Jueces
Micaíapa ïdulunkunata Dan trïbu runakuna apakushqan
18 Tsay witsanqa Israel runakunapa mandaqnin rey manami karqanraqtsu.
Dan trïbu runakunami rikatsishqan posisionninkunaman yaykuyta mana kamäpakushpan maynincho tänanpaqpis rikapakur purirkaykarqan.* 2 Tsaymi Zora markapita y Estaol markapita pitsqa alinnin chölukunata kachapäkurqan maynincho tänanpaqpis rikapakamunanpaq. Tsay pitsqa runakuna aywarmi chayapäkurqan Efraín jalqakunaman. Micaíapa wayinman chayaykurmi tsaycho patsakärirqan.
3 Micaíapa wayincho kaykarmi Leví trïbu mözuta rimakuyninpa reqirkärirqan. Tsaymi mözuta kayno tapurqan: “¿Pitaq kayman pushamushushqanki? ¿Imatataq kaychöqa ruraykanki? ¿Imamantaq shamushqanki?”
4 Tsayno tapuptinmi wilarqan Micaíawan conträtuta rurashqa kar tsaycho paypa cüran kashqanta.
5 Tsawraqa kayno nipäkurqan: “Tayta Diosta tapupaykalämay. Mä alilakush puripäkamushaq”.
6 Tsayno niptinmi cüra kayno nirqan: “Ama lakikäriytsu. Maypa aywarpis ali puripakamunaykipaqmi TAYTA DIOS yanapashunkipaq”.
7 Tsaypita yarqurnami tsay pitsqa rikapakuq runakuna chayarqan Lais markaman.* Sidón markacho runakuna jawkala tashqannömi Lais markacho taq runakunapis jawkala tarkaykarqan. Manami imapis paykunata pishirqantsu. Sidón runakunapita karuchömi tarqan. Manami pipis cercacho karqantsu imapis kaptin yanapananpaq.
8 Tsayno kaykaqta rikaykur pitsqa rikapakuq aywaq runakunaqa kutirqan Zora y Estaol markankunaman. Chayaptinmi tapupäkurqan kayno nir: “Purimushqaykicho ¿imano kashqantataq rikapäkushqanki?”
9 Tsawraqa kayno nipäkurqan: “Rikapakamur puripäkamushqä partikunaqa lapanpis pasaypa alimi kaykan. Jukla aywashun tsay partikunata tsarinantsipaq. Kaylachöqa ama täkushuntsu. 10 Tsayman chayarmi tarishun tranquïlu kakuykaq runakunata. Paykunapa chakrankuna atska kaptin manami imanpis pishintsu. Paykuna tashqan partikunataqa Tayta Diosmi qomäshunpaq”.
11 Tsayno niptinmi Zora y Estaol markakunapita soqta pachak (600) runakuna pelyananpaq kamarikushqa aywapäkurqan. Tsay aywaqkunaqa Dan trïbu runakunami karqan. 12 Judá trïbu runakuna tashqan partiman chayaykurmi Quiriat-jearimpita inti jeqanan kaq läducho patsakärirqan. Tsaypitami kananyaqpis tsay partipa jutin Mahané-dan* kaykan. 13 Tsaypita yarqurnami Efraín jalqakunapa pasar Micaíapa wayinman chayapäkurqan.
14 Lais partita rikapakuq pitsqa runakunaqa kayno nipäkurqan: “Kay wayichömi kaykan cürapa *efodnin, qellaypita rurashqa juk ïdulu y mas wakin ïdulukunapis. Tsaykunata munashunpaqmi”.
15 Tsayno nirkushpanmi pitsqa rikapakuq runakunaqa Micaíapa wayinman chayapäkurqan. Tsaycho taq Leví mözuwan tinkurkur wamayashpan winchikurqan. 16 Soqta pachak (600) Dan trïbu runakunanami punku yaykunacho pelyananpaq kamarikushqa shuyarpaykarqan. 17 Tsayyaqmi tsay pitsqa rikapakuq runakunaqa ïdulukunapaq rurashqan capillaman yaykurir efodta, qellaypita rurashqa ïduluta y wakin ïdulukunatapis jorqapäkurqan. Micaíapa cürannami waqtacho ichiraykarqan soqta pachak runakunawan.
18 Ïdulukunata y efodta jorqamuptinmi cüraqa kayno nirqan: “¿Imapaqtaq jorqaykämunki?”
19 Tsawraqa paykuna kayno nirqan: “¡Upälakuy! Michäkunaykipa trukanqa jukla alistakuy aywakunantsipaq. Qamqa noqakunapa cürä karmi y papänïno kankipaq. ¿Manaku mas ali kanman juk runalapa cüran kanaykipa trukanqa juk trïbu Israel runakunapa cüran kaptiki?”
20 Tsayno niptinmi cüra kushikur ïdulukunata y efodta apakurkur Dan trïbu runakunawan aywakurqan. 21 Tsayno aywakurmi Dan trïbu runakunaqa puntata aywapäkunanpaq churapäkurqan tsurinkunata, uywankunata y qepi apaqkunata.
22 Karutana aywarkaykaptinmi vecïnunkunawan shuntanakurkur Micaía qepanta aywar tariparqan. 23 Qayakuraykar taripaptinmi Dan trïbu runakunaqa tikraykur Micaíata kayno tapurqan: “¿Imataq pasaykäshunki? ¿Imanirtaq tsaytsika runakunawan qepäta shamushqanki?”
24 Tsawraqa Micaía kayno nirqan: “Qamkunaqa ruratsikushqä diosnïkunata apamur y cürätapis pushamur jinaylatami kachaykamashqanki. Tsayno ruraykarpis ‘imanankitaq’ nimankiraq ¿aw?”
25 Tsawraqa Dan trïbu runakunaqa kayno nipäkurqan: “Achäquita ama ashipämaytsu. Tsaynöla qayapämaptikiqa noqakunawan aywaq wakin runakuna rabyakushpan paqta qamtapis y qamwan shamuq runakunatapis wanuratsishunkiman”.
26 Tsayno nirkushpanmi Dan trïbu runakuna aywakärirqan. Paykuna atska kaptin mantsakurmi Micaíaqa minkakushqan runakunawan wayinpa kutikärirqan.
27 Micaíapa ïdulunkunata apakurkurmi y cüran pushashqami Dan trïbu runakunaqa Laisman chayapäkurqan. Tsaychömi jawkala täkuq runakunata lapanta espädawan wanutsipäkurqan. Markatapis rupatsirmi ushapäkurqan. 28 Sidón markapita karucho taptinmi paykunata salvananpaq pipis mana karqantsu. Lais markaqa Bet-rehob cercan pampachömi karqan.
Dan trïbu runakunami tsay rupatsishqan markata yapay sharkarkatsir tsaycho tarqan. 29 Tsay markapa nawpa kaq jutin Lais kaptinpis paykunaqa jutinta churaparqan Dan jutin kananpaqmi. Tsayno jutinta churaparqan Israelpa tsurin Danpita miraq trïbu karmi.
30 Tsaymannami apapäkushqan ïduluta churapäkurqan respitar adorapäkunanpaq. Cüran kananpaqna churapäkurqan Moiséspa tsurin Gersón aylu Jonatánta. Tsaypitaqa Jonatánpita miraq runakunalana Dan trïbu runakunacho cüra karqan hasta juk lädu nacionman Dan trïbu runakunata prësu apapäkushqanyaq. 31 Tinkuna Toldu Siluchöraq kashqan witsanmi Dan trïbu runakuna Micaíapa ïdulunta adorapäkurqan.