Daniel
Wayi tapiacho juk maki qelqashqan
5 Babiloniapa mandaqnin rey Belsasar fiestata rurarmi waranqa (1,000) mandäshiqkunata qayatsirqan juntu mikupäkunanpaq. Tsaychömi paykunawan vïnuta upupäkurqan shinkashqanyaq. 2 Shinkakurkurmi rey Belsasar ordenarqan papänin Nabucodonosor Jerusalén templupita apamushqan qori y qellay väsukunata jorqamunanpaq. Tsaykunata jorqatsimurqan mandäshiqninkunawan, warminkunawan y concubïnankunawan upyapäkunanpaqmi. Ordenashqanno apamuptinmi upyapäkurqan. 3 - 4 Vïnuta upyashpanmi qoripita, qellaypita, broncipita, fiërrupita, qerupita y rumipita rurashqa diosninkunata alabapäkurqan.
5 Tsay hörami palaciupa sälancho runapa makin elaqpita rikakämur mechëru atsikyapaykaq qepan yoraq tapiacho qelqarqan. Tsay qelqaykaq makita rikaykurmi 6 rey pasaypa almatakashqa rikakurqan. Qonqurninpis pasaypa siksikyaptinmi ichiränanpaq kalpanpis mana karqantsu. 7 Tsawraqa brüjukunata, qoylar estudiaqkunata y rikakuqkunata qayaykatsir rey kayno nirqan: “Mayqaykitapis kay qelqaraykaqta liyirkur ima niykashqantapis tantiyatsimaptikiqa granäti röpatami jatipäshayki. Tsaynöpis qoripita rurashqa walqatami walqapäshayki. Nirkurmi noqawan juntu mandanaykipaq churashayki”.
8 Qayatsishqan yachaq runakunaqa tapiacho qelqaraykaqta liyirpis manami tantiyapäkurqantsu. Tsaymi reyta ima niytapis mana kamäpakärirqantsu. 9 Tsaymi Belsasarqa fiyupa mantsakar pasaypa almatarqan. Mandäshiqninkunapis manami ima ruraytapis kamäpakurqantsu.
10 Rey y mandäshiqninkuna bülla ruraykaqta mayarmi chakwan reina yaykurqan mikurkaykashqanman. Tsaychömi reyta kayno nirqan: “¡Qamla imayyaqpis rey kaykulay! Ama mantsakaytsu ni almatakaytsu. 11 Kay mandaykashqayki nacioncho kaykaq juk runatami lapan dioskuna shumaq yanapan. Papäniki Nabucodonosor mandaq kashqan witsanmi dioskunanöraq tsay runaqa imatapis shumaq tantiyaq. Tsaymi papäniki payta churarqan lapan musyakuqkunapa, brüjukunapa, qoylar estudiaqkunapa y rikakuqkunapa mandaqnin kananpaq. 12 Paypa jutin Daniel kaptinpis jutinta papänikimi trukatsirqan Beltsasar jutin kananpaq. Danielqa imatapis shumaq tantiyakuq karmi runakuna sueñushqan imapaq kashqantapis musyan. Tsaynölami sasa kaptinpis shumaq arreglananpaq tantiyan. Payta qayatsimuy tapiacho qelqaraykashqan imata niykashqantapis tantiyatsishunaykipaq”.
13 Tsayno niptinmi Danielta qayaykatsir rey tapurqan kayno nir: “¿Qamku kaykanki Judá nacionpita papänï prësu apamushushqayki runa? 14 Qampaqmi wilapäkamashqa dioskuna shumaq yanapashushqaykita. Tsayshi qamqa imatapis shumaq tantiyanki.
15 “Perqacho qelqaraykaqta liyirkur imapaq kashqantapis nimänanpaqmi yachaqkunata y brüjukunata qayatsimushqä. Qelqaraykaqta liyirpis manami musyapäkuntsu imata niykashqantapis. 16 Qampaqmi wilamashqa sasa tantiyaypaq kaqkunatapis tantiyashqaykita y mayjina sasa kaptinpis shumaq arreglashqaykita. Tsaymi manakü tapiacho qelqaraykaqta liyirkur imapaq kashqantapis tantiyatsimänaykipaq. Tantiyatsimaptikiqa granäti röpatami jatipäshayki. Tsaynöpis qoripita rurashqa walqatami walqapäshayki. Nirkurmi mandashqä nacioncho noqawan juntu mandanaykipaq churashayki”.
17 Tsayno niptin Danielqa kayno nirqan: “Tsay qaramänaykipaq* kaqkunaqa kikikipaq kakutsun o jukta qaraykuy. Perqacho qelqaraykaqta liyirkurmi imapaq kashqantapis tantiyatsishayki.
18 “Tayta rey, papäniki Nabucodonosorta munayniyuq Tayta Diosmi yanaparqan maytsay nacionkunata munayninman churananpaq, respitashqa kananpaq y mandaq kananpaq. 19 Payqa munayniyuq karmi pitapis munashqan kaqta wanutsiq y mana munashqan kaqtana mana wanutsiqtsu. Wakintana churaq mas mandaq kananpaq y wakintana qarquq mandaq kashqanpita. Tsayno munayniyuq kaptinmi lapan nacioncho y markacho taq runakuna ima idiömata parlaq karpis payta mantsakärirqan.
20 “Tsaypitanami orgullösu rikakur munashqanta ruraptin mandaq kashqanpita Tayta Dios qarqurqan. 21 Runa mayinkunapita qarquptinmi yarpayninpis uywapano rikakurqan. Tsaymi chucaru bürrukunawan juntu tashpan töruno qewata mikur kawarqan. Cuerpuntapis shulyami ushmarqan. Tsayno kawarqan Tayta Diosla lapan mandaqkunapaqpis munayniyuq kashqanta tantiyakunanyaqmi. Tayta Dioslami nacionta mandananpaq pitapis munashqan kaqta churan.
22 “Nabucodonosorpa tsurin kaykar tsayno pasashqanta musyaykarpis orgullösumi rikakushqanki, tayta. 23 Tsaymi jana patsacho kaykaq Tayta Diosta rabyanätsir templuncho manijashqan väsukunata jorqatsimushqanki. Tsaykunawanmi vïnuta upyashqanki kikikipis, mandäshishuqnikikunapis, warmikikunapis y *concubïnaykikunapis. Nirkurmi alabashqanki qoripita, qellaypita, broncipita, fiërrupita, qerupita y rumipita rurashqa dioskunata. Tsay dioskunaqa manami rikantsu ni mayantsu ni imatapis musyantsu. Munayniyuq Tayta Diostami itsanqa mana alabashqankitsu. Payta rabyanätsishqanki paypita lapanta chaskiykarpis. Paymi rey kanaykipaqpis churashushqanki.
24 “Tsaymi makita Tayta Dios kachamushqa tapiaman qelqananpaq. 25 Tsay qelqatsishqancho kaynömi niykan: ‘Yupashqa, yupashqa, pësashqa, rakishqa’.* 26 ‘Yupashqa’ niykan mandaq kashqayki junaqkuna yupashqala kaptinmi. Tsay junaqkuna tsaylachöna ushakänanpaqmi Tayta Dios nishqa. 27 ‘Pësashqa’ niykan Tayta Dios balanzacho pësashuptiki pësuyki pasaypa pishiptinmi.* 28 ‘Rakishqa’ niykan mandashayki nacionta rakirkur Media y Persia runakunapa makinman churashunaykipaq destinashqa kaptinmi”.
29 Tsayno wilaptin Belsasarqa yanapaqninkunata nirqan granäti röpata Danielta jatipänanpaq y qoripita rurashqa walqatapis walqapänanpaq. Tsaynöpis paywan juntu mandananpaqmi churarqan.
30 Tsay tsakaymi Babilonia* runakunapa mandaqnin rey Belsasarta wanutsipäkurqan. 31 (6.1) Nirkurmi Mediapita kaq rey Darío Babilonia nacionta munayninman churarqan. Darío tsayno rurarqan soqta chunka ishkay (62) watayuq kaykarmi.