Isaías
Acazta Isaías wilashqan
7 Jotampa tsurin y Uzíaspa wilkan Acaz Judá nacionpa mandaqnin rey kaykaptinmi Siria nacionpa mandaqnin rey Rezínwan Israel nacionpa mandaqnin rey Peka soldädunkunawan aywapäkurqan Jerusalénta atacananpaq. Peka karqan Remalíaspa tsurinmi. Chayaykur mayjina atacarpis manami vinciyta kamäpakurqantsu. Kaychömi qelqaraykan manaraq atacaptin imano kashqanpis.*
2 Rey Acazta y aylunkunatami wilapäkurqan kayno nir: “Siria nación runakunami Efraín runakunawan* wilanakushqa atacamänantsipaq”.
Tsayno niptinmi rey Acaz y mandashqan runakunapis mantsakuypita wayrawan yörakuna kuyuqnöraq siksikyarqan.
3 Tsawraqa Isaíasta TAYTA DIOS kayno nirqan: “Wamrayki Sear-jasubta* pushakurkur ayway rey Acazwan tinkunaykipaq. Paywan tinkunki jana kaq estanquipita yaku yarqaykämuq sekyachömi. Tsay estanqui kaykan Taqshakuna Pampaman näni aywaraqchömi.
4 “Tinkurna reyta kayno ninki: ‘Siria nacionpa mandaqnin rey Rezínwan Israel nacionpa mandaqnin rey Peka qampita fiyupa rabyashqa kaptinpis ama yarpachakuytsu ni lakikuytsu. Paykunaqa mayjina rabyashqa karpis oqu yanta qoshtaykaqnölami kaykan.
5 “ ‘Tsay reykunaqa atacashunaykipaq wilanakurmi kayno nipäkushqa: 6 “Judá runakunata atacashun. Vinciykur tsay nacionpa mandaqnin rey kananpaq Tabeelpa tsurinta churapäshun”.
7 “ ‘Paykuna tsayno yarpaptinpis makincho tsararämaqnintsi TAYTA DIOS kaynömi nin:
“ ‘¡Yarpapäkushqannöqa manami imaypis pasanqatsu ni imapis kanqatsu!
8 Siria nacionpa capitalninqa Damasco markalami kaykan.
Damasco markacho reyqa Rezínlami kaykan.*
Kananpita soqta chunka pitsqa (65) watachöraqmi Efraín nación chipyaq ushakanqa.
9 Efraín nacionpa capitalninqa Samaria markalami kaykan.
Samaria markacho reyqa Remalíaspa tsurilanmi kaykan.
Nishqäta mana criyipäkushqaykipitami qamkunapis ushakankipaq’ ”.
Emanuel yurinanpaq wilakushqan
10 TAYTA DIOS mastapis Acazta kayno nirqan: 11 “Nishqäta cumplinäpaq kashqanta musyanaykipaq noqata manakamay juk señalta rikatsinäpaq. Manakamashqayki señaltami kay patsachöpis o jana patsachöpis rikatsishaykipaq”.
12 Tsawraqa Acaz kayno nirqan: “Noqa manami ima señaltapis TAYTA DIOSTA manakushaqtsu ni probashaqtsu”.
13 Niptinmi Isaías kayno nirqan: “Davidpita miraq Acaz, kanan shumaq mayamay. Lapan mandäshishuqniki ayluykikunawan runakunata rabyanätsir ¿manaku contentakunki? Kananqa ¿Tayta Diostapis rabyanätsiytaku munarkaykanki? 14 Kananqa kikin TAYTA DIOSMI señalta qamkunata rikatsishunki. Juk virgen jipashmi qeshyaq rikakur olqu wamrata wachakunqa. Tsay wamrapa jutintami churapanqa Emanuel jutin kananpaq.* 15 Tsay wamraqa yarpayninman manaraq chayar mantequïllalata y abëjapa mishkilantami mikunqa.* 16 Tsay witsanmi mantsakushqayki ishkay reykunapa nacionninkuna ushakanqapaq.
17 “TAYTA DIOS fiyupa nakaykunata kachamuptinmi qampis, mandashqayki runakunapis y lapan ayluykikunapis fiyupa nakapäkunkipaq. Efraín runakunawan Judá runakuna rakikashqan junaqpita patsa hasta kananyaq manami imaypis runakuna tsayno nakashqatsu. Tsay nakatsishuqnikiqa Asiria nacionpa mandaqnin reymi kanqa.
18 “Tsay witsanqa TAYTA DIOSMI Egipto runakunata upuqruytano y Asiria runakunata abëjatanöraq kachamunqa. 19 Paykuna shamushpanmi chunyaq raqrakunaman, machaykunaman, shata rurinkunaman y uywakuna yaku upukunan partikunamanpis churanakunqa.
20 “Shamunanpaqmi Éufrates mayu tsimpanpita Asiria nacionpa mandaqnin reyta y soldädunkunatapis Tayta Dios kachamunqa. Vincirkushushpaykimi kawaykar quëdaq runakunata fiyupa penqakatsir aqtsanta y penqaynincho kaykaq shapratapis rutunqa. Tsaynölami qaqlancho kaykaq shaprantapis qaraypa rutunqa.
21 “Tsay witsanmi kawaykar quëdaqkuna juk wäkalata y ishkay uyshalata ashmanqa. 22 Runakuna walkala kaptinmi lëchita upupäkunanpaq y mantequïllata mikupäkunanpaq aypanqa. Tsaymi mantequïllata y abëjapa mishkinta mikupäkunqa.
23 “Tsaynölami waranqa (1,000) üva plantaraykaq chakra kaptinpis y waranqa qellay cuestaq chakra kaptinpis kashakunalana junta kanqa. 24 Intëru nación muntiyaptinmi tsaychöqa flëchawan jirka uywata tsaripäkunqa. 25 Nawpata lampawan arushqan ali chakrakunachöpis kashakunalanami muntiyanqa. Tsaymi tsaycho mana murunqanatsu, sinöqa wäkakuna y uyshakuna mikunan jirkakunalanami rikakunqa”.