Éxodo
Jamay junaqcho jamananpaq tantiyatsishqan
35 Lapan Israel runakunata shuntaykurmi Moisés kayno nirqan: “Kaykunami kaykan TAYTA DIOSPA mandamashqantsikuna: 2 Semänacho soqta junaq arupäkunki. Qanchis kaq junaqchöqa *sagrädu kaptin TAYTA DIOSTA adorashpayki jamapäkunki.* Pipis tsay junaqcho aruptinqa wanutsipäkunki. 3 Jamay junaqchöqa maycho tarpis ninata ama ratatsipäkunkitsu”.
Sagrädu Tolduta rurananpaq ofrendata shuntapäkushqan
4 Tsaypitami Israel runakunata Moisés kayno nirqan: “TAYTA DIOS kaynömi nishqa: 5 TAYTA DIOSPAQ ofrendata apamuyta munarqa lapan shonqunwan apapäkamunqa qorita, qellayta, broncita, 6 azul, granäti y puka milwa hïlukunata, llanula putskashqa lïnu hïluta y cabrapa aqtsanpita putskashqa hïlutapis. 7 Tsaynöpis apapäkamunqa pukaman tinishqa uysha pirqashta, fïnu qarata, acacia qeruta, 8 candelabru ratananpaq aceitita, *sagrädu aceitiman y inciensuman takutsinanpaq perfümita, 9 ónice rumikunata y wakin kuyaylapaq rumikunatapis. Tsay rumikunaqa kanqa mandaq cürapa *efodninta y pechëranta* adornananpaqmi.
Sagrädu Tolducho kaqkunata rurashqan
10 “ ‘Qamkunacho mayqaykipis habilidäniyuq kaqkunaqa shamunki TAYTA DIOS nimashqankunata shumaq ruranaykipaq. 11 Paymi nimashqa *Sagrädu Tolduta ruranantsipaq. Tsaymi ruranantsipaq kaykan cuartunkuna, qatanankuna, ganchunkuna, marcunkuna, travisninkuna, tushankuna y jawiräkunankunapis. 12 Tsaynöpis ruranantsipaq kaykan *Pactu Babul, wintukuna qerunkuna, *babulpa tsapanan, cuartuta ishkayman rakinanpaq cortïna, 13 mësa, wintunan qerukuna, mësapa manëjunkuna, mësacho churaränanpaq jatusaq tantakuna, 14 atski ratananpaq candelabru, candelabrupa manëjunkuna, mechërunkuna, atski ratananpaq aceiti, 15 inciensuwan qoshtatsikuna *altar, tsay altarta wintunanpaq qerukuna, sagrädu aceiti, ali asyaq* inciensu, Sagrädu Tolduman yaykuna cortïna, 16 sacrificiuta rupatsina altar, broncipita rurashqa rejïllan, altar wintukuna qerukuna, altarpa manëjunkuna, jamakunantin broncipita lavatoriu, 17 patiupa cortïnankuna, patiupa tushankuna, tushakunapa jawiräkunan, patiupa punkunta tsaparaq cortïna, 18 Sagrädu Tolduta ichitsinanpaq estäcankuna waskantin y patiupa tushankunapa estäcankuna waskantin. 19 Tsaynöpis ruranantsipaq kaykan Tinkuna Sagrädu Tolducho cüra Aarón jatikunanpaq kaq sagrädu röpakuna y tsurinkuna jatikunanpaq röpankunapis’ ”.
Ofrendata runakuna apashqan
20 Moisés tsayno niptinmi Israel runakuna aywarqan imatapis kashqanpita apapäkunanpaq. 21 Tsaymi Tinkuna Tolduta sharkatsipäkunanpaq ofrendata churayta munaqkuna TAYTA DIOSPAQ apapäkurqan. Tsaynöpis apapäkurqan manëjunkunata rurapäkunanpaq y cüra jatikunan *sagrädu röpakunata rurapäkunanpaqpis. 22 Tsawraqa ofrendayta munaqkuna olqupis warmipis apapäkurqan tikpinkunata, zarcïllunkunata, sortëjankunata, walqankunata y qoripita rurashqan kaqtaqa imaykatapis. Tsaykunata lapantami TAYTA DIOSPAQ apapäkurqan. 23 Tsaynöpis kashqanpita tupumi apapäkurqan azul, granäti y puka milwa hïlukunata, llanula putskashqa lïnu hïluta, cabrapa aqtsanpita putskashqa hïluta, pukaman tinishqa uysha pirqashta y fïnu qaratapis. 24 Tsaynöpis kashqanpitami TAYTA DIOSPAQ apapäkurqan qellayta y broncita. Wakinnami apapäkurqan Tinkuna *Sagrädu Tolduta sharkatsinanpaq acacia qeruta.
25 Putskayta yachaq warmikunapis apapäkurqan azul, granäti y puka milwa hïlukunata y llanula putskashqa lïnu hïluta. 26 Tsaynöpis putskayta yachaq warmikuna cabrapa aqtsanta putskapäkurqan. 27 Israel runakunapa mandaqninkunana apapäkurqan ónice rumikunata y wakin kuyaylapaq rumikunatapis. Tsay rumikunaqa karqan mandaq cürapa *efodninta y pechëranta adornananpaqmi. 28 Tsaynöpis apapäkurqan aceitita candelabru ratananpaq. Tsaynöpis sagrädu aceitita rurananpaq y inciensuman takutsinanpaqmi ali asyaq yörakunapa weqinta y qaranta apapäkurqan. 29 Ofrendayta munaqkunaqa olqupis warmipis kikinpa voluntäninpita apapäkurqan TAYTA DIOS nishqanno Tinkuna Sagrädu Tolduta sharkatsipäkunanpaq.
Habilidäniyuq runakunata arunanpaq Moisés churashqan
30 Israel runakunata Moisés kayno nirqan: “Uripa tsurin y Hurpa wilkan Bezaleeltami TAYTA DIOS akrashqa *Sagrädu Tolduta rurananpaq. Payqa Judá trïbupitami kaykan. 31 Bezaleelqa TAYTA DIOS habilidäta qoshqa kaptinmi payqa ima ruraytapis shumaq yachan. 32 Qoripita, qellaypita y broncipita kuyaylapaq kaqkunata rurananpaqpis habilidänin kanmi. 33 Kuyaylapaq rumikunatapis laqlayta yachanmi. Tsararänanta shumaq rurarkurmi kamaraqla kananpaq siguratsin. Tsaynömi qerutapis laqlayta yachan y tukuy niraq kuyaylapaq kaqkunatapis rurayta yachan.
34 “Bezaleelta y Ahisamacpa tsurin Aholiabtapis TAYTA DIOSMI habilidäta qoshqa wakin runakunata yachatsinanpaq. Aholiabqa Dan trïbupitami kaykan. 35 Ishkantami TAYTA DIOS habilidäta qoshqa imatapis kuyaylapaqta rurapäkunanpaq, azul, granäti y puka milwa hïlukunawan y llanula putskashqa lïnu hïlukunawan imatapis bordananpaq y kuyaylapaq laborkunata awananpaq.