Jonás
Nínivicho taq runakuna jutsa rurashqankunata kacharishqan
3 Tsaypitanami Jonásta TAYTA DIOS yapay kayno nirqan: 2 “Nínive jatun markaman aywar noqa nishqäta wilakuy”.
3 Tsawraqa TAYTA DIOS nishqanno Nínive jatun markaman Jonás aywarqan. Tsay markataqa kimsa junaqraqmi pipis puriyta ushapäkuq.
4 Níniviman chayaykurmi juk junaq qoyayta wilakur Jonás purirqan. Wilakurmi kayno nirqan: “¡Kananpita manaraq chusku chunka (40) junaq kaptinmi kay markata Tayta Dios ushakätsinqa!”
5 Tsayno wilakushqanta mayarmi Nínive runakuna criyishpan rïcupis waktsapis qachqa röpata jatikurkur ayunapäkurqan.*
6 Jonás wilakushqankunata mayaykurmi Nínivicho mandaq reypis qachqa röpata jatikurkur uchpaman jamaykur Tayta Diosta manakurqan. 7 Tsaynöpis Nínive runakuna ayunapäkunanpaq autoridäninkunawan wilakatsirqan kayno nir: “Pipis ama mikutsuntsu ni yakutapis ama uputsuntsu. Uywankunata ama mitsikutsuntsu ni yakutapis ama uputsitsuntsu. 8 Tsaypa trukanqa lapan runakuna qachqa röpata jatikurkur lapan shonqunwan Tayta Diosta manakäritsun. Tsaynöpis jutsa rurayta y wanutsinakuyta kacharir alina kawapäkutsun. 9 Tsayno ruraptintsiqa capazchari Tayta Dios kuyapämashpantsi mananapis ushakätsimashwantsu”.
10 Nínive runakuna jutsa rurashqanta kachariptinmi ushakätsinanpaq wilakatsishqa kaykarpis Tayta Dios manana ushakätsirqannatsu.