Números
Israel runakuna Egiptupita Jordán mayuyaq chayapäkushqan
33 Kaychömi qelqaraykan Israel runakuna Egiptupita trïbunpa trïbunpa yarqamuptin Moisés y Aarón pushashqankuna. 2 TAYTA DIOS nishqannölami Moisésqa qelqarqan yarqupäkushqan junaqpita patsa mayman mayman chayashqantapis.
3 Wata qalaykuq killa chunka pitsqa junaqmi Israel runakuna yarqupäkurqan Rameséspita. Tsay junaq karqan *Pascua mikuyta mikupäkushqan warayninmi*. TAYTA DIOS yanapaptinmi aywapäkurqan lapan Egipto runakuna rikarpaykaptin. 4 Egipto runakunanami TAYTA DIOS wanutsishqan qechpa tsurinkunata pamparkaykarqan. Tsaynöpami TAYTA DIOS musyatsirqan Egipto runakuna adorashqan diosninkuna munayniynaq kashqanta.
5 Israel runakunaqa Rameséspita aywakur chayarqan Sucotman.
6 Sucotpita aywakurnami chayapäkurqan Etamman. Tsayqa kaykan chunyaq tsaki jirkami.
7 Etampita aywakur chayarqan Baal-zefónpa tsimpan Pi-hahirotman. Tsaychöna Migdol nawpancho toldunkunata sharkatsipäkurqan.
8 Pi-hahirotpita aywakur lamarta pasashpan chayarqan chunyaq tsaki jirkaman. Nirkurna kimsa junaq chunyaq Etam jirkapa aywar chayapäkurqan Maraman. Tsayman chayaykur toldunkunata sharkatsipäkurqan.
9 Marapita aywakur chayarqan Elimman. Tsaycho karqan chunka ishkay pukyukuna y qanchis chunka (70) palmëra yörakunapis. Tsaychömi toldunkunata sharkatsipäkurqan.
10 Elimpita aywakur chayarqan Puka Lamar nawpanman.
11 Puka Lamarpita aywakur chayarqan Sin nishqan chunyaq partiman.
12 Sin nishqan chunyaq jirkapita aywakur chayarqan Dofcaman.
13 Dofcapita aywakur chayarqan Alúsman.
14 Alúspita aywakur chayarqan Refidimman. Tsaychöqa yaku manami karqantsu upupäkunanpaq.
15 Refidimpita aywakur chayarqan Sinaí chunyaq jirkaman.
16 Sinaí chunyaq jirkapita aywakur chayarqan Kibrot-hataavaman.
17 Kibrot-hataavapita aywakur chayarqan Hazerotman.
18 Hazerotpita aywakur chayarqan Ritmaman.
19 Ritmapita aywakur chayarqan Rimón-peresman.
20 Rimón-perespita aywakur chayarqan Libnaman.
21 Libnapita aywakur chayarqan Rissaman.
22 Rissapita aywakur chayarqan Ceelataman.
23 Ceelatapita aywakur chayarqan Sefer jirkaman.
24 Sefer jirkapita aywakur chayarqan Haradaman.
25 Haradapita aywakur chayarqan Macelotman.
26 Macelotpita aywakur chayarqan Tahatman.
27 Tahatpita aywakur chayarqan Taraman.
28 Tarapita aywakur chayarqan Mitcaman.
29 Mitcapita aywakur chayarqan Hasmonaman.
30 Hasmonapita aywakur chayarqan Moserotman.
31 Moserotpita aywakur chayarqan Bene-jaacánman.
32 Bene-jaacánpita aywakur chayarqan Gidgad jirkaman.
33 Gidgad jirkapita aywakur chayarqan Jotbataman.
34 Jotbatapita aywakur chayarqan Abronaman.
35 Abronapita aywakur chayarqan Ezión-geberman.
36 Ezión-geberpita aywakur chayarqan Zin nishqan chunyaq jirkaman. Tsayqa karqan Cades partichömi.
37 Cadespita aywakur chayarqan Edom nacionwan tinkuq Hor jirkamanna. 38 Tsaypita TAYTA DIOS nishqanno Hor puntaman* witsarkur cüra Aarón wanurqan. Pay wanurqan Israel runakuna Egiptupita yarqamushqanpita chusku chunka (40) wata pasarkuptinmi. Aarón wanushqan junaq karqan pitsqa kaq killa punta kaq junaqchömi. 39 Pachak ishkay chunka kimsa (123) watayuq kaykarmi Hor jirkacho Aarón wanurqan.
40 Hor jirkaman Israel runakuna chayashqantami Arad markapa mandaqnin rey mayarqan. Aradqa *Canaáncho kaykaq *Neguevchömi karqan.*
41 Israel runakunaqa Hor jirkapita aywakur chayarqan Zalmonaman.
42 Zalmonapita aywakur chayarqan Punónman.
43 Punónpita aywakur chayarqan Obotman.
44 Obotpita aywakur chayarqan Moabpa lindërun Ije-abarimman.
45 Ije-abarimpita aywakur chayarqan Dibón-gadman.
46 Dibón-gadpita aywakur chayarqan Almón-diblataimman.
47 Almón-diblataimpita aywakur chayarqan Abarim jirkakunaman. Tsayqa Nebupita inti jeqamunan kaq lädupami kaykan.
48 Abarim jirkakunapita aywakur chayarqan Jericó tsimpan y Jordán mayu nawpan Moab pampaman. 49 Tsay pampachömi toldunkunata Israel runakuna sharkatsipäkurqan Bet-jesimot partipita Abel-sitim partiyaq.
Canaánta aypunakunanpaq tantiyatsishqan
50 Jericó tsimpan y Jordán mayu nawpan Moab pampacho Israel runakuna taykaptinmi Moisésta TAYTA DIOS parlapar kayno nirqan: 51 “Israel runakunata kayno niy: ‘Jordán mayuta tsimparir *Canaánman yaykur 52 tsaycho taykaq runakunata lapanta qarqupäkunki. Rumipita rurashqa kaptinpis o fiërrupita fundishqa kaptinpis ïdulunkunata pakir ushapäkunki. Ïdulunkunata adoranan *altarkunatapis lapanta juchutsipäkunki.
53 “ ‘Tsaycho taq runakunata qarqurkur qamkunana tsaycho täpäkunki. Tsaycho tänaykipaqmi qamkunata qoykushqä. 54 Cada trïbucho ayka runakuna kashqanman tupu suertita jitaypa chakrata aypunki. Atska runakuna kaptin jatunta aypupäkunki. Walka runakuna kaptinqa takshalata aypupäkunki. Suerti yarqamushqanpitami cada trïbu chakrata chaskinqa.* 55 Canaáncho taq runakunata mana qarquptikiqa paykuna kanqa nawikicho qanra kaykaqno y chakikicho kasha jatiraykaqnömi. 56 Mana qarquptikiqa paykunata castiganäpaq yarpashqänölami qamkunatana castigashaykipaq’ ”.