Éxodo
Sagrädu Tolduta ruratsinanpaq y ofrendata shuntananpaq tantiyatsishqan
25 Sinaí jirkacho kaykaptinmi Moisésta TAYTA DIOS kayno nirqan: 2 “Israel runakunata ninki ofrendata noqapaq apapäkamunanpaq. Ofrendata churayta munaqkunaqa lapan shonqunwan apapäkamunqa 3 qorita, qellayta, broncita, 4 azul, granäti y puka milwa hïlukunata, llanula putskashqa lïnu hïluta y cabrapa aqtsanpita putskashqa hïlutapis. 5 Tsaynöpis apapäkamunqa pukaman tinishqa uysha pirqashta, fïnu qarata, acacia qeruta, 6 candelabru ratananpaq aceitita, *sagrädu aceitiman y inciensuman takutsinanpaq perfümita,* 7 ónice rumikunata y wakin kuyaylapaq rumikunatapis. Tsay rumikunaqa kanqa mandaq cürapa *efodninta y pechëranta* adornananpaqmi.
8 “Tsay ofrendata apamushqankunawan *Sagrädu Tolduta ruratsinki. Tsaynöpami paykuna tashqancho imaypis täshaqpaq. 9 Tsay tänäpaq Sagrädu Tolduta y manëjunkunatapis ruratsinaykipaqmi rikatsishayki. Rikashqaykinöla lapanta ruratsinki.
Pactu Babulta ruratsinanpaq tantiyatsishqan
10 “Acacia qerupita ruratsinki juk babulta. Tsay babulpa largun kanqa juk metru chunka centïmetru. Anchun y altunpis kanqa soqta chunka pitsqa (65) centïmetru. 11 Jananpa y rurinpa qoriwan enchapatsinki. Tsaynöpis intëru kuchunpa qoripita rebëtinta rurarkur jiruruq churatsinki. 12 Qoripita chusku argöllata rurarkatsir churatsinki chuskun chakinkunaman, ishkayta babulpa jukaq lädunman y ishkaytana babulpa jukaq lädunman. 13 Acacia qerupita ishkay largu qeruta rurarkatsir qoriwan enchapatsinki. 14 Nirkur tsay qerukunata argölla uchkunpa pasatsinki babulta wintupäkunanpaq. 15 Tsay qerukunata pasatsishqaykiqa jinalanchöna kakunqa. Tsaypita amana jorqutsinkitsu. 16 Tsay babulmanqa churanki *pactu rurashqantsita cumplinaykipaq kaq mandamientukunata.
17 “*Babulpa tsapananta qori pürupita ruratsinki. Largun kanqa juk metru chunka centïmetru. Anchun kanqa soqta chunka pitsqa (65) centïmetru. 18 Tsaynöla martilluwan takaylapa ishkay *querubinkunata qoripita ruratsinki. Nirkurna babulpa tsapanan ishkan kuchunman churatsinki. 19 Tsapananta y querubinkunataqa ruratsinki tsay piëzalatami. Jukaq querubín kanqa itsuq kaq läduncho y jukaqnami kanqa alawqa kaq läduncho. 20 Tsay ishkan querubinkunami älankuna mashtashqa frenti frenti babulpa tsapananta rikarpaykanqa. Tsaynöpami ishkanpa älankuna tsapananta lantupanqa. 21 Babul rurinman pactu rurashqantsi mandamientukunata churaykur tsapananwan tsapanki. 22 *Pactu Babulpa tsapanan janancho ishkay querubinkuna chawpinpitami qamta wilashayki Israel runakunata imata ninaykipaq kaqtapis.
Tanta churakuna mësata ruratsinanpaq tantiyatsishqan
23 “Tsaynöpis acacia qerupita mësata ruratsinki. Tsay mësapa largunmi kanqa isqun chunka (90) centïmetru. Anchunnami kanqa chusku chunka pitsqa (45) centïmetru. Altunnami kanqa soqta chunka pitsqa (65) centïmetru. 24 Tsay mësapa jananta, rurinta y chakinkunatapis qoriwan enchapatsinki. Kuchunkunapapis qoripita rurashqa rebëtinta jiruruq churatsinki. 25 Tsaynöpis qanchis centïmetru anchuta qeruta jiruruq churatsinki. Tsay jananmannami qoripita rurashqa juk rebëtita churatsinki. 26 Tsaynöpis chusku argöllakunata qoripita rurarkatsir mësapa chuskun chakinkunaman churatsinki. 27 Tsay argöllakuna churaranqa chakinpita rebëtinman tinkuraqcho. Tsay argöllakunapa ishkay largu qerukuna pasanqa mësata wintupäkunanpaq. 28 Mësa wintukuna qerukunatapis acacia qerupita rurarkatsir qoriwan enchapatsinki.
29 “Tsay mësapaq qori pürupita ruratsinki plätukunata, wishlakunata, järrakunata y pucillukunata. Tsay järrakuna y pucillukunaqa vïnuta *altarman winapänanpaqmi kanqa. 30 Nawpächo kananpaq tsay mësaman tantata imaypis churatsinki.*
Candelabruta ruratsinanpaq tantiyatsishqan
31 “Tsaynöpis candelabruta qori pürupita martilluwan takaylapa ruratsinki. Tsay candelabrupa jamakunan, chakin, cöpankuna y waytankunapis juk piëzala kanqa. 32 Tsay candelabru soqta rikrayuqmi kanqa. Kimsa rikranmi jukaq lädupa kanqa y kimsa rikranmi jukaq lädupa kanqa. 33 Cada rikrancho kimsa waytakunata ruratsinki. Tsay waytakuna kanqa almendrupa waytan niraq. 34 Candelabrupa chakinchöpis kanqa chusku waytankuna. Tsay waytakunapis kanqa almendrupa waytan niraq. 35 Cada rikran tinkuraqcho kanqa juk wayta. 36 Waytankunapis y rikrankunapis tsay piëzala kanqa. Lapanpis qori pürulapita martilluwan takaylapa rurashqa kanqa.
37 “Candelabrupa qanchis mechërunkunata ruratsinki. Tsay mechërukunata candelabrupa cada puntankunaman jukta churatsinki nawpanman atsikyänanpaq.* 38 Mëchapa liptanta jorqunanpaq taksha alicätikunapis y lipta shuntakunan taksha plätukunapis qori pürupita kanqa. 39 Tsay candelabruta y lapan manëjunkunata ruratsinki kimsa chunka kimsa (33) kïlu qoripita.
40 “Lapanta ruratsinki kay puntacho rikatsishqätanöla.*