Jeremías
Amón nación runakunata castigananpaq nishqan
49 Kaychömi qelqaraykan amonita runakunapaq TAYTA DIOS nishqan.
“Gad trïbupa markankunachömi amonita runakuna* tarkaykan.
Milcom diosta adoraqkunami* Gad trïbu runakuna tashqanta duëñu tukushqa.
¿Maychötaq kaykan Israelpita miraq Gad runakuna?
¿Manaku pilapis kan imaykankunawanpis quëdananpaq?
2 “Rabácho taykaq amonita runakuna guërracho qaparashqan mayakämunqanami.
Markankunata nina rupaptin wayinkunapis raqälanami rikakärinqa.
Tsayraqmi amonita runakuna tsararashqanpita Israel runakuna markankunata shuntapäkunqa.
Noqa TAYTA DIOSMI tsayno nï.
3 “¡Hesbón runakuna, Hai marka ushakashqanpita qaparpay!
¡Milcom diostami adoraqnin cürakunatawan prësu apakärinqa!
¡Milcompa jutincho mandaq autoridäkunatapis prësumi apakärinqa!
Rabácho taykaq warmikuna, ¡lütuta jatikurkur waqapäkuy!
¡Löcutaykaqnöraq markaykicho waqar cörrikachay!
4 “Mana cäsukuq amonita runakuna, ¿imanirtaq imaykayuqpis kashqaykita sumaykatsinki?
Qamkunaqa imaykayuqpis kashqaykimanmi atiënikurkaykanki.
Tsaymi yarparkaykanki pipis mana atacashunaykipaq kashqanta.
5 Tsayno yarpaptikipis maytsaypita shamurmi contraykikuna atacashunkipaq.
Fiyupa mantsakushpaykimi jukniki juknikipis wakpa kaypa qeshpir aywakärinkipaq.
Kutitsimushunaykipaqpis manami pipis kanqatsu.
Lapanta mandaq TAYTA DIOS karmi tsayno nï.
6 “Tsayno kashqanpita watakuna pasarkuptinqa amonita runakunata maytsaypitapis nacionninmanmi kutitsimushaq. Noqa TAYTA DIOSMI tsayno nï”.
Edom nación runakunata castigananpaq nishqan
7 Kaychömi qelqaraykan lapanta mandaq TAYTA DIOS edomita runakunapaq* nishqan.
“Temán markacho tantiyakuqkuna ¿mananaku kan?
Yätsikuqkunapis ¿mananaku kan?
Yachaqkunapis ¿lapan yachashqanta qonqaykushqanaku?
8 “¡Dedán marka runakuna, qeshpikäriy!
¡Uchkukunamanpis pakakäriy!
Esaúpita miraq runakuna tashqan naciontami* ushakätsishaq.
Paykunata castiganäpaq kaq junaq chayamushqanami.
9 “Üva palaqkuna ¿manaku juk ishkay sarta üvakunata yörancho kachaykun?
Tsakaypa suwa yaykurpis ¿manaku puëdishqan kaqlata apakun?
10 Noqami itsanqa Esaú runakunapa imaykantapis chipyaq qechushaq.
Mayman pakakäriptinpis tarishaqmi.
Tsurinkunata, aylunkunata y vecïnunkunata lapantami ushakätsishaq.
11 Edomcho quëdaq waktsakunataqa noqanami ashmashaq.
Viüdakunatapis noqanami yanapashaq”.
12 TAYTA DIOSMI kayno nin: “Jutsaynaq runakunapis nakananpaq kaykaptinqa qamkunaqa jutsa rurashqaykipita masraqmi nakapäkunkipaq. Cöpacho winaraykaq castïguta imanöpapis upunaykimi. 13 Noqa TAYTA DIOS kikïpa jutïcho jurarmi kayno nï: Bosra markatapis atacanqami. Pasaypa maldicionädu karmi chunyaq raqälana rikakunqa. Tsayta musyarmi wakin runakuna fiyupa mantsakanqa y wakinnami asipanqa. Tsaynölami Edomcho kaq wakin markakunatapis juchutsinqapaq. Manami imaypis yapay sharkatsinqanatsu”.
14 Edom nacionta castigananpaq kashqanta TAYTA DIOSMI tantiyatsimashqa.
Nacionkunaman kachamushqan wilakuqmi kayno niykan:
“¡Pelyanaykipaq shumaq kamarikäriy!
¡Edomita runakunata atacanaykipaq aywapäkuy!”
15 Tayta Diosmi edomita runakunata kayno nin:
“Wakin nacionkunapita mas walkala kanaykipaqmi castigashayki.
Pïmaypis manakaqman churashunaykipaqmi kamakätsishaq.
16 Qaqa uchkukunachömi tarkaykanki.
Altunnin jirkakunacho anka taqnömi tarkaykanki.
Tsayno tarkaykaptikipis qarpamushaykimi.
Ali chölu kashqaykipis manakaqlapaqmi kanqa.
Noqa TAYTA DIOSMI tsayno nï.
17 “Edom nación ushakashqanqa pasaypa mantsariypaqmi kanqa.
Imano castigashqäta rikashpanmi lapan pasaqkuna äyakashqa rikapanqa.
18 Sodoma, Gomorra y nawpankunacho kaykaq markakuna ushakashqannömi* ushakanqa.
Tsayno ushakätsiptïmi Edom nacioncho pipis mana tanqanatsu.
Noqa TAYTA DIOSMI tsayno nï.
19 “Jordán mayu kuchun muntipita yarqamuq leonnömi kashaq.
Ali qewacho mikuykaq uywata tsariq leonnömi noqapis elaqpita castigashaq.
Tsaymi edomita runakuna mantsakashpan qeshpir aywakärinqa.
Nirkurnami akrashqä runata mandaqnin rey kananpaq churashaq.
¿Piraq noqano kanman?
¿Piraq noqawan churakanman?
¿Pï autoridäraq noqata ichipämanman?
20 “Edomita runakunapaq wilakatsishqäta lapayki mayapäkuy.
Temán markacho taqkunata castiganäpaq nishqäta shumaq mayapäkuy.
Tsaycho taqkunata wamrantintami prësu apakärinqa.
Intëru naciontami pasaypa ushakashqata kacharinqa.
21 Edom marka tsayno ushakaptinmi maytsaychöpis patsa kuyunqa.
Fiyupa qaparpashqanpis Puka Lamaryaqmi* mayakanqa.*
22 Edompa contrankuna Bosra markamanmi yaykunqa.
Älanta anka luylurkur chipshaman aywaqnömi yaykapäkunqa.
Edompa soldädunkunapis tsay junaqqa wachay nanaywan warmi siksikyaqnömi siksikyanqa”.
Damasco runakunata castigananpaq nishqan
23 Kaychömi qelqaraykan Damasco marka* * runakunapaq Tayta Dios nishqan.
“Hamat markacho y Arfad markacho taqkuna mala noticiata mayaykurmi pasaypa mantsakanqa.
Löcutashqano kashpanmi ima ruraytapis mana kamäpakunqanatsu.
24 “Damascucho taqkunapis kalpaynaqnami rikakärinqa.
Qeshpiyta munarpis fiyupa mantsarishpanmi ima ruraytapis mana kamäpakärinqatsu.
Pasaypa lakikurmi siksikyanqa.
Warmita wachay nanay tsariqnöraqmi paykunata tsarinqa.
25 “Damasco markaqa pïmaypitapis reqishqa markami kaykan.
Tsay markata rikaykur pasaypami kushikurqä.
Tsayno karpis pasaypa chunyaqmi rikakunqa.
26 Tsay junaqmi mözukuna cällikunacho wanushqa jitarpanqa.
Lapan soldädukunapis wanurmi ushakanqa.
Lapanta mandaq TAYTA DIOS karmi tsayno nï.
27 Damasco markapa murällankunatapis rupatsishaqmi.
Tsaymi rey Ben-adadpa palaciunkunatapis nina ushanqa”.
Cedar y Hazor runakunata castigananpaq nishqan
28 Kaychömi qelqaraykan Cedar runakunapaq y Hazor runakunapaq TAYTA DIOS nishqan. Tsay runakunatami Babiloniapa mandaqnin rey Nabucodonosor vincir ushakätsirqan.
“¡Cedar runakunata aywaykur atacapäkuy!
¡Inti jeqamunan kaq läducho taqkunata chipyaq ushakätsiy!*
29 ¡Toldunkunata y uywankunatapis apakäriy!
¡Toldunkunapa cortïnankunata y lapan tsararashqankunatapis apakäriy!
¡*Camëllunkunatapis chipyaq qechur apakäriy!
¡Maytsaychöpis mantsakuypaq kashqanta nipäkuy!
30 “¡Hazorcho taqkuna, qeshpir karupa aywakäriy!
¡Uchkukunamanpis pakakäriy!
Babilonia nacionpa mandaqnin rey Nabucodonosormi atacashunaykipaq kamarikushqana kaykan.
Noqa TAYTA DIOSMI tsayno nï”.
31 Tsaynölami Babilonia soldädukunatapis TAYTA DIOS kayno nin:
“Hazor runakunata jawka kawarkaykaqta atacapäkuy.
Paykunaqa manami murallashqa markachötsu tarkaykan.
Washänanpaqpis manami pïninpis kantsu.
32 Camëllunkunata y uywankunatapis suwapar apakäriy.
Laplan rutukuq runakunataqa* maytsaypapis aywakunanpaqmi qarqushaq.
Maytsaypitami paykunaman nakaykunatapis chätsimushaq.
Noqa TAYTA DIOSMI tsayno nï.
33 “Hazor parti chunyaq rikakuptin *chacalkunalami tsaycho tanqa.
Manami pï runapis tanqanatsu ni patsakunqanatsu”.
Elam nación runakunata castigananpaq nishqan
34 Sedequías Judá nacionpa mandaqnin rey kayta qalaykuykashqan witsanmi Elam nación imano kananpaq kashqantapis TAYTA DIOS profëta Jeremíasta wilarqan kayno nir:
35 “Lapanta mandaq TAYTA DIOS karmi kayno nï:
Flëchawan pelyayta shumaq yachaptinpis Elam runakunapa soldädunkunata ushakätsishaqmi.
36 Löcu wayratanömi maytsaypitapis soldädukunata kachamushaq atacananpaq.
Tsay soldädukunataqa Elam runakuna ichipayta manami kamäpakunqatsu.
Tsaymi maytsay nacionkunamanpis amparakunanpaq qeshpipäkunqa.
37 Atacaykashqan soldädukunapa nawpanchömi Elam runakuna fiyupa mantsakur siksikyanqa.
Fiyupa rabyar castigaptïmi pasaypa nakapäkunqa.
Tsaymi guërracho wanur lapan ushakanqa.
Noqa TAYTA DIOSMI tsayno nï.
38 “Elampa mandaqnin reyta y autoridäninkunata ushakarkatsirmi kikï tsaycho mandashaq.
Noqa TAYTA DIOSMI tsayno nï.
39 Watakuna pasarkuptinmi itsanqa Elam runakunata markankunaman kutitsimushaq.
Noqa TAYTA DIOSMI tsayno nï”.