Números
Aarónpa tukrun tsintsimushqan
17 (16) Tsaypitanami Moisésta TAYTA DIOS kayno nirqan: 2 (17) “Cada trïbu Israel runakunapa mandaqninkunata niy tukrunta apamunanpaq. Lapan apamuptinmi kanqa chunka ishkay tukrukuna. Cada tukruman jutinkunata qelqanki. 3 (18) Leví trïbupa kaq tukrunmanqa Aarónpa jutinta qelqanki. Cada trïbupa mandaqninpami juk tukru kanqa. 4 (19) Tsay tukrukunata churanki Tinkuna Toldu rurincho kaykaq *Pactu Babul nawpanman. Tsaychömi qamwan cadala tinkuntsi. 5 (20) Akrashqä runapa tukrun tsintsimuqta rikashpanmi tantiyapäkunqa qamta y Aarónta akrashqäta. Tsaymi wasaykita pipis mana rimanqanatsu”.
6 (21) TAYTA DIOS nishqannöla Israel runakunata Moisés wilaptinmi cada trïbupa mandaqnin tukrunta Moisésta entregarqan. Aarónpa tukrunpis paykunapa tukrunkunawan kaptinmi chunka ishkay tukrukuna karqan. 7 (22) Tsay tukrukunatami Moisés churarqan *Pactu Toldu rurinman TAYTA DIOSPA nawpancho kananpaq. 8 (23) Tsaypita jukaqnin junaq Tayta Dioswan Pactu Tolduman aywarmi Moisés tarirqan Leví trïbu Aarónpa tukrun tsintsiraykaqta*, murkuraykaqta, waytaraykaqta y almendras poquraykaqta. 9 (24) Tsawraqa TAYTA DIOSPA nawpanpita lapan tukrukunata Moisés jorqamurqan mayqanpa tukrun tuktushqantapis Israel runakuna rikananpaq. Nirkurnami tukrunkunata cada mandaqkuna shuntakärirqan.
10 (25) Tsaypitanami Moisésta TAYTA DIOS kayno nirqan: “Aarónpa tukrunta kutitsiy Pactu Babul nawpanman. Tsayman churanki mana wiyakuq Israel runakuna tantiyakur conträ mana rimananpaq. Tsaynöpami mana wanupäkunqanatsu”.
11 (26) TAYTA DIOS nishqannölami lapantapis Moisés rurarqan. 12 (27) Tsaypitanami Israel runakuna Moisésta kayno nirqan: “¡Kananchi kananlaqa! ¡Kananqa lapanïchari ushakäshaq! 13 (28) Mayqanpis TAYTA DIOSPA *Sagrädu Toldunman witipaq kaq wanunanpaq kaykaptinqa lapanïchari wanur ushakäshaq”.