsapaykalämay.

Chipshanta älan rurinman walpa pakashqanno noqatapis pakaykalämay.*

 9 Fiyu runakunapa makinpita tsapaykalämay.

Conträkuna jiruruypa tsapämaptinpis salvaykalämay.

10 Conträ runakunaqa mana kuyapäkuqmi karkaykan.

Runa tukushpanmi imatapis parlarkaykan.

11 Maypa aywaptïpis rikaraykämanmi.

Imatapis manakaqta jitapämänanpaqmi ashirkaykan.

12 Leonno pakakuykurmi pitapis wanutsinanpaq shuyarpaykan.

13 TAYTA DIOS, tsay fiyu runakunata castigaykulay.

Qonqurninkunatapis tumariykatsilay.

Espädaykiwan salvaykalämay.

14 Munaynikiwan tsapaykalämay.

Tsay runakunata kay patsapita elqaykatsilay.

Paykunapa herencianqa kay patsacho kaqkunalami kaykan.

Paykunaqa rïcuyarpis jina rïcuyätsun.

Wamrankunapis empachashqanyaq mikutsun.

Wilkankunapaqpis putsuy putsuy katsun.

15 Noqami itsanqa nawpaykiman chayamushaq.*

Qamta rikashpämi kushikushaqpaq.