Ezequiel
Jerusalénta ushakätsinanpaq revelacioncho rikashqan
9 Tsaypitanami fuertipa kayno nimuqta mayarqä: “¡Markata ushakätsiqkuna kaychönami kaykan! ¡Lapanta ushakätsinanpaqmi armankuna aptashqa chayarkaykämun!”
2 Tsawraqa templupa jatun kaq patiunman yaykuna norti kaq lädu punkupa rikarqä soqta runakuna pelyananpaq armankuna aptashqa aywarkaykämuqta. Paykunawanmi juk runa lïnupita rurashqa röpan jatishqa aywaykämurqan. Paymi tseqlancho tsararaykarqan tintata y qelqakunan plümata. Templuman yaykurishpanmi paykuna ichikuykurqan broncipita rurashqa *altar nawpanman.
3 Tsaymi Israel runakunata kuyaq Tayta Diospa chipchipyaynin *querubinkunapa janancho kaykashqanpita Lugar Santuman yaykuna punkuman witirqan. Nirkurmi qelqakunanta tseqlancho tsararaq lïnu röpan jatishqa runata TAYTA DIOS qayaykur 4 kayno nirqan: “Intëru Jerusalén markapa aywaykur munashqäno kawaq runakunata urkuncho señalamuy. Paykunaqa melanaypaq mana alikunata rurapäkuptin pasaypami rabyakärin y lakikärin”.*
5 Tsaypita mayarqä tsay soqta runakunata Tayta Dios kayno nishqanta: “Qamkunapis paypa qepanta aywaykur intëru markata rikapakur tumamuy. Nirkur mana kuyapaypa ni juktapis mana kachaypa lapanta wanutsipäkamuy. 6 Awkinkunata, mözukunata, jipashkunata, wamrakunata y warmikunata lapanta wanutsipäkamuy. Señalashqa kaqkunata itsanqa ama wanutsinkitsu. Templu patiucho kaykaq runakunapita qalaykur wanutsipäkunki”.
Tsayno niptinmi templu patiu punkucho kaykaq mayor runakunata wanutsipäkurqan.
7 Nirkurmi kayno nirqan: “¡Runakunata wanutsir ayakunata templu patiuman tsutapäkuy! Tsaynöpami templu mana *sagrädunatsu kanqa”.
Tsayno niptinmi tsay arman aptashqa runakuna markacho señaläni runakunata wanutsinanpaq aywapäkurqan.
8 Tsayno wanutsiptinmi japaläna rikakurqä. Tsawraqa fiyupa lakikur pampaman lätakuykur kayno nirqä: “¡Ay TAYTA DIOS! Fiyupa rabyakushpayki ¿lapan Israel runakunatatsuraq ushakätsinki?”
9 Niptïmi kayno nimarqan: “Israel runakunapa y Judá runakunapa jutsankunaqa pasaypa espantaypaqmi kaykan. Kay nacionchöqa pasaypa wanutsinakuylami karkaykan. Tsaynölami kay markachöpis jutsa ruraykunalaman uman churakashqa karkaykan. Tsay runakunami nirkaykan kaypita aywakushqa kar jutsa rurashqankunata manana rikashqäta. 10 Tsaymi paykunataqa mana kuyapäshaqnatsu ni perdonashaqnatsu. Tsaypa trukanqa lapan rurashqanman tupumi juzgashaqpaq”.
11 Tsaypitami tseqlancho qelqakunanta tsararaykaq lïnu röpan jatishqa runa kutiykamur kayno nirqan: “Nimashqaykitaqa lapantami cumplishqäna”.