Deuteronomio
Mandaq rey Ogta Israel runakuna vincishqan
3 “Tsaypitanami Basán nacionman aywaq nänipa aywarqantsi. Tsayta musyaykurmi Basán nacionpa mandaqnin rey Og lapan soldädunkunawan Edreiman shamurqan atacamänantsipaq.
2 “Tsaymi TAYTA DIOS kayno nimarqan: ‘Tsay runakunataqa ama mantsakuytsu. Noqami yanapashayki lapan soldäduntinta vincir nacionnintapis munaynikiman churapäkunaykipaq. Hesbóncho taq amorreo runakunapa mandaqnin rey Sehónta ushakätsishqaykinömi paykunatapis ushakätsinkipaq’.
3 “Tsaynöpami TAYTA DIOSNINTSI makintsiman churamurqan Basán nacionpa mandaqnin rey Ogta y lapan nacionninta. Lapan soldädunkunata ushakätsiptintsi manami juklaylapis kawaykar qeshpirqantsu. 4 Tsaymi nacionnincho kaykaq lapan markakunata ni juktapis mana kachaypa qechurqantsi. Tsay markakunaqa Argob particho soqta chunkami (60) karqan. 5 Lapan markakunapis altuyaq murallashqami karqan. Yaykuna punkunkunapis shumaq sigurashqami karqan. Tsaynölami muralläni atska markakunatapis qechurqantsi. 6 Tsay markakunata ushakätsirmi runatapis, warmitapis y wamratapis lapanta wanutsirqantsi. Hesbón markacho taq rey Sehónta y nacionninta ushakätsishqantsinömi paykunatapis ushakätsirqantsi. 7 Paykunapa uywankunata y imaykankunatapis väliq kaqkunalatami apakurqantsi.
8 “Tsaynöpami Jordán mayu tsimpan inti jeqamunan kaq läducho amorreo runakunapa ishkay mandaqnin reykunata vincirkur nacionninkunata qechurqantsi. Tsay qechushqantsikuna kaykan Arnón mayupita patsa hasta Hermón puntayaqmi. 9 (Hermón puntatami Sidón runakunaqa Sirión nipäkurqan. Amorreo runakunanami Senir nipäkurqan.) 10 Tsaynöpis qechurqantsi pampacho kaykaq markakunata, Galaad partita y lapan Basán nacionta Salca markapita qalaykur hasta Edrei markayaq. Tsaycho kaq markakunataqa rey Og munayninchömi tsarararqan. Tsay markakunata lapantami qechurqantsi”.
11 Basán nacionpa mandaqnin rey Ogqa jatunkaray refaíta runami karqan. Payta wanutsiptintsi manami mas refaíta runakuna karqannatsu. Paypa catrin fiërrupitami karqan. Catrinpa largun karqan chusku metru y anchunnami karqan ishkay metruno. Amonita runakuna taykashqan Rabá markachömi kananyaqpis catrin kaykan.
Rubén trïbu, Gad trïbu y pulan Manasés trïbu runakuna posisionta chaskishqan
12 “Qechushqantsi markakunata chakrantintami Rubén trïbu runakunata y Gad trïbu runakunata rikatsirqä. Tsay markakuna kaykan Arnón mayu nawpan Aroer markapita qalaykur hasta pulan Galaad jalqakunayaqmi.
13 “Tsaypita aywaraq Galaad jalqakunata y Og mandashqan Basán naciontami pulan Manasés trïbu runakunata rikatsirqä. Basáncho kaykaq Argob partiqa refaíta runakunapami karqan. 14 Argob partitaqa Manasés trïbu Jair jutiyuq runami qechurqan hasta Gesurpa y Maacapa lindërunyaq. Qechurkurnami tsay partita kikinpa jutinta churaparqan Havot-jair* jutin kananpaq. Kananyaqpis tsay jutilami kaykan. 15 Galaad partitanami Maquir aylu runakunata rikatsirqä.
16 “Rubén trïbu runakunata y Gad trïbu runakunatami rikatsirqä pulan Galaad partipita hasta Arnón mayuyaq. Tsaymi lindërun kaykan Arnón mayupita hasta Jaboc mayuyaq. Jaboc mayupitanami amonita runakuna tashqan parti qalaykun. 17 Tsaynöpis Arabá pampata paykunata rikatsirqä Cineret qochapita* hasta *Arabá Lamaryaq. Arabá Lamarqa *Kachi Lamarmi kaykan. Inti jeqanan kaq lädupami lindërun kaykan Jordán mayu. Inti jeqamunan kaq lädupanami Pisga nishqan punta kaykan.
18 “Tsay witsanmi Rubén trïbu, Gad trïbu y pulan Manasés trïbu runakunata kayno nirqä: ‘TAYTA DIOSNINTSI kay partikunata qoykushuptikipis armaykita apakurkur Israel mayikikunata pelyäshinaykipaq puntanta aywapäkuy. 19 Noqa musyämi tsaytsika uywaykikuna kashqanta. Tsaymi rikatsishqä markakunacho warmiki y tsurikikuna uywaykikunata rikar quëdapäkunqa. 20 Markaykikunaman ama kutimunkiraqtsu Israel mayikikunata Jordán mayu tsimpancho posisionninta TAYTA DIOSNINTSI manaraq qoptinqa. Qamkunata posisionta TAYTA DIOS qoshushqaykino paykunatapis posisionta qoptinraq kutipäkamunki’.*
21 “Josuétapis kaynömi nirqä: ‘Rikashqankimi TAYTA DIOSNINTSI tsay ishkay reykunata imano ushakätsishqantapis. Tsaynölami ushakätsinqa yaykunaykipaq kaq nacionkunacho taq runakunatapis. 22 TAYTA DIOSNINTSIMI qamkunapa favorniki pelyanqa. Tsayno kaykaptinqa ama mantsakäriytsu’.
Canaánman Moisés mana yaykunanpaq tantiyatsishqan
23 “Tsaypitami TAYTA DIOSTA manakur kayno nirqä: 24 ‘Tayta Dios, munayniyuq kashqaykitami tantiyaykätsimanki. Qampita mas munayniyuqqa jana patsachöpis ni kay patsachöpis manami ima diospis kantsu. Qam rurashqaykino ima milagrutapis rurananpaq manami mayqan diospis kantsu. 25 Kananqa ruwakushayki, Tayta. Kuyaylapaq jalqakunata y Líbanutapis rikaykunäpaq Jordán mayuta tsimpaykatsilämay’.
26 “Tsayno ruwakuptïpis TAYTA DIOSTA rabyanätsishqaykipitami aywanäta mana munar kayno nimarqan: ‘Tsaytaqa ama manakamaynatsu. 27 Tsaypa trukanqa Pisga nishqan puntaman witsarkur intërupa rikachakunki. Jordán mayutami itsanqa mana tsimpankipaqtsu.* 28 Tsay rikanaykipaq kaq nacionmanqa Josuénami Israel runakunata pushanqapaq. Tsayno kaykaptinqa payta shakyätsinki tsay nacionta aypunanpaq’. 29 Tsayno nimaptinmi Bet-peor tsimpan pampacho quëdakurqantsi”.