Salmos
Jerusalén markata Tayta Dios kuyashqan
(1a) Kay salmutaqa cantanantsipaqmi Corépita miraqkuna qelqarqan.
87 (1b) *Sagrädu jirkanchömi markanta Tayta Dios sharkatsishqa.
2 *Sióntami TAYTA DIOS kuyan.
Israel nacioncho kaykaq wakin markakunapitapis masmi kuyan.
3 Tayta Diospa markan, qampaqqa ali marka kashqaykitami pïmaypis rimapäkun. Selah
4 Wakin markakunapaqpis Tayta Dios kaynömi nin:
“Egipto runakuna y Babilonia runakuna cäsukamanqami.
Filisteo runakuna, Tiro runakuna y Etiopía runakunapis chaskikamanqami.
Paykunapis Sióncho yuriq runanölami kanqa”.
5 Tsaymi kayno nipäkunqa: “Taqay runa Sióncho yuriq runanömi kaykan”.
Poderniyuq Tayta Diosmi Sión runakunata yanapan.
6 Jutinkunata libruman apuntarmi kayno nir qelqanqa:
“Kay runaqa Sióncho yuriqnömi kaykan”. Selah
7 Paykunaqa cantashpan y danzashpanmi kayno nipäkunqa:
“Noqapa markäqa Siónmi kaykan”.