Daniel

Siria nacionpa y Egipto nacionpa mandaqnin reykuna pelyananpaq kashqanta wilashqan

11 Mastapis lïnu röpan jatishqa runa kayno nimarqan: “Media nacionpita kaq rey Darío juk watana mandaykänan witsanpis noqami *ángel Miguelta yanapar shakyätsirqä.

2 “Kanan wilashayki imapis pasananpaq kaqkunata. Persia nacionchömi kanqa kimsa reykuna. Paykunapa qepanmanpis mas juk reyraqmi kanqa. Tsay reymi kimsa kaq reykunapitapis mas rïcu kanqa.* Rïcu kashpan munayniyuq rikakurmi lapan mandashqan nacionkunawan Grecia nacionpa contran sharkunqa.

3 “Tsaypitanami mas munayniyuq rey kanqa.* Paymi maytsay nacionkunata vinciykur munaynincho tsararanqa. 4 Tsaynöpami atska nacionkunata juklayla kananpaq shuntanqa. Tsaypitanami chusku nacionman rakikanqa. Juk kanqa norti kaq lädupa, juk kanqa sur kaq lädupa, juk kanqa inti jeqamunan kaq lädupa y juk kanqa inti jeqanan kaq lädupa.

“Tsay reypa trukan manami paypita miraqkunatsu mandaq kanqa, sinöqa jäpa runakunami. Paykunaqa manami tsay rey munayniyuq kashqannötsu kanqa. 5 Tsayno kaptinpis Egipto nacionpa mandaqnin rey* munayniyuq rikakuptin soldädunkunapa capitannin mas munayniyuq rikakunqa.* Tsayno karmi atska markakunata munaynincho tsararanqa.

6 “Tsaypita watakuna pasarkuptinnami Egipto nacionpa mandaqnin reyqa Siria nacionpa mandaqnin reywan ali kawapäkunan kashqa jipash tsurinta paywan tätsinqa. Tsayno taykätsiptinpis tsay warmita, wawanta, runanta y soldädunkunata elaqpita wanutsinqa.* 7 Tsayno wanutsiptinmi tsay wanuq warmipa turin soldädunkunawan aywanqa Siria nacionpa mandaqnin reywan pelyananpaq. Murallashqa markaman yaykushpanmi vinciykur munayninman churanqa. 8 Tsaypita Egiptuman kutikurmi apakunqa ïdulukunata y qellaypita y qoripita rurashqa alhäjakunata. Tsaypitaqa Siria nacionpa mandaqnin reywan atska wata achäquita manami ashipänakunqatsu.

9 “Tsaypitanami Siria nacionpa mandaqnin rey aywar Egipto nacionpa mandaqnin reyta soldädunkunawan atacanqa. Tsayno karpis vinciyta mana kamäpakurmi markanpa kutikunqa.

10 “Tsaypitanami tsurinkuna kamarikärinqa Egiptuman kutir yapay atacananpaq. Tsaytsika soldädukunata shuntaykurmi apurädu aywapäkunqa imaykatapis apaq cargashqa mayuno. Reypa murallashqa markanman chayaykurmi atacanqa. 11 Tsaynami pasaypa rabyashpan Egipto nacionpa mandaqnin rey soldädunkunawan pelyananpaq yarqamunqa. Jina kaqtami vincipäkunqa tsaytsika soldädun kaykaptinpis. 12 Vincirkurnami tsay reyqa pasaypa ali chölu tukushpan contrankunata waranqanpa waranqanpa wanutsinqa. Tsayno kaptinpis tsay reyqa walka tiempulami munayniyuq kanqa.

13 “Watakuna pasarkuptinmi Siria nacionpa mandaqnin rey yapay shuntanqa atska soldädukunata. Tsay soldädukunaqa mas atska y mas ali kamarikushqami kanqa. Paykunawanmi kutinqa Egipto nacionpa mandaqnin reyta atacananpaq.

14 “Tsay witsanmi Egipto nacionpa mandaqnin reypa contran atskaq sharkapäkunqa. Tsaynölami achäquita ashipaq Israel mayikikunapis paypa contran sharkapäkunqa. Tsayno sharkurpis mana vinciptinmi revelacioncho Tayta Dios tantiyatsishqankuna cumplinqa.

15 “Siria nacionpa mandaqnin reynami soldädunkunawan aywaykur murallashqa marka waqtanman alpata qotunqa tsaypa yaykuykur atacananpaq. Atacaptinmi Egipto nacionpa soldädunkuna mayjina ali chölu karpis ichipayta mana kamäpakunqatsu. 16 Tsaynöpami atacaq aywaq soldädukuna tsay markata chipyaq ushakätsinqa. Nirkurmi kuyaylapaq Israel naciontapis munayninman churanqa.

17 “Tsaypitanami Siria nacionpa mandaqnin reyqa Egipto nacionta imanöpapis vinciyta munar tsay nacionpa mandaqnin reywan warmi tsurinta tätsinqa. Tsayno tätsinqa warmi tsurin rikapakurir wilaptin atacananpaq yarparmi. Tsayno tätsiptinpis manami yarpashqannötsu kamakanqa.

18 “Tsaymi Siria nacionpa mandaqnin rey juk lädupa aywar* lamar kuchuncho kaykaq atska markakunata vincinqa. Jina kaqtami juk nacionpita shamuq capitán* vincinqa. Tsaymi tsay reyqa pasaypa penqaytukushqa 19 murallashqa markanman kutikunqa. Tsaychömi desgracia pasaptin wanur ushakanqa.

20 “Tsay reypa trukannami juk rey yaykunqa. Paymi mandashqan nación mas munayniyuq kananta munar impuestuta cobramunanpaq runata kachanqa. Guërra mana kaykaptinmi manaraqpis aykälatana tsay reypis wanunqapaq.

Siria nacioncho fiyu runa rey kashqan

21 “Tsay reypa trukannami fiyu runa lulakuypa yaykunqa rey kananpaq.* Tsayno yaykunqa mana töcaykaptinmi. 22 Nirkurmi cargashqa mayu imaykatapis apaqno contran sharkuq runakunata lapanta wanutsinqa. Tsaynölami wanutsinqa Tayta Diosta sirviq mandaq cüratapis.* 23 Tsay reyqa imaykatapis promitirmi engañaypa munayniyuq rikakunqa. Tsayno rikakunqa walkala runakuna favornin kaptinmi.

24 “Tsay runami rïcu runakuna tashqan markakunaman soldädunkunawan elaqpita yaykunqa imaykankunatapis apakunanpaq. Manami tsay nacioncho mayqan mandaqpis payno rurayta kamäpakushqatsu. Tsaynöpis guërracho vincirkur apashqankunatami yanapaqnin runakunata aypunqa. Pasaypami yarpachakunqa murallashqa markakunata imanöpapis atacananpaq. Itsanqa juk tiempulami tsayno kanqa.

25 “Tsay reyqa kalpanman yärakurmi Egipto nacionpa mandaqnin reyta atska soldädunkunawan atacanqa. Tsayno atacaptinmi Egipto nacionpa mandaqnin reyqa atska soldädukunata shuntaykur ichipanqa. Tsayno ichiparpis yärakushqan runakuna lutanta yätsishqa kaptinmi vinciyta mana kamäpakunqatsu. 26 Mikur upur juntakashqan amïgunkunapis ushakänantami munanqa. Tsay pelyachömi tsaytsika soldädunkuna wanupäkunqa.

27 “Tsaypitanami tsay ishkan reykuna yanapanakunanpaq wilanakurpis shonqunkunachöqa mana alita yarpapäkunqa. Tsayno kaptinpis ushakänanta Tayta Dios manaraq munaptinmi tsay reykuna munashqannöqa mana kamakanqatsu.

28 “Siria nacionpa mandaqnin reynami guërrapita shuntashqan riquëzakunata apakurkur markanpa kutikunqa. Markanman kutiqnömi Tayta Diosta adoraqkunata atacanqa. Tsayno yarpashqankunata rurarkurnami markanman chayanqa.

29 “Desgracia pasananpaq höra chayamuptinmi tsay reyqa Egipto nacionta yapay atacanqa. Puntata vincishqa karpis manami yapay vincinqanatsu. 30 Tsayno mana vincinqatsu Quitimpita* soldädukuna *büquinkunawan shamushpan ichipaptinmi.

“Tsaymi ima ruraytapis mana kamäpakur pasaypa rabyashpan markanpa kutiqno Diosta adoraqkunata yapay atacanqa. Diosta mana adoraq runakunapitami itsanqa kuyatsikunqa. 31 Soldädunkunami templuman yaykuykur *impüruyätsinqa.* Sacrificiuta Tayta Diospaq cürakuna waran waran rupatsinantapis manami kachapanqanatsu. Tsaypa trukanqa Tayta Dios pasaypa mana munashqan kaqtami templuman churanqa.*

32 “Yanapananta munarmi tsay reyqa Tayta Diosta mana cäsukuqkunata tukuyta promitir engañanqa. Tayta Diosman yärakuqkunami itsanqa mana mantsakuypa payta ichipanqa. 33 Tsaymi tantiyakuq runakuna atska runakunata yätsinqa Tayta Diosta imaypis sirvipäkunanpaq. Tsayno kaptinpis wakintami espädawan wanutsipäkunqa, wakintami rupatsipäkunqa, wakintami prësu apakärinqa y wakinpatanami imaykantapis apakärinqa. 34 Tsayno nakaykätsiptinmi wakin runakuna tsay tantiyakuq runakunata yanapanqa. Wakinnami itsanqa janan shonqula paykunawan juntakanqa.

35 “Wakin tantiyakuq runakunata nakatsipäkuptinmi tantiyakärinqa imano nakarpis Tayta Diosman yärakur jutsata mana ruraypa kawapäkunanpaq. Tantiyakuqkuna tsayno nakapäkunqa tiempun cumplishqanyaqmi.

36 “Tsay reyqa munashqantami ruranqa. Tsaymi runa tukushpan lapan dioskunapita mas munayniyuq kashqanta yarpar* lapanpaq munayniyuq Tayta Diosta manakaqman churar imaykatapis rimanqa.* Tsayno kaptinpis Tayta Dios castiganan hörayaqlami munayniyuq kanqa. Pasananpaq kaqkunaqa pasanqami.

37 “Tsay reyqa ima diostapis mana respitarmi unay aylunkuna adorashqan dioskunata ni warmikuna adorashqan dioskunatapis mana cäsupanqatsu. Tsaypa trukanqa yarpanqa lapan dioskunapitapis mas munayniyuq kashqantami. 38 Itsanqa unay aylunkuna mana adorapäkushqan diostami adoranqa. Tsay diosqa murallashqa markakunata cuidaq diosmi kaykan. Payta adorananpaqmi apanqa qorita, qellayta, kuyaylapaq rumikunata y chanin cuestaqkunata.

39 “Unay aylunkuna mana adorashqan diosman yärakurmi ali murallashqa munayniyuq markata atacanqa. Vincirkurmi favornin kaq runakunata churanqa atska markakunacho gobernador kananpaq. Nirkurnami yanapashqanpita kushikur chakrakunatapis qoykunqa.

40 “Höra chayamuptinnami tsay reyta Egipto nacionpa mandaqnin rey atacanqa. Tsayno atacaqtami cargashqa mayu imaykatapis apaqno carrëtankunawan, cawallu muntashqa soldädunkunawan y atska büquinkunawan atacar intëru nacionta vincinqa.

41 “Tsaynöpis Israel nacionman yaykuykurmi tsaytsika runakunata wanutsinqa. Edomcho y Moabcho taq runakunami itsanqa Amóncho taq tsaytsika runakunawan makipita qeshpipäkunqa.

42 “Tsaynöpis tsay reyqa munayninmanmi churanqa atska nacionkunata. Egipto nacionpis manami qeshpinqatsu. 43 Nirkurmi Egiptupita apakunqa qorita, qellayta y lapan riquëzankunata. Munayninmanmi churanqa Libia nacionta y Etiopía nacionta.

44 “Tsaypitanami inti jeqamunan kaq läducho y norti kaq läducho contran sharkushqanta wilapäkunqa. Tsaymi pasaypa rabyashpan contran sharkuqkunata pïmaytapis wanutsiyta munar soldädunkunawan aywanqa. 45 Lamarpita kuyaylapaq *sagrädu jirkanman aywaq nänichömi campamentuta sharkatsinqa. Tsaycho kaykaptinmi pipis mana yanapaptin payta wanutsipäkunqa”.