Ezequiel
Jerusalénta Tayta Dios espädanwan castigananpaq nishqan
21 (6) TAYTA DIOSMI kayno nimarqan: 2 (7) “Runapa tsurin, Jerusalén kaq lädupa tikraykur templuta y Israel nacionta ima pasananpaq kaqtapis wilakuy. 3 (8) Israel runakunata kayno nir wilanki: ‘TAYTA DIOSMI kayno nin: Qamkunapa contrayki rikakurmi churaräkunanpita espädäta jorqurir jutsayuq runakunata y mana jutsayuq runakunatapis wanutsishaq. 4 (9) Espädäta jorqurirmi norti kaq lädupita qalaykur sur kaq läduyaq lapanta ushakätsishaq. 5 (10) Tsaynöpami pïmaypis musyanqa noqa TAYTA DIOS espädäta jorqamushqäta. Wanutsiyta manaraq usharqa churaräkunanman espädäta manami kutitsishaqtsu’.
6 (11) “Runapa tsurin, lapan runakuna rikashunaykipaq fiyupa lakikushpayki waqay. 7 (12) Imanir waqashqaykitapis tapushuptiki kayno ninki: ‘Desgracia shamunanpaq kashqanta musyarmi waqaykä. Tsay junaqqa pïmaypis kalpaynaqmi rikakunqa. Pasaypa almatakashqami lapanpis rikakunqa. Fiyupa mantsakuptinmi qonqurninkunapis siksikyanqa. Tsayno kananpaq kaq junaq chayaykämunnami. Manapis aykälatanami tsay kanqa. TAYTA DIOSMI tsayno nin’ ”.
8 (13) TAYTA DIOS kaynömi nimarqan: 9 (14) “Runapa tsurin, ima pasananpaq kashqantapis kayno nir wilakunki:
“ ‘Tayta Diosmi kayno nin:
Espäda ali afilashqami kaykan.
Chipchipyashqanyaq pitsashqami kaykan.
10 (15) Wanutsinanpaq ali afilashqami kaykan.
Chipchipyänanpaq pitsashqami kaykan.
Tsayno kaptin reymanpis ama yärakäriytsu.
Paytapis ushakätsinqami.
11 (16) Tsay espäda ali afilashqanami kaykan.
Chipchipyänanpaq pitsashqami kaykan.
Wanutsikuqta aptapänäpaq listumi kaykan.
12 (17) “ ‘Runapa tsurin, fiyupa qaparashpayki waqay.
Kuyashqä runakunata tsay espäda wanutsinanpaqmi kaykan.
Israel nacionpa autoridäninkunatapis wanutsinanpaqmi kaykan.
Lapan runakunatami wanutsinqa.
Tsaypita lakikushpayki pëchuykita kutakuy.
13 (18) Lapanpaqmi nakay chayamunqa.
Reypis espädawan wanutsishqami kanqa.
TAYTA DIOSMI tsayno nin.
14 (19) “ ‘Runapa tsurin, makikita jitarraq ima pasananpaq kaqtapis jutïcho wilakunki.
Ushakänanpaq kashqanta runakuna tantiyakärinanpaq ishkay kimsa kutiraq espädata awiy.
Tsaytsikata wanutsinanpaqmi kaykan.
15 (20) Runakunapa valorninpis manami kanqanatsu.
Tsaytsikami ayakunapis jitarpanqa.
Runakunata wanutsinanpaqmi marka punkunkunaman wanutsikuq espädata churashqä.
Tsay espäda shumaq pitsashqa karmi chipchipyanraq.
Wanutsinanpaq ali afilashqami kaykan.
16 (21) “ ‘¡Espäda, alawqa kaq lädupa y itsuq kaq lädupapis kutsuy!
¡Mayqan kaq lädupapis kutsuy!
17 (22) Tsayno kutsuptikimi noqapis makïta paqshirraq kushikushaqpaq.
Rabyaynï pasananyaqmi tsayno wanutsinkipaq.
TAYTA DIOSMI tsayno nin’ ”.
18 (23) TAYTA DIOSMI yapay kayno nimarqan: 19 (24) “Runapa tsurin, Babilonia nacionpa mandaqnin rey espädanwan shamunanpaq mäpacho ishkay nänita dibujay. Juk nacionlapita ishkan näni yarqarämutsun. Cada näni qalaykunancho letrëruta churanki mayqan markaman aywaykashqantapis musyananpaq. 20 (25) Juk nänita dibujanki amonita runakuna tashqan Rabá markaman chayananpaq. Jukaq nänitana dibujanki Judá nacioncho kaykaq ali murallashqa Jerusalén markaman chayananpaq.
21 (26) “Mayqan nänipapis aywayta mana kamäpakurmi tinkuq nänicho Babilonia nacionpa mandaqnin rey suertita jitar flëchakunata chunkanqa. Tsaynöpis ïdulunkunata tapukur uywakunapa natinninkunatapis rikanqa. 22 (27) Tsayno ruraptinmi alawqa kaq nänipa aywananpaq suerti yarqunqa. Tsay alawqa kaq lädupami Jerusalén kaykan. Tsaymi soldädunkunata rey ninqa Jerusalénman jukla aywaykur atacananpaq. Tsaynöpis ninqa wanutsiyta qalaykärinanpaq, qaparpänanpaq, punkukunata pakirir yaykapäkunanpaq, marka murälla waqtankunapa alpata qotupäkunanpaq y tsay perqa nawpancho törrikunata sharkatsipäkunanpaq.
23 (28) “Babilonia nacionpa mandaqnin reywan wilanakushqa karmi tsayno atacananpaq kashqanta Jerusalén runakuna mana criyipäkunqatsu. Mana criyiptinpis contran sharkuptinmi paykunata prësu apakunqa.
24 (29) “Tsaymi Jerusalén runakunata wilanki noqa TAYTA DIOS kayno nishqäta: ‘Qamkunaqa mana alikunalatami rurarkaykanki, mana mantsakuypami jutsata rurarkaykanki y lutan ruraykunaman umayki churakashqami karkaykanki. Tsayno kashqaykipitami prësu apashunkipaq.
25 (30) “ ‘Israel runakunapa mandaqnin rey, fiyu runa kashqaykipitami qamman castïgu chayaykämunna.* 26 (31) Noqa TAYTA DIOSMI kayno nï: Umaykicho jatiraykashqayki görrata y corönaykita jorquy. Lapanpis juknönami kanqa. Tsaymi manakaqman churashqa runakuna aliman churashqa kanqa. Chölu tukuqkunanami manakaqman churashqa kanqa. 27 (32) Intëru Jerusaléntapis chipyaq ushakätsiptïmi raqälana quëdanqa. Tsayno kanqa kachamushqä runa chayamur juzgaptinmi. Paypa munayninmanmi lapanta kachaykushaq’.
Amonita runakunata castigananpaq nishqan
28 (33) “Runapa tsurin, Israel runakunata ashliq amonita runakunata* kayno nir wilanki: ‘Tayta Dios kaynömi nin: Wanutsikuq espäda churaräkunanpita jorqushqanami kaykan. Ashi ashiykur pïmaytapis ushakätsinanpaqnami ali afilashqa chipchipyarraq kaykan.
29 (34) “ ‘Qamkuna revelacionta rikashqaykikunaqa manami rasunpatsu kaykan. Rikakuqnikikunapis lulaparkaykäshunkimi. Mana cäsukuq fiyu runakuna, tsay espädami kunkaykita kutsunqa. Tsayno wanupäkunaykipaq hörayki chayamushqanami.
30 (35) “ ‘Amonita runakuna, espädaykikunata churaräkunanman kutitsipäkuy. Yurishqayki markachömi juzgashayki. Winashqayki nacionchömi castigashayki. 31 (36) Bunyaypa bunyar nina rupaqno pasaypa rabyarmi ushakätsikuq y fiyu runakunapa makinman churaykushaykipaq. 32 (37) Tsakishqa qewanömi rupar ushakankipaq. Yawarnikipis intëru nacionchömi mashtaranqapaq. Tsayno ushakaptiki manami pipis yarpäshunkipaqnatsu. TAYTA DIOSMI tsayno nin’ ”.