Josué
Gilgalcho Israel runakuna señalakushqan y Pascuata rurashqan
5 Amorreo runakunapa mandaqnin reykuna mayarqan Israel runakuna pasananpaq Jordán mayuta TAYTA DIOS tsakitsishqanta. Tsay reykunaqa Jordán mayu tsimpan inti jeqanan lädupami tarqan. Tsaynölami mayarqan Mediterráneo Lamar kuchuncho taq cananeo runakunapa mandaqnin reykunapis. Tsayta musyaykurmi pasaypa mantsakushpan Israel runakunawan pelyaq aywaytapis mana munapäkurqantsu.
2 Jordán mayuta lapan pasarkuptinmi Josuéta TAYTA DIOS kayno nirqan: “Rumipita cuchillukunata rurarkur Israel runakunata *señalatsinki aylunkunano señalashqa kananpaq”.
3 Tsayno niptinmi rumipita cuchillukunata ruraykur Aralot jirkacho Israel runakunata Josué señalatsirqan. 4 Tsayno señalatsirqan Egiptupita yarqamuq runakuna chunyaq jirkacho wanur ushakashqa kaptinmi. Tsay wanuq runakunaqa Egiptupita yarqamur guërraman aywapäkunanpaq kalpanchönami karqan. 5 Tsay runakuna señalashqa kaptinpis chunyaq jirkacho yuriqkuna señaläni kaptinmi Josué señalatsirqan.
6 Egiptupita yarqamur guërraman aywapäkunanpaq kalpancho kaq runakunaqa chusku chunka (40) wata chunyaq jirkapa puriykashqalanchömi wanurqan. Tsayno wanupäkurqan TAYTA DIOSTA mana cäsukushqanpitami. Tsaymi paykunata TAYTA DIOS nirqan unay aylunkunata promitishqan nacionman mana yaykunanpaq.* Tsaychöqa lëchipis abëjapa mishkinpis yakunöraqmi atska kaykan. 7 Egiptupita yarqamuq runakuna wanushqa kaptinmi paykunapa tsurinkunata Josué señalatsirqan. Paykunatami Tayta Dios churarqan wanuq runakunapa trukan promitishqan nacionta chaskipäkunanpaq. Nänicho yurishqa karmi paykunaqa tsay junaqyaq señaläni karqan.* 8 Lapanta señalayta usharkuptinnami aliyänanyaq jinan campamentulacho qoyäkärirqan.
9 Tsaypitanami Josuéta TAYTA DIOS kayno nirqan: “Señalashqana karmi Egiptucho ashmay kashqanpita mana penqakärinqanatsu”.
Tayta Dios tsayno nishqanpitami kananyaq tsay partipa jutin kaykan Gilgal.*
10 Gilgalqa Jericó pampachömi kaykan. Israel runakuna tsaychömi wata qalaykunan killacho chunka chusku junaq tardi *Pascua fiestata* rurapäkurqan. 11 Tsaypita jukaqnin junaqmi mikupäkurqan levadüraynaq tantata y trïgu kamtsata. Tsaykunaqa jinancho wayushqan mikuykunami karqan. 12 Tsay junaqpita patsa mikupäkunanpaq *maná manami karqannatsu.* Tsaymi *Canaáncho chakrakuna wayushqalantana mikupäkurqan.
Josuéta Tayta Diospa soldädunkunapa mandaqnin yuripashqan
13 Jericó marka cercancho puriykashqanchömi Josué rikarqan espädan aptashqa ichiraykaq runata. Tsaymi nawpanman witiykur kayno nir tapurqan: “¿Qamqa kaykanki noqakunapa favornïku o conträkunapa favorninku?”
14 Tsayno tapuptinmi tsay runa kayno nirqan: “Manami mayqaykipapis favornikitsu kaykä. Noqaqa TAYTA DIOSPA soldädunkunapa mandaqninmi kaykä”.
Tsayno niptinmi Josuéqa pampaman lätakuykur tsay soldäduta tapurqan kayno nir: “Tayta, sirviqnikimi kä. ¿Imataq kaykan wilamänaykipaq?”
15 Tsayno niptinmi TAYTA DIOSPA soldädunkunapa mandaqnin kayno nirqan: “Jatirashqayki lanqikita jorquy. *Sagrädu partichönami ichiraykanki”.
Tsayno niptinmi Josuéqa lanqinta jukla jorqurqan.