Amós
Israel y Judá runakunata Tayta Dios juzgananpaq nishqan
3 Israel y Judá runakuna, Egiptupita jorqamushuqniki TAYTA DIOS kayno nishqanta mayapäkuy:
2 “Kay patsacho tsaytsika runakuna kaptinpis qamkunalatami akrashqä kuyashqä runakuna kanaykipaq.*
Tsaymi jutsata rurapäkushqaykipita castigashayki”.
3 Maypapis ishkan aywananpaqqa puntata wilanakunraqmi.
4 Leonpis munticho qaparan uywata mikunanpaq tarirraqmi.
León malwapis machaypita chikikamun mikunanpaq tsarirraqmi.
5 Pishqukunapis trampaman yaykun ima mikuytapis churapaptinraqmi.
Ima uywatapis tsarirraqmi trampapis juchun.
6 *Cornëtatapis tukan markacho imapis mantsariypaq kaptinraqmi.
Tsaynölami markacho ima desgraciapis pasan Tayta Dios castigaptinraq.*
7 Sirviqnin profëtakunata manaraq wilarqa TAYTA DIOS manami imatapis espantaypaq kaqkunata rurantsu.*
8 León qaparashqanta mayar ¿piraq mana mantsakunmantsu?
TAYTA DIOS nishqanta mayar ¿piraq mana wilakunmantsu?*
9 Wilakuqkuna, Asdod markaman aywaykur nishqäta palaciuncho reyta wilapay.
Egiptumanpis aywaykur nishqäta palaciuncho reyta wilapay.
Wilapar kayno nipäkunki:
“Samaria markaman y nawpan jirkankunaman lapayki shapäkamuy.
Tsaychömi rikapäkunkipaq markacho lutanta rurarkaykaqta y mana kuyapaypa runakunata nakarkaykätsiqta.
10 Paykunaqa ali rurayta manami yachapäkuntsu.
Suwakushqalantami palaciunkunachöpis tsararkaykan”.
11 Tsayno kashqanpitami Samaria runakunata TAYTA DIOS kayno nin:
“Contraykikuna maytsaypita shamurmi atacashunkipaq.
Amparakunaykipaq sharkatsishqayki jatusaq perqa murällakunatapis lapantami juchutsinqapaq.
Palaciuykikunapitapis lapan tarishqantami apakärinqapaq”.
12 TAYTA DIOSMI kayno nin:
“Uyshata leonpa shiminpita qechuptin atakshulan o rinrilan quëdashqannölami Samariacho taq Israel runakunapis walkaqla quëdanqa.
Damascupita rantimushqan kuyaylapaq sillëtacho jamaraq runakunapis walkaqlami quëdanqa”.
13 Lapanta mandaq TAYTA DIOS kaynömi nin:
“Nishqäkunata shumaq mayapäkuy.
Jacobpita miraq lapan runakunata kayno wilapäkuy:
14 ‘Jutsa rurashqanpita Israel runakunata juzganä junaq Bet-elcho kaykaq *altarkunata lapantami ushakätsishaq.*
Ushakätsiptïmi altarpa esquïnancho kaykaq waqrankuna pakikar pampaman shikwanqa.
15 Usya witsan tänanpaq ruratsishqan wayitapis y tamya witsan tänanpaq ruratsishqan wayitapis lapantami juchutsishaq.
*Marfilwan adornashqa wayikunatapis lapantami juchutsishaq.
Lapan jatun wayikunatami ushakätsishaq’ ”.
TAYTA DIOSMI tsayno nin.