Salmos
Tayta Diosta manakushqan
(1) Kay salmuta David qelqarqan tsurin Absalónpita qeshpishqan witsanmi.*
3 (2) TAYTA DIOS, atska runakunami conträ sharkurkaykan.
Tsaytsikami chikirkaykäman.
2 (3) Paykunami noqapaq kayno nirkaykan:
“Paytaqa Tayta Dios manami salvanqatsu”. Selah
3 (4) Tsayno nipäkuptinpis tsapämänaykipaq kikikimi escüdü kaykanki.
Qammi kushikatsimaqnï kaykanki.
Qammi shakyätsimaqnï kaykanki.
4 (5) Lapan shonqüwan manakamuptï *sagrädu jirkannikipita patsami* contestamanki. Selah
5 (6) TAYTA DIOS ali rikamaptinmi jawka punukü y kushishqa wararküpis.*
6 (7) Conträkuna wanutsimänanpaq tsaytsika shamuptinpis manami mantsakushaqtsu.
7 (8) TAYTA DIOS, yanapaykalämay.
Conträ runakunapita tsapaykalämay.
Qaqlancho laqyaykulay.
Jutsa ruraq runakunapa kiruntapis jakapatano takaykulay.
8 (9) TAYTA DIOS, qamlami salvakuq kaykanki.
Kuyashqayki runakunata bendicionnikita qoykulay. Selah