Jueces
Filisteo runakunapa chakrankunata Sansón rupatsishqan
15 Tsaypita trïgu cosëcha witsanmi manta cabrata apakurkur Sansónqa warmin watukuq kutirqan. Chayaykurmi suedrunta kayno nirqan: “Warmï watukuqmi shamushqä, papä. Mä punukunanman yaykurishaq”.
Tsawraqa suedrun yaykunanta mana munar 2 kayno nirqan: “Noqaqa yarpashqä tsurïta kacharishqaykitanami. Tsaymi jukwanna warmikita tätsishqä. Tsayno kaptinpis shulka nanan paypita mas kuyaylapaqmi kaykan. Mayor kaqpa trukan paywanna täkuy”.
3 Tsayno niptinmi Sansón kayno nirqan: “Kananqa kikikikunami munanki qamkunata y filisteo mayikikunata perjuiciuta ruranäpaq”.
4 Tsaypita aywakurmi kimsa pachak (300) atuqkunata tsarirkur ishkay ishkay chupanpita shinrirqan. Nikurmi chupanman wataparqan aceitiwan ushmashqa träputa. 5 Tsay träpukunaman ninata ratarkatsirmi atuqkunata qarqurirqan filisteo runakunapa chakrankunapa. Tsaynöpami rupaykatsirqan achushqa qoturaykaq trïguta, achüni kaykaq trïguta, üva yörakunata y olïvu yörakunatapis.
6 Tsayno rupashqanta rikaykurmi filisteo runakuna kayno nipäkurqan: “¿Pitaq kayta ruraykushqa?”
Tsaymi kayno nipäkurqan: “Timnat runapa mashan Sansónmi rupatsishqa suedrun juk runawan warminta tätsishqanpita”.
Tsaymi filisteo runakunaqa Sansónpa warminta y taytanta rupatsipäkurqan. 7 Tsayta musyaykurmi filisteo runakunata Sansón kayno nirqan: “Tsayno rurapäkushqaykipita qamkunata mana ushakätsirqa manami jutïtapis aparäshaqtsu”.
8 Tsayno nir pasaypa rabyashpanmi tsaytsika filisteo runakunata wanutsir usharqan. Nirkurnami Etam qaqacho kaykaq machayman aywakurqan tsaycho tänanpaq.
Filisteo runakunata Sansón wanutsishqan
9 Tsaymi filisteo runakuna Judá trïbu runakuna tashqan partiman aywaykur campamentuta rurapäkurqan. Nirkurmi Lehi marka nawpankunacho churanakärirqan Israel runakunata atacananpaq. 10 Tsawraqa Judá trïbu runakuna kayno tapupäkurqan: “¿Imanirtaq atacamänaykipaq shapäkamushqanki?”
Tsayno tapuptinmi filisteo runakuna kayno nipäkurqan: “Noqakuna shapäkamushqä Sansónta prësu tsarinäpaqmi. Marka mayïkunata wanutsishqannömi kikintapis wanutsishaq”.
11 Tsayno niptinmi kimsa waranqa (3,000) Judá trïbu runakuna aywapäkurqan Etam qaqacho kaykaq machayman. Chayaykurmi Sansónta kayno nipäkurqan: “¿Manaku musyanki filisteo runakuna mandamaqnintsi kashqanta? ¿Imanirtaq paykunata tsayno rabyanaykätsinki?”
Tsayno niptinmi Sansón kayno nirqan: “Paykuna ruramashqannölami noqapis rurashqä”.
12 Tsawraqa Judá trïbu runakuna kayno nipäkurqan: “Noqakuna shapäkamushqä qamta prësu apaykur filisteo runakunapa makinman churanäpaqmi”.
Niptinmi Sansón kayno nirqan: “Prësu tsarimarpis ama wanutsimaytsu”.
13 Tsayno niptinmi kayno nipäkurqan: “Manami wanutsishaykitsu, sinöqa filisteo runakunapa munayninmanmi churashayki”.
Tsayno nirmi ishkay mushuq waskawan liyarkur pakarashqan machaypita Sansónta jorqapäkurqan.
14 Lehi markaman chayatsiptinmi filisteo runakuna fiyupa kushikur tariparqan. Tsawraqa jinan hörami TAYTA DIOSPA Espïritun yanapaptin Sansónqa liyaraykashqan waskatapis rachirirqan ismushqa hïlutanöla. 15 Nirkurmi bürrupa chakawshan manaraq shumaq tsakishqa jitaraykaqta aptarkur waranqa (1,000) filisteo runakunata wanutsirqan. 16 Nirkurnami kayno nirqan:
“Bürrupa chakawshalanwanmi tsaytsika runakunata wanutsishqä.
Bürrupa chakawshalanwanmi waranqa runakunata wanutsishqä”.
17 Tsayno nirmi aptaraykashqan chakawshata jitariykurqan. Tsaypitami tsay partipa jutin kaykan Ramat-lehi.*
18 Filisteo runakunata wanurkatsirmi Sansónqa pasaypa yakunashpan TAYTA DIOSTA manakur kayno nirqan: “¿Tsaytsika runakunata wanutsinäpaq yanapaykämarku yakunaypita wanunäta munaykanki? Wanunaykaqtachari qamman mana yärakamuq runakuna tsarimanqa”.
19 Tsayno manakuptinmi ukrupita yakuta TAYTA DIOS pashtatsimurqan. Tsayta upurkuptinmi Sansónpa valornin yapay yurirkurqan. Tsaypitami Lehicho kaykaq yaku pashtaqta kananyaq reqipäkun En-hacore jutiwan.*
20 Ishkay chunka (20) watami Israel runakunapa jueznin Sansón karqan. Tsayqa karqan filisteo runakuna munayniyuq kashqan witsanmi.