Ezequiel

Jerusalénta mana ali üva yöraman tinkutsishqan

15 TAYTA DIOSMI kayno nimarqan: 2 “Runapa tsurin, ¿üva yöraqa imalapaqpis välintsuraq? ¿Wakin yörakunapita mas alitsuraq üva yöra kaykan? 3 ¿Üva yörapita tablata rurapäkunmantsuraq? ¿Imata warkukunalanpaqpis estäcata rurapäkunmantsuraq?

4 “Üva yöraqa yantalapaqmi ali kaykan. Ishkan puntanpa rupariptinqa shonquntapis rupanmi. Tsayno rupashqana karqa imapaqpis manami alinatsu. 5 Manaraq rupatsiptin imalapaqpis mana ali kaykarqa peorraqchari rupashqana kaykarqa imapaqpis mana alitsu.

6 “Tsaymi TAYTA DIOS kayno nin: ‘Munticho üva yörata ninawan rupatsiqnömi Jerusaléncho taq runakunatapis ushakätsishaq. 7 Noqami paykunapa contran sharkushaq. Tsaymi ninapita qeshpiptinpis juklächöpis ninawan ushakätsishaq. Tsayno contran rikakuptïraqmi TAYTA DIOS kashqäta musyapäkunqa.

8 “ ‘Imaypis cäsukamänanpaq promitimarpis mana cäsukamashqanpitami nacionninta pasaypa ushakätsishaq’. TAYTA DIOSMI tsayno nin”.