Salmos
Jutsanpita perdonananpaq manakushqan
(1-2) Cantaqkunapa mandaqninpaqmi. Betsabéwan David adulteriu jutsata rurashqanpita profëta Natán olqüparqan. Tsaymi jutsata rurashqanpita lakikur kay salmuta David qelqarqan.*
51 (3) Kuyapäkuq Tayta Dios, perdonaykalämay.
Kuyapäkuq kashpayki jutsa rurashqäta qonqaykulay.
2 (4) Lutankunata rurashqäpita maylaykalämay.
Jutsa rurashqäpita perdonaykalämay.
3 (5) Mana cäsukuq kashqäta tantiyakümi.
Jutsa rurashqäta manami qonqayta kamäpakütsu.
4 (6) Jutsata rurar qampa contraykimi rikakushqä.*
Qamta mana cäsukushpämi rabyanätsishqä.
Tsaymi rasun kaqlata juzgaykämanki.
Imanöpa tsapakuytapis manami kamäpakütsu.*
5 (7) Yurishqäpita patsami jutsasapa kaykä.
Jutsayuqtami mamäpis wachamashqa.
6 (8) Jutsa rurashqanta mana pakaqtaqa qam kuyankimi.
Jutsayuq kashqäta qammi shonqücho tantiyatsimanki.
7 (9) *Hisöpu jachawan purificamaptikiqa limpiumi kashaq.*
Maylamaptikiqa rajupitapis mas yoraqmi kashaq.*
8 (10) Kushikuyta shonqüman churaykalämuy.
Lakikuyman churamashqa karpis yapay kushikaykatsilämay.
9 (11) Jutsa rurashqäta perdonaykalämay.
Lutan rurashqäta ama yarparaykulaytsu.
10 (12) Munashqaykino kawanäpaq ali shonquta qoykalämay, Tayta Dios.
Nimashqaykita imaypis cäsukunäpaq yanapaykalämay.*
11 (13) Nawpaykipita ama qarqaykalämaytsu.
Espíritu Santuykitapis ama qechuykalämaytsu.
12 (14) Salvamashqaykipita yapay kushishqa kawanäpaq yanapaykalämay.
Cäsukuq kanäpaq tantiyaykatsilämay.
13 (15) Tsaynöpami mana wiyakuq runakunata tantiyatsishaq wiyakushunaykipaq.
Jutsa ruraykunata kacharirmi qamtana cäsukushunkipaq.
14 (16) Salvamaqnï Tayta Dios, runa mayïta wanutsishqäpita perdonaykalämay.
Perdonamashqaykipitami kushishqa imaypis alabashayki.
15 (17) Lapan shonqüwan alabanäpaq yanapaykalämay.