Isaías

Egipto y Etiopía nacionkunata Asiria runakuna vincinanpaq nishqan

20 Juk kutichömi Asiria nacionpa mandaqnin rey Sargón kacharqan soldädunkunatawan mas mandaq capitanta Asdod markaman. Tsayno kachaptin aywarmi Asdod markata vinciykur munaynincho tsarararqan.

2 Tsay witsanmi Amozpa tsurin Isaíasta TAYTA DIOS kayno nirqan: “Qachqa röpa jatiraykashqaykita loqtirkur lanqikitapis loqtikunki”.

Tayta Dios nishqanno rurarmi qarapächula y qara chakila Isaías purirqan.

3 Tsaypita kimsa watatami Judá runakunata TAYTA DIOS kayno nirqan: “Egipto runakuna y Etiopía runakuna imano nakananpaq kashqanta musyanaykipaqmi sirvimaqnï Isaías kimsa wata qarapächula y qara chakila purishqa. 4 Isaías purishqantanömi Egipto runakunata y Etiopía runakunatapis qara chakita y qara sikita Asiria nacionpa mandaqnin rey prësu apanqa. Mözutapis awkintapis penqakushqatami tsayno apanqa.

5 “Tsayno prësu apashqanta musyarmi qamkuna fiyupa mantsakankipaq. Etiopía runakunaman y Egipto runakunaman yärakärishqaykipita pasaypami penqakärinkipaq. 6 Tsay witsanmi lamar kuchunkunacho taq runakuna kayno nipäkunqa: ‘¡Maski rikapäkuy yärakushqantsi runakuna imano kashqantapis! Paykunamanmi yärakurqantsi Asiria runakunapita salvamänantsipaq. Kananqa ¿piraq salvamäshun?’ ”