Números
Aarón y María Moiséspa wasanta rimashqan
12 Hazerotcho cusita warmiwan tashqan jananmi Aarón y panin María Moiséspa wasanta rimar 2 kayno nipäkurqan: “Manami Moiséslawantsu TAYTA DIOS parlashqa, sinöqa noqantsiwanpis parlashqami”.
Tsayno rimapäkushqantami TAYTA DIOS mayarqan. 3 Paykuna tsayno rimaptinpis kay patsacho pïmaypitapis mas ali runa kar Moisés manami imatapis rimakurqantsu.
4 Tsaymi Moisésta, Aarónta y Maríata TAYTA DIOS kayno nirqan: “Tinkuna Tolduman kimsayki aywapäkuy”.
Tsayman kimsan aywapäkuptinmi 5 Tinkuna Toldu punkuman TAYTA DIOS ichiraykaq pukutaycho urämurqan. Tsaychönami Aarónta y Maríata qayaptin nawpanman aywapäkurqan. 6 Paykunatami TAYTA DIOS kayno nirqan: “Nishqäta shumaq mayapäkamay. Qamkunacho profëtakunataqa revelacioncho y sueñuyninchömi parlapä. 7 Wayïta* ali rikaq sirvimaqnï Moiséstaqa manami tsaynötsu parlapä. 8 Paytaqa mana tumatsipaylapami parlapä. Kikïtami rikaman. Tsayno kaykaptinqa ¿imanirtaq wasanta rimarkaykanki?”
9 Nirkushpanmi TAYTA DIOS fiyupa rabyashqa aywakurqan. 10 Tinkuna *Sagrädu Toldupita pukutay aywakuptinmi jinan höra Maríapa intëru cuerpun *leprawan yoraq rikakurqan. Tsayta rikaykurmi 11 Moisésta ruwakur Aarón kayno nirqan: “Jutsäkuna atipashqa upano rimapäkushqäpita ama castigaykamaytsu, tayta. 12 Mamanpa pachancho wanushqa wamrapa qaran ismushqanömi Maríapa qaranpis kaykan. Aliyänanpaq TAYTA DIOSTA manakuykulay, tayta”.
13 Tsawraqa TAYTA DIOSTA ruwakur Moisés kayno nirqan: “Tayta Dios, Maríata aliyaykatsilay”.
14 Tsaymi TAYTA DIOS kayno nirqan: “Qaqlancho papänin toqapaptin ¿manaku qanchis junaqyaq penqakushqa kanqa? Tsayno kaptinqa campamentupita qanchis junaqyaq Maríata qarquy.* Tsaypitaraqmi kutimunqa”.
15 Tsaymi campamentupita qanchis junaqyaq Maríata qarqurqan. Pay kutimushqanyaqmi Israel runakunaqa jinalancho karkaykarqan. 16 Tsaypitanami Israel runakuna Hazerotpita aywakur Parán chunyaq jirkaman chayapäkurqan. Tsaychömi toldunkunata ichitsir patsakärirqan.