Levítico
Consagratsina sacrificiupita masta tantiyatsishqan
6 (5.20) Mastapis Moisésta TAYTA DIOS kayno nirqan: 2 (5.21) “Pipis TAYTA DIOSTA rabyanätsishpan runa mayinpa paytakuyninta pakapar, manaykushqanta mana kutitsir, imantapis suwapar, imantapis qechur, 3 (5.22) pï oqrapakushqantapis tarikur ñëgar, lulakushpan jurar o imatapis manakaqkunata rurarqa 4 (5.23) jutsayuqmi kaykan. Tsayno rurashqa karqa duëñunta kutitsinqa suwapashqanta, qechushqanta, paytakushqanta y tarikushqantapis. 5 (5.24) Lulakur jurashqa karpis apakushqanta kutitsinqa. Kutitsipakushqan jananman quinta parti masta päganqa. Consagratsina sacrificiutapis tsay junaqlami Tinkuna Tolduman apamunqa. 6 (5.25) Consagratsina sacrificiupaqqa sänu carnita TAYTA DIOSPA nawpanman apaykur cürata entreganqa. Cüra nishqannömi tsay carnipa chanin kanqa. 7 (5.26) Carnipa wiranta TAYTA DIOSPA nawpancho cüra rupatsiptinmi jutsayuq runa perdonashqana kanqa”.*
Rupatsina sacrificiupita masta tantiyatsishqan
8 (1) Mastapis Moisésta TAYTA DIOS kayno nirqan: 9 (2) “Rupatsina sacrificiuta rupatsinanpaqqa Aarónta y tsurinkunata kayno yätsinki: ‘Rupatsina sacrificiuta rupatsirqa *altarcho kaykaq shanshacho warayta rupakunanpaq kachaykunqa. 10 (3) Patsa wararkuptinna cüraqa lïnupita rurashqa röpata y calzoncïlluta jatikunqa. Nirkurna altarcho rupatsishqan uywapa uchpanta shuntarkur altarpa nawpalanman qotuykunqa. 11 (4) Tsaypita jatirashqan röpata trukakurir *püru sitiuman uchpata apanqa. Tsayqa kanqa campamentupita juk läduchömi.
12 (5) “ ‘Altarchöqa imaypis mana upiypa nina rupananpaq cüra cada tuta yantata yapapanqa. Nirkur tsay jananman rupatsina sacrificiupaq aytsata churanqa. Tsaynöla jawka kawakuy sacrificiupaq apamushqan wirata tsaycho rupatsinqa. 13 (6) Altarchöqa mana upiypa nina imaypis rataykanqa’ ”.
Tsaki mikuy ofrendapita masta tantiyatsishqan
14 (7) “ ‘Pipis tsaki mikuyta ofrendapaq apamuptin Aarónpita miraq cürakuna *altar nawpanman churapäkunqa. Tsay altarqa kaykan TAYTA DIOSPA nawpanchömi. 15 (8) Juk cürana aceitiwan tsapushqa harinata juk aptayta rakinqa. TAYTA DIOS imaypis yarpänanpaqmi ofrenda janancho kaykaq inciensutawan altarcho rupatsinqa. Rupatsishqanpa ali asyayninta* mayarmi TAYTA DIOS kushikunqa. 16 (9) Wakin kaq tsaki mikuytaqa Tinkuna Toldu *sagrädu patiu kaqlacho Aarón y tsurinkunapis levadüraynaqlata mikunqa.
17 (10) “ ‘Altarcho ofrendata rupatsishqanpita putsuq kaqmi cürakunapa derëchun kanqa. Tsay mikuykuna purificatsina sacrificiuno y consagratsina sacrificiuno sagrädu kaptinmi levadürata mana winanqatsu. 18 (11) TAYTA DIOSPAQ apamushqan ofrendakunapita putsuq kaqtaqa Aarónpita miraq cürakuna imaypis mikunqa. Tsay nishqäqa imayyaqpis leymi kanqa qamkunapaq y qamkunapita miraqkunapaqpis. Tsay mikuyta pipis o imapis töpashqan kaqkunaqa sagrädunami rikakunqa’ ”.
Cüra kayta qalaykur ofrendata apananpaq tantiyatsishqan
19 (12) Mastapis Moisésta TAYTA DIOS kayno nirqan: 20 (13) “Cüra kananpaq churashqan junaq Aarón y paypita miraqkuna tsaki mikuy ofrendata apamunqa ishkay kïlu harinata. Ofrendata waran waran rupatsishqannöla pulanta tutapa y pulantana tardipa *altarcho rupatsinqa. 21 (14) Altarcho rupatsinanpaqqa ofrenda apamushqanta sartincho aceitiwan ankanqa. Nirkurna taksha takshala pakirkur altarcho rupatsinqa. Altarcho rupatsishqanpa ali asyayninta mayarmi TAYTA DIOS kushikunqa. 22 (15) Aarónpa trukan tsurinkunapita jukna mandaq cüra yaykur imaypis tsaynöla ruranqa. Tsay ofrendata lapantami rupatsinqa. Tsayno imaypis rurananpaqmi TAYTA DIOS nishqa. 23 (16) Cürakuna apamushqan ofrendataqa pipis ama mikunqatsu. Tsaykunataqa lapantami rupatsinqa”.
Purificatsina sacrificiupita masta tantiyatsishqan
24 (17) Mastapis Moisésta TAYTA DIOS kayno nirqan: 25 (18) “Purificatsina sacrificiuta rupatsinanpaqqa Aarónta y tsurinkunata kayno yätsinki: ‘Tsay sacrificiu *sagrädu kaptinmi TAYTA DIOSPA nawpancho uywata pishtanqa rupatsina sacrificiupaq pishtakunan kaqlacho. 26 (19) Tinkuna Toldu sagrädu patiulachömi wiranta rupatsiq cüra aytsata mikunqa. 27 (20) Imapis tsay aytsaman töparqa sagrädumi kanqa. Tsay uywapa yawarnin röpanman pilchiptinqa sagrädu lugarlacho taqshanqa. 28 (21) Sacrificiupaq pishtashqan uywapa aytsanta mitu mankawan yanurqa tsay mankata pakinqa. Bronci mankawan yanurqa shumaq maylanqa.
29 (22) “ ‘Sacrificiupaq pishtashqan uywapa aytsan sagrädu kaptinmi cürakunala mikupäkunqa. 30 (23) Runakunata Tayta Dios perdonananpaq uywapa yawarninta Lugar Santuman apamuptinmi* itsanqa tsay uywapa aytsanta mana mikunqatsu. Mikunanpa trukanqa lapanta rupatsinqa.