Jueces
Galaadcho taq runakunawan Efraín trïbu runakuna pelyapäkushqan
12 Amonita runakunata Jefté vincirkuptinmi Efraín trïbu runakunaqa Jordán mayuta tsimpar Zafón markaman chayapäkurqan. Paykunami Jeftéta kayno nipäkurqan: “Amonita runakunawan pelyaq aywaykarqa ¿imanirtaq noqakunata mana wilamashqankitsu pelyäshinäpaq? ¡Tsaypitami wayintinta rupatsishayki!”
2 Tsayno niptinmi Jefté kayno nirqan: “Amonita runakunawan fiyupa rimanakur wilakatsimuptïpis manami shapäkamushqankitsu yanapamänaykipaq. 3 Tsaymi wanuy kaway noqakunala amonita runakunawan pelyaq aywapäkushqä. Tsay guërracho TAYTA DIOS yanapamaptinmi paykunata vincipäkushqä. Qayaykätsiptïpis mana shaykämurqa ¿imanirtaq atacamänaykipaq shamushqanki?”
4 Tsayno niptinmi Efraín trïbu runakunaqa kayno nipäkurqan: “Efraín trïbupita y Manasés trïbupita mana väliqnin runakunalami karkaykanki”.
Tsayno nir manakaqman churaptinmi Jeftéqa Galaad runakunata shuntaykur Efraín trïbu runakunawan pelyar vincipäkurqan.
5 Nirkurnami Jordán vädukunaman aywaykur Efraín trïbu runakunata tsapapäkurqan mana pasananpaq. Tsaymi vädupa päsayta munar pipis chayaptin kayno nir tapupäkurqan: “¿Efraín trïbupitaku kanki?”
“Manami” niptinqa: 6 “Mä, ‘shibolet’ niy” nipäkurqan. Tsayno nirqan Efraín trïbu runakuna parlayta mana kamäpakur “shibolet” ninanpa trukan “sibolet” nishqanta musyarmi. Tsaymi pipis “sibolet” niptinqa jukla wanutsipäkuq. Tsay pelyachömi chusku chunka ishkay waranqa (42,000) Efraín trïbu runakunata wanutsipäkurqan.
7 Soqta watami Israel runakunapa jueznin Jefté karqan. Wanuykuptinnami Galaad markanman pampapäkurqan.
Israel runakunapa jueznin Ibzán kashqan
8 Jefté wanuykuptinmi Belén markapita Ibzánna Israel runakunapa jueznin karqan. 9 Paypa tsurinkunami karqan kimsa chunka (30) olqu y kimsa chunka (30) warmi. Lapan tsurinkunata tätsirqan juk lädu runakunawanmi. Qanchis watami Ibzánqa Israel runakunapa jueznin karqan. 10 Ibzán wanuykuptinmi Belénman pampapäkurqan.
Israel runakunapa jueznin Elón kashqan
11 Tsaypitanami Israel runakunapa jueznin karqan Zabulón trïbupita Elón jutiyuq runa. Paymi chunka wata Israel runakunapa jueznin karqan. 12 Elón wanuykuptinmi trïbun runakuna tashqan Ajalón markaman pampapäkurqan.
Israel runakunapa jueznin Abdón kashqan
13 Tsaypitanami Israel runakunapa jueznin karqan Abdón. Pay karqan Piratóncho taq Hilelpa tsurinmi. 14 Pusaq watami Abdónqa Israel runakunapa jueznin karqan. Paypa olqu tsurinkuna karqan chusku chunkami (40). Wilkankuna karqan kimsa chunka (30). Tsurinkunapis wilkankunapis bürrun muntashqalami puripäkuq. 15 Abdón wanuykuptinmi Piratónman pampapäkurqan. Tsayqa karqan Efraín jalqakunachömi. Nawpataqa amalecita runakunami tsaycho tarqan.