Jueces
Guërrata rurananpaq Israel runakuna juntakashqan
20 Tsawraqa lapan Israel runakuna Danpita Beersebayaq y Galaad partipitapis Mizpaman aywaykur TAYTA DIOSPA nawpancho juntakarqan. 2 Lapan trïbunkunapitami Israel runakunapa mandaqninkunapis kaykarqan. Chusku pachak waranqa (400,000) runakunami espädanwan tsaycho juntakarqan. 3 Mizpaman Israel runakuna juntakashqanta musyarpis Benjamín trïbu runakunaqa manami aywapäkurqantsu. Mizpachömi Leví trïbu runata Israel runakuna tapurqan kayno nir: “¿Imanöpataq *concubïna warmikita wanutsipäkushqa?”
4 Tsaymi wanuq warmipa runan kayno nirqan: “Benjamín trïbu runakuna tashqan Gabaa markamanmi patsakunäpaq concubïna warmïwan chayarqä. 5 Tsay tsakaymi tsaycho taq runakuna wanutsimayta yarpar patsakushqä wayiman juntakaykamurqan. Mana yarquptïmi concubïna warmilätana forsaypa wanutsipäkushqa. 6 Tsayno pasaypa penqaypaq jutsata rurapäkushqanta musyapäkunaykipaqmi ayanta pedäzu pedäzu kutsurkur intëru Israel nacionpa apatsimushqä. 7 Lapantsipis Israel runa kaykarqa kanan yarpachakärishun imata ruranantsipaqpis”.
8 Tsayno niptinmi lapan runakuna juk yarpayla kar kayno nipäkurqan: “Kayta manaraq arreglarqa mayqantsipis manami wayintsiman kutishuntsu. 9 Kananqa suertitana jitashun Gabaa markata mayqan trïbupis puntata atacananpaq. 10 Tsaynöpis cada chunka runapita juk runata akrashun mikuyta shuntarkur apapämänantsipaq. Nirkur Gabaaman aywashun Israel nacioncho penqaypaq jutsata rurashqanpita tsay runakunata wanutsinantsipaq”.
11 Tsayno nishpanmi Israel runakuna lapanpis tsay yarpayla karqan Gabaa markata atacananpaq. 12 Tsaymi Israel runakunaqa propiukunata kacharqan Benjamín trïbu runakuna tashqan partikunaman kayno ninanpaq: “¿Imanirtaq tsayjinanpa jutsata qamkuna rurapäkushqanki? 13 Jukla qarqamuy Gabaa markacho taq jutsasapa runakunata wanutsinäpaq. Tsaynöparaqmi Israelcho jutsa ruraqkunata elqätsipäkushaq”.
Israel runakuna tsayno niptinpis Benjamín trïbu runakunaqa manami mayaq tukurqantsu. 14 Tsaypa trukanqa Israel mayinkunawan guërrata rurapäkunanpaq markankunapita aywaykur Gabaa markaman juntakarqan. 15 Guërraman aywananpaq juntakaq Benjamín trïbu runakunaqa karqan ishkay chunka soqta waranqami (26,000). Tsay karqan Gabaa markacho taq qanchis pachak (700) pelyayta yachaq runakunata mana yupaylapami. 16 Tsaynöpis Benjamín trïbu runakunachöqa karqan qanchis pachak (700) runakunami itsuq kaq makinwan warakayta yachaq. Tsay runakunaqa juk aqtsalatapis kamaylami warakaykuq. 17 Wakin trïbu Israel runakunanami guërracho pelyayta yachaqlantaq chusku pachak waranqa (400,000) juntakarqan.
Benjamín trïbu runakunawan Israel runakuna guërrata rurashqan
18 Manaraq guërrata rurarmi Israel runakuna Bet-elman aywapäkurqan Tayta Diosta tapupäkunanpaq. Tsaychömi tapupäkurqan mayqan trïbu runakuna Benjamín trïbu runakunata puntata atacananpaq. Tsawraqa Tayta Dios nirqan Judá trïbu runakuna puntata atacananpaq. 19 Tsaymi waraynin* tutana Israel runakuna aywaykur Gabaa marka tsimpancho campamentunta sharkatsipäkurqan. 20 Tsaypitami guërrata rurananpaq tsay marka tsimpanman churanakurqan. 21 Tsayno kaykaptinpis Benjamín trïbu runakunaqa markapita yarqur Israel runakunata tsay junaq wanutsipäkurqan ishkay chunka ishkay waranqatami (22,000).
22 Wanutsiptinpis waraynin junaq Israel runakunaqa valuratsinakurqan pelyashqan kaqman kutiykur Benjamín trïbu runakunawan yapay pelyapäkunanpaq. 23 Manaraq pelyarqa Bet-elman yapay aywaykur TAYTA DIOSPA nawpancho waqarqan patsa tsakashqanyaq. Tsaychömi Tayta Diosta tapukushpan kayno nirqan: “¿Yapayku Benjamín trïbu Israel mayïkunawan pelyapäkushaq?”
Tsayno tapukuptinmi TAYTA DIOS kayno nirqan: “Aw, yapay paykunata lapaniki atacay”.
24 Tsayno niptinmi Benjamín trïbu runakunawan pelyananpaq aywapäkurqan. 25 Atacaptinmi Benjamín trïbu runakunaqa Gabaapita yarqamur chunka pusaq waranqa (18,000) Israel runakunata wanutsipäkurqan.
26 Tsawraqa Israel runakuna Bet-elman kutiykur TAYTA DIOSPA nawpancho lapanpis yapay waqapäkurqan. Patsa tsakashqanyaq ayunashpanmi rupatsina sacrificiukunata y jawka kawakuy sacrificiukunata TAYTA DIOSPAQ rupatsipäkurqan. 27 Israel runakuna tsayno Bet-elman aywapäkurqan TAYTA DIOSPA *Pactu Babulnin tsaycho kaptinmi. 28 Tsaynöpis Aarónpa wilkan y Eleazarpa tsurin Fineesmi TAYTA DIOSTA sirvir tsaycho kaykarqan. Tsaymi Israel runakuna tapukurqan kayno nir: “Benjamín trïbu Israel mayïkunawan ¿yapayku pelyapäkushaq o manaku?”
Tsaymi TAYTA DIOS kayno nirqan: “Aw, pelyapäkunaykipaq aywapäkuy. Warami yanapashayki paykunata vincipäkunaykipaq”.
29 Tsayno niptinmi Israel runakunaqa wakinkuna pakakärirqan Gabaa marka nawpankunapa. 30 Wakinkunami atacananpaq puntata churanakushqannöla Gabaa tsimpanman yapay churanakärirqan. Tsayqa karqan pelyayta qalaykushqanpita kimsa junaq kaqchömi. 31 Tsawraqa yapaymi Benjamín trïbu runakunaqa markapita yarqur Israel runakunata wanutsiyta qalaykurqan. Chakrakunapa y Gabaapita Bet-elman aywaq nänikunapa qatipar kimsa chunka (30) Israel runakunata wanutsirmi 32 Benjamín trïbu runakuna yarpapäkurqan puntata vincishqannöla yapaypis vincishqanta. Israel runakunaqa karu niraqman qeshpiq tukurqan Benjamín trïbu runakuna qatipänanta munar.
33 Baal-tamar partiman chayaykurnami Israel runakunaqa tikrapämur Benjamín trïbu runakunata atacamurqan. Tsaynölami Gabaa marka nawpankunacho pakarpaykaqkunapis yarqushpan markacho quëdaq runakunata atacarqan. 34 Tsay atacaq runakunaqa chunka waranqa (10,000) ali chölu runakunami karqan. Tsay junaq pelyar fiyupa tsarapänakushpan Benjamín trïbu runakunaqa manami tantiyarqantsu vincikänanpaq kashqanta. 35 Tsaynöpami Israel runakunata TAYTA DIOS yanaparqan Benjamín trïbu runakunata vincinanpaq. Tsay junaqmi wanutsipäkurqan ishkay chunka pitsqa waranqa juk pachak (25,100) Benjamín trïbu runakunata. Lapanpis tsay runakuna karqan espädata ali manijaqmi. 36 Tsayno wanutsiptinmi Benjamín trïbu runakunaqa cuentata qokurqan pelyacho perdipäkushqanta.
Benjamín trïbu runakunata tsayno vincipäkunanpaqqa Israel runakuna paykunapita qeshpiq tukärirqanmi. Benjamín trïbu runakuna paykunata qatipaykaptinnami Gabaa marka nawpankunaman pakakuq runakuna 37 markaman elaqpita yaykur espädawan lapanta tsaycho kaqtaqa wanutsipäkurqan. 38 Manaraq atacarmi Israel runakuna wilanakurqan kayno nir: “Wakinnintsi marka nawpankunacho pakakushqantsipita markaman yaykur wayikunata rupatsishun. Wakinnintsinami markapita qoshtay sharkuykaqta rikar Benjamín trïbu runakunata tikrapar atacashun”.
39 Wilanakushqannölami wakin Israel runakuna qeshpiptin Benjamín trïbu runakuna qatiparqan. Qatipashpan kimsa chunkatano (30) Israel runakunata wanutsirmi Benjamín trïbu runakuna kushikur kayno nipäkurqan: “Puntata vincishqantsinölami kananpis vinciykantsi”.
40 Tsayno nir qatirkaykashqancho tikraykur rikapäkurqan qoshtaypis ninapis bunyaypa bunyar markapita sharkuykaqta. 41 Israel runakunapis tsayta rikaykur tikrapaptinmi Benjamín trïbu runakunaqa mantsakashpan ima ruraytapis mana kamäpakurqantsu. 42 Tsaymi chunyaqman aywaq nänipa qeshpipäkurqan. Nänipa qeshpiykaqtami Israel runakuna markapita yarqur wanutsipäkurqan. 43 Tsaymi Benjamín trïbu runakunata tsapa tsapaykur Menúhapita patsa Gabaa washa lädunyaq Israel runakuna wanutsipäkurqan.
44 Tsaynöpami Benjamín trïbu runakunata wanutsipäkurqan chunka pusaq waranqa (18,000) pelyayta yachaq runakunata. 45 Chunyaq jirkacho kaykaq Rimón qaqaman qeshpiykaq runakunatapis pitsqa waranqata (5,000) wanutsipäkurqan. Tsaynölami wakin runakunatapis hasta Gidomyaq qati qatiykur ishkay waranqa runakunata (2,000) wanutsipäkurqan.
46 Tsay junaqmi Benjamín trïbu runakuna wanurqan ishkay chunka pitsqa waranqa (25,000) pelyayta yachaq runakuna. 47 Soqta pachaklanami (600) Benjamín trïbu runakunaqa Rimón qaqaman qeshpiykur chusku killa tsaycho tarqan. 48 Israel runakunanami Benjamín trïbu runakuna tashqan markakunaman aywar tsaycho kaykaq runakunatapis tarishqan kaqtaqa lapanta wanutsirqan. Tsaynölami uywankunatapis wanurkatsir markankunatapis kanarqan.