Salmos
Salvananpaq Tayta Diosta manakushqan
(1-2) Cantaqkunapa mandaqninpaqmi. Cuerdayuq instrumentuta tukar cantapäkunki. Zif runakuna Saúl kaqman aywaykur paykuna tashqan läducho David pakakushqanta wilarkuptinmi kay salmuta David qelqarqan.*
54 (3) Tayta Dios, pïmaypis jutikita joqarinanpaq salvaykalämay.
Munaynikiwan tsapaykalämay.
2 (4) Manakamushqäta mayaykalämay.
Nishqäkunata wiyaykalämay.
3 (5) Jäpa runakunami conträ rikakushqa.
Fiyu runakunami wanutsimayta munaykäman.
Tsay runakunaqa manami qamtapis mantsakushunkitsu.* Selah
4 (6) Tsayno kaptinpis mana kachaypami yanapaykämanki.
Yanapamaptikimi kawaykäraq.
5 (7) Nakatsimashqanpita chikimaqnïkunatapis nakaykatsilay.
Promitimashqaykita cumplishpayki tsay runakunata ushakaykatsilay.
6 (8) Lapan voluntänïwanmi sacrificiupaq uywata apamushaq.
TAYTA DIOS, alilata ruraq kashqaykipitami jutikita joqarir alabashaykipaq.
7 (9) Tsayno alabashayki lapan lakikuypita jorqamashqaykipitami.
Kikïmi rikashaq conträkunata ushakätsishqaykita.