Salmos
Tayta Dios lapanpaq munayniyuq rey kashqan
(1a) David qelqashqan salmu.
24 (1b) TAYTA DIOSPAMI kay patsapis y kay patsacho kaqkunapis kaykan.
Lapan kawaqkunapis paypami kaykan.*
2 Tayta Diosmi kay patsata kamashqa.
Lamar y mayukuna rurinman cimientuta ruraykurmi tsay jananman jamatsishqa.
3 TAYTA DIOS akrashqan jirkanman ¿piraq witsanman?
*Sagrädu wayinman ¿piraq yaykunman?
4 Tsaymanqa yaykunqa alita ruraqkunalami,
shonquncho imaypis alilata yarpaqkunalami,*
ïduluta mana adoraqkunalami
y promitishqanta mana qonqaypa cumpliqkunalami.*
5 Paykunamanmi TAYTA DIOS bendicionninta churanqa.
Contranpa makinpitapis paymi salvanqa.
6 Tsaynömi kaykan Tayta Diosta *ashiqkuna.
Tsaynömi kaykan Jacob yärakushqan Tayta Diosta manakuqkuna. Selah
7 Markapa punkunkunata kichapäkuy.
Unay punkukunatapis kicharätsiy.
Lapanpaq munayniyuq reymi yaykamunqa.
8 ¿Pitaq kaykan lapanpaq munayniyuq rey?
Payqa kaykan munayniyuq y pitapis mana mantsakuq TAYTA DIOSMI.
Payqa guërracho lapantami vincin.
9 Markapa punkunkunata kichapäkuy.
Unay punkukunatapis kicharätsiy.
Lapanpaq munayniyuq reymi yaykamunqa.
10 ¿Pitaq kaykan lapanpaq munayniyuq rey?
Payqa kaykan lapanta mandaq TAYTA DIOSMI.
Paymi kaykan lapanpaq munayniyuq rey. Selah