Isaías
10 ¡Wawalaw, imanöraq kanki, mana alita rurar tsapakunalaykipaq leyta ruraqkuna!
Qamkunaqa favornikikunalapaq leykunata rurarmi runakunata fiyupa nakatsipäkunki.
2 Waktsakunatapis manami cäsupäkunkitsu.
Paykuna demandakuptinpis manami arreglapäkunkitsu.
Viüdakunapa imaykantapis qechurkaykankimi.
Waktsakunatapis suwaparkaykankimi.
3 Tayta Dios castigashunayki junaq ¡imataraq rurapäkunkipaq!
Ushakätsishunaykipaq karu nacionpita chayamuptin washäshunaykipaq ¡pimanraq qelikunkipaq!
Riquëzaykikunatapis ¡maymanraq pakankipaq!
4 Ima ruraytapis mana kamäpakuykaqtami wakinnikita prësu tsaripäkushunkipaq y wakinnikitami wanutsipäkushunkipaq.
Tayta Dios tsayno castigashushpaykipis jinalami rabyashqa kaykanqa.
Yapay castigashunaykipaqpis kamarikushqalami kaykan.*
Asiria nacionta castigananpaq Tayta Dios wilashqan
5 ¡Wawalaw, imanöraq kanqa Asiria nacionpa mandaqnin rey!*
Tsay rey wirukuna garrutino kaptinmi pitapis rabyatsimaq kaqtaqa paywan castigatsï.
6 Mana cäsukamar rabyatsimaq nación runakunamanmi payta kachä.
Paykunata vincirkurmi cällicho mitutano jarukacharkur imaykankunatapis apakun.
7 Tsayno rurananpaq kachaptïpis tsay reyqa manami cäsukamantsu.
Tsaytaqa sueñuynilanchöpis manami yarpantsu.
Tsaypa trukanqa maytsay nacionkunata ushakätsinalanpaqmi yarpaykan.
8 Tsaymi kayno nin:
“Capitannïkunapis reykunanölami munayniyuq karkaykan.
9 Calno markatapis Carquemis markatanölami ushakätsishqä.
Hamat markatapis Arfad markatanölami ushakätsishqä.
Samaria markatapis Damasco markatanölami ushakätsishqä.
10 Vincishqä nación runakuna adorashqan ïdulukuna munayniyuq kaptinpis vincishqämi.
Jerusaléncho y Samariacho adorashqan ïdulukuna munayniyuq kashqanpitapis tsay ïdulukunaqa mas munayniyuqmi karqan.
Tsayno kaptinpis lapantami vincishqä.
11 Ïdulunkunaman yärakuptinpis Samariata vincishqänöla ¿manatsuraq Jerusaléntapis ïduluntinta vincishaq?”
12 Tsayno parlar runa tukushqanpita y munayniyuq tukur olqushqanpitami Asiria nacionpa mandaqnin reyta Tayta Dios castiganqa. *Sión jirkancho y Jerusaléncho taykaq runakunata castigayta usharkur paytapis castiganqami.* 13 Tsay reyqa runa tukurmi kayno nishqa:
“Munayniyuq kar y yachaq karmi lapantapis rurashqä.
Nacionkunapa lindërunkunatapis elqätsishqämi.
Lapan riquëzankunatapis apakamushqämi.
Geniuyuq karmi reykunatapis vincishqä.
14 Qeshwacho runtuta tariykur apakuqnömi juk lädu nación runakunapa riquëzankunatapis lapanta apakamushqä.
Tsayno ruraptï manami pipis michämashqatsu ni imatapis rimakushqatsu”.
15 Hächapis manami manijaqninpita mas munayniyuqtsu.
Trosadörapis manami tsutaqninpita mas munayniyuqtsu.
Garrutipis manami runata munashqanpa apantsu.*
16 Tsaymi lapanta mandaq TAYTA DIOS Asiria soldädunkunata qeshyawan castiganqa.
Ali kawayman churananpa trukanqa nina rupaykaqno shanapäkuy qeshyawanmi castiganqa.
17 *Santu Tayta Diosqa Israel runakunapa salvaqnin karmi atskino kaykan.
Kananqa nina bunyaypa bunyar rupaykaqnömi kanqa.
Tsaymi kashata y shatata nina rupar ushaqno Asiria nacionpa soldädunkunata juk junaqlacho elqäratsinqa.
18 Asiriacho kuyaylapaq muntikunata chipyaqmi ushakätsinqa.
Runakuna murushqanta y plantashqantapis lapantami ushakätsinqa.
19 Tsaymi munticho yörakuna walkalana kaptin ayka kashqanta wamralapis yupanqa.
Kawaykar quëdaq Israel runakuna Diosman yärakunanpaq nishqan
20 Tsay witsanqa walkaqlami Israel runakuna kawaykar quëdanqa.
Paykunaqa ushakätsiqnin Asiria runakunaman manami yärakunqanatsu.
Tsaypa trukanqa Israel runakunapa *santu Diosninlamannami yärakärinqa.
21 Walkaqlami Tayta Diosman yapay yärakärinqa.
Jacobpita miraq runakunapitaqa walkaqlami munayniyuq Tayta Diosman kutikärinqa.
22 Lamar kuchuncho aquyshanöraq kanan kaykarpis Israel runakunaqa walkaqlami kawaykar quëdapäkunqa.
Walkaqla quëdananpaqmi nacionninta TAYTA DIOS ushakätsinqa.
23 Yarpashqannömi lapanta mandaq TAYTA DIOS lapanta ushakätsinqa.*
24 Tsaymi lapanta mandaq TAYTA DIOS kayno nin: “*Sióncho taykaq kuyashqä runakuna, Asiria runakunata ama mantsakäriytsu. Egipto runakuna unay ayluykikunata nakatsishqanno nakatsishuptikipis ama mantsakäriytsu. 25 Kananpita manapis aykälatami qamkunapita rabyaynï pasanqa. Tsaypitaqa Asiria runakunatami ushakätsishaq. 26 Paykunata pasaypa astaptïmi madianita runakunata Oreb qaqacho Gedeón vincishqanno kanqa.* Tsaynöpis kanqa väräta lamar jananpa Moisés toqriptin Egipto runakunata talpukätsishqänömi. 27 Tsay witsanqa lasaq qepita aparipäshushqaykino nakatsishuptikipis salvashaykimi. Yüguta matankaparkuqno nakatsishuptikipis paykunapa makinpita jorqarkamurmi bendicionnïta churamushaq ali kawapäkunaykipaq”.
Israel nacionta Asiria runakuna atacashqan
28 ¡Asiria soldädukunaqa Ajat partiyaqmi chayashqa!
¡Tsaypita pasarmi Migrón partipa aywar Micmas partimanpis chayashqa!
29 ¡Raqrata pasaramurmi Geba partichöna patsakärishqa!
Tsayta rikarmi Ramá runakuna fiyupa mantsakurkaykan.
Saúlpa markan Gabaacho taqkunaqa qeshpirmi aywakärishqa.
30 ¡Galimcho taqkuna, lapan kalpaykiwan qaparpay!
¡Laischo taqkunapis, tsayta mayapäkuy!
¡Wawalaw, Anatot markacho taqkuna!
31 Madmena runakuna wakpa kaypa qeshpirmi aywakärishqa.
Gebimcho taqkunapis pakakärishqami.
32 Kanan hörami Asiria runakuna Nob particho jamaparkaykan.
Tsaychömi kamarikurkaykan Jerusaléncho kaykaq *Sión jirkanta atacaq yaykapäkunanpaq.
33 Tsayno kaptinpis lapanta mandaq TAYTA DIOSMI Asiria runakunata ushakätsinqa.
Jatun yörata mutuqnömi paykunata vincinqa.
Runa tukäriptinpis raku yörata mutushqannömi ushakätsinqa.
34 Muntita hächawan tsaquqnömi ushakätsinqa.
Líbanucho jatusaq yörakunata qapapayla tunitsiqnömi paykunatapis ushakätsinqa.