Salmos

72 (1b) Tayta Dios, reyta yanapaykulay munashqaykino mandananpaq.

Tantiyaykatsilay mana jananpaypa pïmaytapis juzgananpaq.

 2 Tsayno yanapaptikimi kuyashqayki runakunata ali mandanqapaq.

Waktsakuna quejakushqantapis shumaqmi arreglanqapaq.

 3 Tsaymi may jirkacho taqkunapis jawka kawapäkunqapaq.

 4 Yanapaptikimi waktsakunapa favornin sharkunqa, pishipakuqkunapa tsurinkunata salvanqa y nakatsiqkunata ushakätsinqa.

 5 Mandaq reyqa imayyaqpis kawaykulätsun.*

Intipis y killapis mana ushakaq kashqanno mandaq kashqanpis ushakaykulätsuntsu.

 6 Mikuypaq y qewapaq tamyapis shulyapis bendición kashqanno pïmaypaqpis bendición kaykulätsun.

 7 Ali mandaptin lapanpis jawka kawaykulätsun.

Jana patsacho killa ushakashqanyaq imayyaqpis mandaykulätsun.

 8 Lamarpa kuchunpita jukaq kuchunyaq mandaykulätsun.

Éufrates mayupita kay patsapa kuchunkunayaq mandaykulätsun.*

 9 Chunyaq jirkacho taq contrankunapis nawpanman qonqurpakäritsun.

10 Maytsay nacionpitapis reykuna shamur qaraykunata* apapäkamutsun.

Tarsis nacionpita, lamar tsimpancho kaykaq nacionkunapita, Sabá nacionpita y Seba nacionpitapis regälukunata apakurkur shapäkamutsun.

11 Lapan reykuna nawpanman qonqurpakutsun.

Lapan nacioncho taq runakunapis payta sirvipäkutsun.

12 Reyqa waktsakuna manakuptin yanapanqami.

Pïninpis mana kaqkunapa favorninmi sharkunqa.

13 Humildikunataqa kuyapanqami.

Waktsakunataqa wanuypitapis tsapanqami.

14 Nakatsiq runakunapa makinpitapis jorqunqami.

Maqakuq runakunapitapis salvanqami.

Nakaycho kaq runakunataqa pasaypami kuyan.

15 Reyqa atska wata kawaykulätsun.

Sabá nacionpita qorita apapämutsun.

Imaypis paypaq Tayta Diosta manakäritsun.

Paytaqa pïmaypis alabatsun.

16 Mandashqan nacioncho trïgu shumaq wayuykulätsun.

Intëru jirkakunachöpis kichkiyparaq kaykulätsun.

Líbanuchönöraq loqyuypa loqyur winaykulätsun.

Runakunapis jachakunanöraq atskaman mirapäkutsun.

17 Mandaq rey alita rurashqankunata imaypis yarparätsun.

Ali rey kashqanta pipis ama qonqatsuntsu.

Lapan nacionkunapis paypita bendicionta chaskiykulätsun.

Maytsaychöpis payta alabapäkutsun.

18 Israel runakunata kuyaq TAYTA DIOS alabashqa kaykulätsun.

Paylami imaykatapis espantaypaq kaqkunata ruran.

19 Imayyaqpis alabashqa kaykulätsun.

Munayniyuq kashqanta intëru kay patsacho pïmaypis musyaykulätsun.

¡Amén! ¡Tsayno katsun!