Éxodo
Egiptucho Israel runakuna mirapäkushqan
1 Egiptuman Jacob aywakuptinmi lapan tsurinkunapis warminkunawan y tsurinkunawan aywakärirqan. Jacobpa tsurinkunapa jutinkunami karqan 2 Rubén, Simeón, Leví, Judá, 3 Isacar, Zabulón, Benjamín, 4 Dan, Neftalí, Gad y Aser. 5 Tsurinkunawan y wilkankunawanmi Jacobqa Egiptuman qanchis chunka (70) chayarqan.* Tsurin Josémi itsanqa Egiptuchöna kaykarqan.*
6 Tsaychömi Josépis, wawqinkunapis y paykunawan aywaqkunapis wanurqan. 7 Paykunapa tsurinkunapita miraqkunami tsaytsikaman mirapäkurqan.
Egiptucho Israel runakuna nakashqan
8 Tsaypitaqa Egiptucho rey kananpaq juknami yaykurqan. Tsay reyqa José pï kashqantapis manami musyarqantsu. Tsaymi Egipto runakunata kayno nirqan: 9 “Tantiyakushun, taytakuna. Israel runakunaqa aläpa mirarmi noqantsipitapis masna karkaykan. 10 Tsayno mana mirapäkunanpaq imalatapis rurashun. Tsaynöla mirarqa contrantsikunaman talukaykur tikrapämaptintsi vinciyta manami kamäpakushuntsu. Vincirkamashpantsimi qeshpir kaypita aywakärinqapaq”.*
11 Tsayno wilanakurkurmi capatazkunata churapäkurqan Israel runakunata maqa maqarkur arutsinanpaq. Tsayno arutsirmi Pitón y Ramesés markakunata sharkatsipäkurqan. Tsay markakunachömi karqan Faraónpa* mikuy churakunan wayikuna. 12 Fiyupa nakatsiptinpis Israel runakunaqa masraqmi mirapäkurqan. Tsayno miraptinmi Egipto runakuna fiyupa mantsakurqan. 13 Tsaymi mas sasa aruykunachöna arutsirqan. 14 Fiyupami nakatsirqan mituta jarutsir, adöbita ruratsir y chakrankunacho arutsir. Lapan aruychömi Israel runakunata aläpa nakatsipäkurqan.
15 Tsaynöpis Egipto nacionpa mandaqnin rey qayatsirqan Sifrata y Fúata. Paykunaqa hebrea warmikunapa partërankunami karqan. Paykunata qayaykatsirmi kayno nirqan: 16 “Hebrea warmikuna wachakuptin aywar rikanki wawan olqu kashqanta o warmi kashqantapis. Olqu kaptinqa jukla wanutsinki. Warmi kaptinqa ama wanutsinkitsu”.
17 Tsayno niykaptinpis partërakunaqa Tayta Diosta *mantsakur manami Egipto nacionpa mandaqnin rey nishqanta rurarqantsu. Tsaymi olqu yuriptinpis mana wanutsirqantsu. 18 Tsayta musyaykurmi Egipto nacionpa mandaqnin rey yapay qayaykatsir partërakunata kayno nirqan: “¿Imanirtaq olqu yuriqkunata mana wanutsinkitsu?”
19 Tsayno niptinmi kayno nipäkurqan: “Hebrea warmikunaqa manami Egipto warmikunanötsu, tayta. Tsay warmikunaqa manaraq chayaptïmi yuripakun”.
20 Tsaynöpami Israel runakuna mas atskaman mirashpan mantsakuypaq rikakärirqan. 21 Tayta Diosta mantsakur olqu yuriqkunata mana wanutsishqanpitami partërakunapa aylunkunatapis Tayta Dios ali rikarqan atskaman mirananpaq.
22 Tsaymi lapan Egipto runakunata Faraón kayno nirqan: “Hebreo runakunapa olqu tsurin yuriptinqa lapanta mayuman jitarpunki. Warmi yuriptinqa ama wanutsinkitsu”.*