Jeremías
Gedalíasta wanutsishqan
41 Tsaypita qanchis killa pasarkuptinnami Ismael jutiyuq runa Mizpa markaman chayarqan chunka runakuna pushashqa. Ismaelqa karqan Elisamapa wilkan y Netaníaspa tsurin. Tsaynöpis karqan Judá nacionpa mandaqnin reykuna aylu y rey Sedequíaspa yanapaqnin autoridämi. Chayaykurmi Gedalíaswan mikur upur jamararqan. 2 Mikurkaykashqanchömi pushashqan chunka runakunawan Ismael elaqpita Gedalíasta espädanwan wanuratsirqan. Gedalíastaqa Judá nacionpa gobernadornin kananpaq Babilonia nacionpa mandaqnin reymi churashqa karqan. Tsayno kaykaptinpis mana mantsakuypami wanutsipäkurqan. 3 Tsaynölami Mizpacho Gedalíaswan kaykaq Judá runakunata y Babilonia* soldädukunatapis wanutsipäkurqan.
4 Gedalíasta wanutsishqanta manaraq musyarmi jukaqnin junaq 5 Siquempita, Silupita y Samariapitami pusaq chunka (80) runakuna chayapäkamurqan. Jerusalén markata ushakätsishqanpita pasaypa lakikurmi paykuna kaykarqan shaprankuna rutukushqa, röpankuna rachishqa y qaran pishtaypa pishtashqa. Paykunami apapäkamurqan tsaki mikuy ofrendakunata y inciensuta TAYTA DIOSPA templunman churananpaq.
6 Tsay runakuna Mizpaman manaraq chayaptinmi Netaníaspa tsurin Ismael waqaraykar taripaq aywarqan. Tinkurkushpannami kayno nirqan: “Markaman aku yaykushun Gedalíaswan tinkunaykipaq”.
7 Markaman yaykuriptinnami cumpinchinkunawan Ismael tsay runakunata wanutsirqan. Nirkurmi yaku pözuman ayankunata winarpurqan. 8 Manaraq wanutsiptinmi tsay pusaq chunka runakunapita chunka runakuna Ismaelta ruwakurqan kayno nir: “Ama wanuykatsimaytsu, tayta. Mana wanutsimaptikiqa jirkacho pakaraykätsishqä trïguta, cebädata, aceitita y abëjapa mishkintami qoykushayki”.
Tsayno niptinmi wakin kaqta wanutsirpis ruwakuq kaqkunata mana wanutsirqantsu.
9 Ayakunata Ismael winashqan pözuqa karqan rey Asa* unay ruratsishqan yaku pözumi. Tsay pözuta uchkutsirqan Israel nacionpa mandaqnin rey Baasawan pelyashqan witsanmi. Tsay pözuman juntaqpaqmi ayakunata Ismael winarqan.
10 Nirkurnami Ismaelqa prësu tsarirqan reypa warmi tsurinkunata y Mizpacho quëdaq wakin runakunata. Tsay runakunata wardiakunapa capitannin Nabuzaradánmi Gedalíaspa makinman kachaykurqan. Paykunata prësu apakurkurmi Amón nacionman Ismael aywakurqan.
Prësu apashqan runakunata Ismaelpa makinpita qechushqan
11 Careapa tsurin Johanán y paywan kaykaq capitankunami mayapäkurqan runakunata Ismael wanutsishqanta. 12 Tsaymi lapan runakunata shuntakurkur aywapäkurqan Ismaelwan pelyananpaq. Qatiparmi tariparqan Gabaóncho kaykaq yaku shuntakuna jatun estanqui nawpancho.* 13 Ismael prësu apaykashqan runakuna Johanánta y paywan aywaykaq capitanninkunata rikaykurmi pasaypa kushikushpan 14 paykunaman jukla juntakarqan. 15 Ismaelnami pusaq yanapaqninkunawan qeshpir Amón nacionman aywakurqan.
16 Prësu apaykashqan runakuna karqan soldädukuna, warmikuna, wamrakuna y autoridäkuna. Paykunatami Johanánqa yanapaqnin capitankunawan Ismaelta Gabaóncho qechuramur 17 Belénpa nawpancho kaykaq Gerut-quimamman pusharqan. Tsaychömi patsakärirqan tsaylapitana Egiptupa aywakuyta yarpar. 18 Tsayno aywakuyta yarpapäkurqan Babiloniapa mandaqnin rey churashqan gobernador Gedalíasta Ismael wanutsishqanpita pasaypa mantsakurmi.