Ezequiel

Wilakunanpaq Ezequielta Tayta Dios qayashqan

2 Tsaymi kayno nimarqan: “Runapa tsurin, parlanantsipaq sharkuy”.

2 Tsayno nimaptinmi Tayta Diospa Espïritun noqaman yaykamur ichitsimarqan. Nirkurmi Tayta Dios parlapämashpan 3 kayno nimarqan: “Runapa tsurin, Israel runakunamanmi kachashayki wilakuynïta wilakunaykipaq. Tsay runakuna mana cäsukuq karmi conträ sharkapäkushqa. Unay aylunkuna conträ kashqannömi paykunapis conträ karkaykan. 4 Tsay mana tantiyakuq puyñu rinri runakunamanmi qamta kachaykä noqa TAYTA DIOS imata niykashqätapis wilanaykipaq. 5 Wilaptikipis pasaypa mana cäsukuq kashpanmi mana cäsushunkipaqtsu. Itsanqa cäsukurpis o mana cäsukurpis profëta kashqaykitami musyapäkunqa.

6 “Runapa tsurin, paykunata ama mantsakuytsu. Kashakuna rurinchöno karpis y alacrankuna tashqanchöno karpis paykuna nishqanta ama mantsakuytsu. Nanaq nawinpa rikapäshuptikipis ama mantsakuytsu. Tsay runakunaqa mana wiyakuqmi karkaykan. 7 Cäsukunan o mana cäsukunan kaptinpis noqa nishqäta wilapay. Paykunaqa mana cäsukuqmi karkaykan.

8 “Runapa tsurin, niykashqäta shumaq mayamay. Ama paykunano mana cäsukuq kaytsu. Kanan kay aptapaykashqäta mikunaykipaq shimikita äyay”.

9 Tsaymi rikarqä röllun aptashqa maki noqa kaq lädupa makyaraykämuqta. 10 Tsay rölluta kichariptinmi rikarqä ishkan lädupa qelqashqa kaykaqta.* Tsaycho qelqaraykarqan wanupakuy canta, waqay canta y mantsakuy cantakunami.