Josué
Judá trïbu runakunapa lindërunkuna mayninpa kashqanpis
15 Judá trïbu runakuna aylunpa aylunpa posisionta suertita jitaypa chaskishqanqa Edom nacionpa lindërunyaqmi chayarqan. Sur kaq lädupami Zin nishqan chunyaq jirkayaq chayarqan. 2 Sur kaq läducho kaykaq lindërunqa *Kachi Lamarpa ura kuchunpitami qalaykurqan. 3 Tsaypita Acrabim cuestapa pasar Zin nishqan chunyaq jirkaman chayarqan. Tsaypa pasarnami Cades-barnea sur kaq lädupa aywararqan hasta Hezrónyaq. Tsaypitami witsaypana Adaryaq aywarar Carcáyaq tumarqan. 4 Carcápitana pasarqan Asmónman. Asmónpa pasar Egipto raqrayaq chayarqan. Tsaypitanami lindërun chayarqan Mediterráneo Lamaryaq. Tsaynömi lindërun karqan sur kaq lädupa.
5 Inti jeqamunan kaq lädupana lindërun karqan Kachi Lamar kuchunpa hasta Jordán mayuman chayashqanyaq. Tsaypitaqa norti kaq lädupana lindërun qalaykurqan.
6 Norti kaq lindërun witsaypa aywarar chayarqan Bet-hoglayaq. Tsaypitami Bet-arabápa norti kaq lädupa pasar Bohán Ben-Rubén qaqayaq chayarqan. 7 Tsaypita Acor Pampapa pasar Debirman chayashpan Gilgalman tumamurqan. Gilgalqa Adumínpa sur kaq tsimpanchömi karqan. Tsaypita lindërun En-semescho pukyu kaykaqpa pasar En-rogel pukyuyaq aywararqan. 8 Tsaypitami jebuseo runakuna tashqan sur kaq lädupa pasar Ben-hinom raqrapa pasararqan. Tsaychöqa Jerusalénmi kaykan. Ben-hinom raqrapita witsaypana aywarar chayarqan jirkan jananyaq. Tsay jirkanqa Jerusalénpita inti jeqanan kaq lädupami kaykan. Tsaypitanami lindërun chayarqan Refaim pampa norti kaq kuchunyaq. 9 Tsaypa pasar jirkan jananpitaqa lindërun urararqan Neftoacho kaykaq pukyuyaqmi. Tsaypita pasar Efrón jalqakunacho kaykaq markakunayaq chayarqan. Tsaypitami tumarqan Baala markapa. Baalapa jukaq jutinqa Quiriat-jearimmi karqan. 10 Baalapita pasar inti jeqanan kaq lädupa tumarqan Seir jalqakunapa. Tsaypitami Jearim jalqakuna norti kaq läducho kaykaq Quesalónpa pasar uraypana aywararqan Bet-semespa Timnaman chayananyaq. 11 Tsaypitami Ecrón marka norti kaq lädu jirkanpa pasar tumarqan Sicrónpa y Baala jalqakunapa. Tsaypita Jabneelpa pasar Mediterráneo Lamarmanmi tinkurqan.
12 Inti jeqanan kaq läduchöqa Mediterráneo Lamar kuchunpami lindërun aywararqan.
Tsaypami Judá trïbu runakuna aylunpa aylunpa chaskishqan posisionpa lindërun karqan.
Hebrónta y Debirta Caleb qechushqan
13 TAYTA DIOS nishqannömi Jefonipa tsurin Calebta Josué posisionta aypurqan Judá trïbu runakunapa posisionnin kaqcho. Tsaynöpami Caleb chaskirqan Quiriat-arbata. Tsay markata sharkatsiq Arba jutiyuq runapitami anaceo runakuna mirarqan. Quiriat-arbapa jukaq jutinqa Hebrónmi kaykan. 14 Anaceo runakunaqa Sesai aylu, Ahimán aylu y Talmai aylumi karqan. Tsay kimsa aylu anaceo runakunatami markankunapita Caleb qarqurqan.*
15 Tsaypitanami Debircho taq runakunata atacananpaqna yaykapäkurqan. Tsay markapa unay jutinmi karqan Quiriat-sefer. 16 Tsaymi Caleb kayno nirqan: “Pipis tsay markaman pelyaq yaykuykur vinciq kaqtami warmi tsurï Acsawan tätsishaq”.
17 Tsayno niptinmi Cenazpa tsurin Otoniel tsay markaman yaykuykur tsaycho taqkunata vincirqan. Paykunata vincirkuptinnami Calebqa tsurin Acsawan tätsirqan. Otonielqa karqan Calebpa shulka wawqinpa tsurinmi.
18 Papäninpa wayinpita yarquykashqanchönami Otonielqa warmin Acsata kayno nirqan: “Papänikita ruwakamuy chakrata rikatsimänantsipaq”.
Tsawraqa bürrunpita Acsa urarpuptin papänin Caleb kayno tapurqan: “¿Imatataq munaykanki, hïja?”
19 Tsaymi Acsaqa kayno nirqan: “Ruwakuläshayki, papä. *Neguevcho chakrata rikatsimashqaykinöla pukyuyuq chakrakunatapis rikaykatsilämay”.
Tsayno niptinmi papänin rikatsirqan jana läducho y ura läducho pukyuyuq chakrakunata.
Judá trïbu runakuna chaskishqan markakuna
20 Judá trïbu runakuna aylunpa aylunpa posisionta chaskishqan markakuna kaynömi karqan: 21 Sur kaq lädupa aywar Edom nación cercancho kaq markankuna karqan Cabseel, Edar, Jagur, 22 Cina, Dimona, Adada, 23 Cedes, Hazor, Itnán, 24 Zif, Telem, Bealot, 25 Hazor-hadata, Queriot, Hezrón (Hezrónpa jukaq jutinmi karqan Hazor), 26 Amam, Sema, Molada, 27 Hazar-gada, Hesmón, Bet-pelet, 28 Hazar-sual, Beerseba, Bizotia, 29 Baala, Iim, Esem, 30 Eltolad, Quesil, Horma, 31 Siclag, Madmana, Sansana, 32 Lebaot, Silhim, Aín y Rimón. Tsay particho kaq markakuna ishkay chunka isqunmi (29) karqan. Tsay markakunapa caseriunkunapis karqanmi.
33 Inti jeqanan kaq lädu *Sefelachömi Judá trïbu runakunapa markankuna karqan Estaol, Zora, Asena, 34 Zanoa, En-ganim, Tapúa, Enam, 35 Jarmut, Adulam, Soco, Azeca, 36 Saaraim, Aditaim, Gedera y Gederotaim. Tsay particho kaq markakuna chunka chuskumi karqan. Tsay markakunapa caseriunkunapis karqanmi.
37 Tsay particho wakin kaq markakunapis karqan Zenán, Hadasa, Migdal-gad, 38 Dileán, Mizpa, Jocteel, 39 Laquis, Boscat, Eglón, 40 Cabón, Lahmam, Quitlis, 41 Gederot, Bet-dagón, Naama y Maceda. Tsay markakuna chunka soqtami karqan. Tsay markakunapa caseriunkunapis karqanmi.
42 Tsaynöpis wakin markakuna karqan Libna, Eter, Asán, 43 Jifta, Asena, Nezib. 44 Keila, Aczib y Maresa. Tsay markakuna isqunmi karqan. Tsay markakunapa caseriunkunapis karqanmi.
45 Judá trïbu runakunaqa caseriunkunatawanmi Ecrón markatapis chaskipäkurqan. 46 Ecrónpita Mediterráneo Lamaryaq aywar Asdod nawpancho kaykaq markakunapis Judá trïbu runakunapami karqan.
47 Asdod markapis, Gaza markapis y lapan caseriunkunapis Judá trïbu runakunapami karqan. Mediterráneo Lamar kuchunpa aywarashpanmi Egipto raqrayaq chayar lapan tsaycho kaq markakuna y caseriukuna Judá trïbu runakunapa karqan.
48 Jalqakuna kashqan partichöqa Judá trïbu runakunapa markankunami karqan Samir, Jatir, Soco, 49 Dana, Quiriat-sana (Quiriat-sanapa jukaq jutinmi karqan Debir), 50 Anab, Estemoa, Anim, 51 Gosén, Holón y Gilo. Tsay particho kaq markakuna chunka jukmi karqan. Tsay markakunapa caseriunkunapis karqanmi.
52 Tsay particho kaykaq wakin markakuna karqan Arab, Duma, Esán, 53 Janum, Bet-tapúa, Afeca, 54 Humta, Quiriat-arba (Quiriat-arbapa jukaq jutinmi karqan Hebrón) y Sior. Tsay markakuna isqunmi karqan. Tsay markakunapa caseriunkunapis karqanmi.
55 Tsaynöpis karqan Maón, Carmel, Zif, Juta, 56 Jezreel, Jocdeam, Zanoa, 57 Caín, Gabaa y Timna. Tsay markakuna chunkami karqan. Tsay markakunapa caseriunkunapis karqanmi.
58 Tsaynöpis karqan Halhul, Bet-sur, Gedor, 59 Maarat, Bet-anot y Eltecón. Tsay markakuna soqtami karqan. Tsay markakunapa caseriunkunapis karqanmi.
60 Tsaynöpis Judá trïbu runakunapami karqan Quiriat-baal (Quiriat-baalpa jukaq jutinqa Quiriat-Jearimmi karqan) y Rabá. Tsay markakuna ishkaymi karqan. Tsay markakunapa caseriunkunapis karqanmi.
61 Chunyaq tsaki jirkachöpis Judá trïbu runakunapa markankuna karqan Bet-arabá, Midín, Secaca, 62 Nibsán, Kachi Marka y En-gadi. Tsay markakuna soqtami karqan. Tsay markakunapa caseriunkunapis karqanmi.
63 Judá trïbu runakunaqa manami qarquyta kamäpakurqantsu Jerusaléncho taykaq jebuseo runakunata. Kananyaqpis jinalami jebuseo runakunaqa Judá trïbu runakuna kaqcho tarkaykan.*