Éxodo
Sagrädu Tolduta ichitsipäkushqan
40 Tsaypitanami Moisésta TAYTA DIOS kayno nirqan: 2 “Wata qalaykunan killa punta kaq junaqcho Tinkunantsi *Sagrädu Tolduta ichitsinki. 3 Tinkunantsi Toldu ruriman *Pactu Babulta churaykur cortïnata churanki pipis babulta lutala mana rikananpaq. 4 Mësatapis ruriman yaykarkatsir manëjunkunata jananman shumaq churanki. Candelabrutapis yaykarkatsir mechërukunata puntanman churanki. 5 Inciensuwan qoshtatsinanpaq qori *altartapis churanki Pactu Babulta tsaparaq cortïna nawpanman. Sagrädu Tolduman yaykuna cortïnatapis churanki.
6 “Nirkurna sacrificiuta rupatsina altarta Tinkunantsi Toldu yaykuna nawpanman churanki. 7 Broncipita lavatoriutapis Tinkunantsi Toldupita altarman aywana chawpinman jamaykatsir tsayman yakuta winanki. 8 Tsayta ruraykurna Tinkunantsi Sagrädu Toldupa patiunta cortïnawan intëru tumaqta tsapanki. Tsayman yaykuna punkuta tsaparänanpaq kaq cortïnatapis churanki.
9 “Lapanta kamakarkatsirna sagrädu aceitita winapanki Sagrädu Tolduman y lapan tsaycho kaykaqkunamanpis. Tsaynöpami lapanpis sagrädu kar noqapana kanqa. 10 Tsaynöpis *sagrädu aceitita winapanki sacrificiuta rupatsina altarman y manëjunkunaman. Tsaynöpami tsay altar sagrädu kanqa. 11 Lavatoriuman y jamakunanmanpis sagrädu aceitita winapanki. Tsaynöpami sagrädu kanqa.
12 “Nirkurna Aarónta y tsurinkunata Tinkunantsi Toldu patiuman pushaykur armatsinki. 13 Nirkur sagrädu röpata Aarónta jatiparkur sagrädu aceitita umanman winapanki. Tsawraqa noqata sirvimaq cüranami kanqa. 14 Nirkur Aarónpa tsurinkunata qayaykur tünicata jatipanki. 15 Papäninta winapashqaykinöla tsurinkunapa umanmanpis sagrädu aceitita winapanki. Tsaynöpanami paykuna y paykunapita miraqkunapis sirvimaq cürakuna imayyaqpis kanqapaq”.
16 TAYTA DIOS nishqannölami lapanta Moisés rurarqan.
17 Egiptupita yarqapäkamushqan wata cumplirkuptinmi mushuq wata qalaykunan killa punta kaq junaqcho Sagrädu Tolduta ichitsipäkurqan. 18 Sagrädu Tolduta ichitsinanpaqqa puntata jawiräkunantaraqmi Moisés churatsirqan. Tsay jawiräkunanman marcukunata ichirkatsir traviskunata churatsirqan. Tsaynölami tushakunatapis ichirkatsir 19 tsay jananman toldukunawan qatatsirqan. Nirkur tsay jananman janay janay wakin toldukunawan qatatsirqan. TAYTA DIOS nishqannölami lapan tsaykunata Moisés ruratsirqan.
20 Nirkurnami Israel runakunawan TAYTA DIOS rurashqan *pactuta* babul rurinman churarqan. Babul wintukuna qerukunatapis argöllankunapa pasarkatsir tsapananwan tsaparqan. 21 Tsaypitanami Pactu Babulta aparqan Sagrädu Toldu ruriman. Tsayman churaykurmi mana rikakänanpaq cortïnata churarqan. Moisésta TAYTA DIOS nishqannölami lapan tsaykunata rurarqan.
22 Tsaypitanami Tinkuna Tolduman mësata aparqan Pactu Babulta tsaparaq cortïnapa jukaq lädunman churananpaq. Tsaytami churarqan norti kaq läduman. 23 Mësa jananman tantatapis churarqan TAYTA DIOSPA nawpancho kananpaq. Moisésta TAYTA DIOS nishqannölami lapan tsaykunata rurarqan.
24 Candelabrutapis Tinkuna Toldu ruriman apaykurmi mësa nawpan sur kaq läduman churarqan. 25 Nirkur mechërukunaman atskita ratatsirqan TAYTA DIOSPA nawpancho rataränanpaq. Moisésta TAYTA DIOS nishqannölami lapan tsaykunata rurarqan.
26 Qoripita rurashqan altartapis Tinkuna Tolduman apaykurmi churarqan tsaparaq cortïnapa jukaq lädunman. 27 Nirkurnami tsay altarcho ali asyaq* inciensuwan qoshtatsirqan. Moisésta TAYTA DIOS nishqannölami lapan tsaykunata rurarqan.
28 Tsaypitanami Sagrädu Tolduman yaykuna punkuman cortïnata churarqan. 29 Nirkurnami sacrificiuta rupatsina altarta Moisés churarqan Tinkuna Toldu yaykunan nawpanman. Tsaychömi rupatsina sacrificiuta y tsaki mikuy ofrendatapis rupatsirqan. Moisésta TAYTA DIOS nishqannölami lapan tsaykunata rurarqan.
30 Tsaypitanami lavatoriuta churarqan Tinkuna Toldupita altarman aywana chawpinman. Nirkur tsay lavatoriuman yakuta winatsirqan maylakärinanpaq. 31 Tsay yakuwanmi Moisés, Aarón y Aarónpa tsurinkunapis makinta y chakinta maylakärirqan. 32 Moisésta TAYTA DIOS nishqannölami paykunaqa imaypis tsayno maylakäriq Tinkuna Tolduman yaykunanpaq y altarman aywananpaqpis.
33 Nirkurnami Sagrädu Toldupa patiunta cortïnawan tumariq tsapatsirqan. Tsayman yaykuna punkuta tsaparänanpaq kaq cortïnatapis churatsirqan. Tsaynömi Sagrädu Tolduta Moisés ichitsiyta usharqan.
Tinkuna Tolduman Tayta Dios chayashqan
34 Tinkuna *Sagrädu Tolduta Moisés ichitsiyta usharkuptinnami pukutay tsapakurkuptin kikin TAYTA DIOS tsayman chayarqan.* 35 Pukutay tsaparaptinmi Moisés yaykuyta mana kamäpakurqantsu.
36 Sagrädu Toldupita pukutay sharkuptinnami Israel runakuna toldunkunata shuntarkur aywapäkuq. 37 Pukutay mana sharkuptinqa jinalanchömi patsarpäkuq. 38 Junaqpami Sagrädu Toldu janancho pukutay punuraq. Tsakaypanami Sagrädu Toldu janancho nina rataraq. Tsaytaqa lapan Israel runakunami rikapäkurqan. Pukutaypis ninapis tsayno karqan Israel runakuna chunyaq jirkapa purir *Canaánman chayashqanyaqmi.*